یوم پیدائش 26 فروری 1974
نعت
رحمانﷻ کی رحمت کا منارہ ہے محمدﷺ
ہم خاک نشینوں کا سہارہ ہے محمدﷺ
یہ فخر بہت ہم کو محمدﷺ کے ہیں ہم لوگ
یہ ناز بڑا ہے کہ ہمارا ہے محمدﷺ
ہاشم کا مقدر تو زمانے سے فزوں ہے
ہاشم کے مقدر کا ستارہ ہے محمدﷺ
صد شکر خدا پاک کرم تیرا ہے مجھ کو
ماں ، باپ سے اولاد سے پیارا ہے محمدﷺ
ہم لوگ تلاطم میں گھرے لوگ ہیں سارے
دنیا یہ سمندر ہے کنارہ ہے محمدﷺ
اس ، اس کا خدا پاک مدد گار ہوا ہے
جس جس نے صفی دل سے پکاراہے محمدﷺ
صفی ہمدانی
یوم پیدائش 26 فروری 1947
اگر ہو خوف زدہ طاقت بیاں کیسی
نوائے حق نہ سنائے تو پھر زیاں کیسی
اٹھاؤ حرف صداقت لہو کو گرم کرو
جو تیر پھینک نہیں سکتی وہ کماں کیسی
انہیں یہ فکر کہ میری صدا کو قید کریں
مجھے یہ رنج کہ اتنی خموشیاں کیسی
ہوا کے رخ پہ لیے بیٹھا ہوں چراغ اپنا
مرے خدا نے مجھے بخش دی اماں کیسی
ہوا چلے تو اسے کون روک سکتا ہے
اٹھا رکھی ہے یہ دیوار درمیاں کیسی
اگر یہ موسم گل ہے تو زرد رو کیوں ہے
دل و نظر پہ یہ کیفیت خزاں کیسی
نہ تار تار قبا ہے نہ داغ داغ بدن
مجاہدوں کے سروں سے گئی اذاں کیسی
عبد الرحیم نشتر
یوم پیدائش 25 فروری
کنارِ آب رواں کھوئی کشتیوں سے اُدھر
میں جی رہا ہوں سرابوں کی سرحدوں سے اُدھر
بسی تھی اس کی نگاہوں میں ایسی خاموشی
میں چونک چونک پڑا دل کی دھڑکنوں سے اُدھر
یہ کس صدا کے تعاقب میں چل پڑے ہم لوگ
افق سے دور کہیں نیلے پانیوں سے اُدھر
تھے بند شہر کے خستہ مکاں زمانوں سے
سو جھانکتے ہی نہیں لوگ کھڑکیوں سے اُدھر
ہے اک پری کے تصرف میں ان دنوں ذی شان
وہ جھیل دیکھتے ہو سبز ٹہنیوں سے اُدھر
ذی شان
مری حیات پہ گزرے گا سانحہ بن کر
مرے رقیب کے پاؤں میں راز دان مرا
خیالِ خام میں زندہ تو رہ لوں میں لیکن
گمانِ عشق میں بٹتا نہیں گمان مرا
ہر ایک سمت ہی بنتی رہی تری تصویر
ترے خیال میں وشمہ رہا ہے دھیان مرا
وشمہ خان وشمہ
#urdupoetry #urdudeccan #اردودکن #اردو #شعراء #birthday #پیدائش #شاعری #اردوشاعری #اردوغزل #urdugazal #urdu #poetrylover #poetry #rekhta #شاعر #غزل #gazal
سنو پرکھوں کی عزت کو تماشا مت بنا دینا
محبت ھو بھی جائے تو کہیں دل میں چھپا دینا
ذرا اچھی نہیں لگتیں تری اشکوں بھری آنکھیں
بچھڑ کر یاد جو آئیں کبھی تو مسکرا دینا
فنا ھو جائے جل جل کر اندھیروں کی تمنا میں
ھوا کی راہ میں اتنے چراغوں کو جلا دینا
ابھی فرصت کہاں اتنی کہ کار-دوجہاں دیکھیں.
ابھی تو مشغلہ اپنا تجھے ھر پل صدا دینا
نقاہت سات جنموں کی مری سانسوں میں در آئے
مجھے میری ہی چاہت میں کچھ اس صورت تھکا دینا
مجھے ماں نے سکھایا ھے محبت بانٹتے جانا
مری فطرت نہیں دائم حقارت کو ھوا دینا
دائم بٹ
یوم پیدائش 25 فروری 1952
آنکھوں میں اگر آپ کی صورت نہیں ہوتی
اس دل میں محبت کسی صورت نہیں ہوتی
جب تک پس پردہ وہ چھپے بیٹھے رہیں گے
کچھ بھی یہاں ہو جائے قیامت نہیں ہوتی
دیکھے جو تجھے لوگ تو سمجھے مرے اشعار
لفظوں سے تو شعروں کی وضاحت نہیں ہوتی
کیا اور کوئی کام کرے چھوڑیئے صاحب
بیکاری سے دنیا میں فراغت نہیں ہوتی
شہروں کے تصور سے بھی گھبرانے لگا دل
صحرا میں چلے جاؤ تو وحشت نہیں ہوتی
اس عمر میں بڑھ جاتے ہیں محنت کے تقاضے
جس عمر میں انسان سے محنت نہیں ہوتی
ہوتی تھی ہر ایک بات پہ حیرت مجھے پہلے
اب مجھ کو کسی بات پہ حیرت نہیں ہوتی
برباد ابدؔ ہم کو مروت نے کیا ہے
سب ہوتا جو آنکھوں میں مروت نہیں ہوتی
سرفراز ابد
یوم پیدائش 25 فروری 1952
بچھڑ کے تجھ سے کسی دوسرے پہ مرنا ہے
یہ تجربہ بھی اسی زندگی میں کرنا ہے
ہوا درختوں سے کہتی ہے دکھ کے لہجے میں
ابھی مجھے کئی صحراؤں سے گزرنا ہے
میں منظروں کے گھنے پن سے خوف کھاتا ہوں
فنا کو دست محبت یہاں بھی دھرنا ہے
تلاش رزق میں دریا کے پنچھیوں کی طرح
تمام عمر مجھے ڈوبنا ابھرنا ہے
اداسیوں کے خد و خال سے جو واقف ہو
اک ایسے شخص کو اکثر تلاش کرنا ہے
اسعد بدایونی
یوم پیدائش 24 فروری 1928
کوئی جھنکار ہے نغمہ ہے صدا ہے کیا ہے
تو کرن ہے کے کلی ہے کے صبا ہے کیا ہے
تیری آنکھوں میں کئی رنگ جھلکتے دیکھے
سادگی ہے کہ جھجھک ہے کہ حیا ہے کیا ہے
روح کی پیاس بجھا دی ہے تری قربت نے
تو کوئی جھیل ہے جھرنا ہے گھٹا ہے کیا ہے
نام ہونٹوں پہ ترا آئے تو راحت سی ملے
تو تسلی ہے دلاسہ ہے دعا ہے کیا ہے
ہوش میں لا کے مرے ہوش اڑانے والے
یہ ترا ناز ہے شوخی ہے ادا ہے کیا ہے
دل خطا وار نظر پارسا تصویر انا
وہ بشر ہے کہ فرشتہ ہے کہ خدا ہے کیا ہے
بن گئی نقش جو سرخی ترے افسانے کی
وہ شفق ہے کہ دھنک ہے کہ حنا ہے کیا ہے
نقش لائل پوری
یوم پیدائش 23 فروری1986
" نعت "
آپؐ کا نام ہے ظُلمٙت کو مِٹانے والا
دِل میں چاہٙت کے چٙراغوں کو جٙلانے والا
آپؐ کیا آئے ، غریبوں کا مٙسِیحا آیا
کون مُفلِس کو تھا سِینے سے لگانے والا ؟
زِندہ دٙرگور کِیا کرتے تھے دُنیا والے
بیٹیوں کو تھا کہاں کوئی بچانے والا ؟
جان اٙپنی غٙمِ دٙورٙاں سے چُھڑا لیتا ہے
آپؐ کے ذِکر کی مٙحفِل کو سٙجانے والا
آپؐ کے حُسن کا کرتا ہے نٙظارٙہ پٙیہٙم
آپؐ سے رِشتٙہءِ اُلفٙت کو نِبھانے والا
آپؐ ہی کے یہ نٙواسے کی تھی جُراٙت ، وٙرنہ
کون مٙقتٙل میں تھا سٙر اٙپنا کٙٹانے والا ؟
پیارے آقاؐ پہ ہُوئی خٙتم نٙبوّٙت کٙیفی !
اٙب نٙبیؑ دُنیا میں کوئی نہیں آنے والا
محمود کیفی
یوم پیدائش 22 فروری 1933
ہم بھی بدل گئے تری طرز ادا کے ساتھ ساتھ
رنگ حنا کے ساتھ ساتھ شوخئ پا کے ساتھ ساتھ
نکہت زلف لے اڑی مثل خیال چل پڑی
چلتا ہے کون دیکھیے آج حنا کے ساتھ ساتھ
اتنی جفا طرازیاں اتنی ستم شعاریاں
تم بھی چلے ہو کچھ قدم اہل وفا کے ساتھ ساتھ
وحشت درد ہجر نے ہم کو جگا جگا دیا
نیند کبھی جو آ گئی ٹھنڈی ہوا کے ساتھ ساتھ
ہوش اڑا اڑا دیئے راہ کے اضطراب نے
نکہت گل چلی تو تھی باد صبا کے ساتھ ساتھ
اطہر نفیس
یوم پیدائش 22 فروری
الجھ رہی ہوں ذہن میں اٹھے ہوئے خیال سے
سوال سے ، جواب سے ، ہر اک نئے خیال سے
کھرچ رہی ہوں رات دن نشان تیری یاد کے
میں لڑ رہی آج کل فقط ترے خیال سے
جواں ہوئی ہے فکر سے ہی روشنی حیات میں
جڑے ہیں پھر سے ذہن و دل کے سلسلے خیال سے
گلاب سارے کھل اٹھے ہیں رہ گذر میں خواب کے
حسیں ترین ہو گئے ہیں رابطے خیال سے
دلوں سے دل کے تال جب ملیں تو رکھنا پیار سے
عطا یہ رب کی خاص ہے سنبھال کے خیال سے
یہ شاخ دل ہری ہوئی کلی کلی مری کھلی
عجب سرور چھا گیا ، ہرے بھرے خیال سے
دل و نظر ملا کے جب چلیں گے ساتھ ساتھ ہم
کٹے گی پھر تو زندگی ملے جلے خیال سے
امید کا چراغ پھر ہوا کی زد پہ آگیا
ہوئی ہے پہروں گفتگو کسی بجھے خیال سے
سبیلہ ! گام گام ہیں خوشی غمی کے فیصلے
کیے ہیں دل نے صد ہزار مشورے خیال سے
سبیلہ انعام صدیقی
مچاؤں شور زمانے کی یوں نظر میں رہوں
وگرنہ سسکیاں بھرتے ہُوئے میں گھر میں رہوں
کبھی خیال میں تیرے کبھی نظر میں رہوں
کسی بھی شعر کی صورت ترے ہُنر میں رہوں
لبوں پہ اُس کے ہمیشہ رہوں بنامِ غزل
دُعائے خیر بنوں حرفِ معتبر میں رہوں
کبھی تو راہ دکھاؤں ستارہ بن کے تُجھے
کبھی تری ہی قیادت میں میں سفر میں رہوں
نئی صدی کی نئی نسل جانتی ہی نہیں
صدائے حق میں رہوں تو سدا اثر میں رہوں
یہ حوصلہ بھی شب و روز مُجھ کو اُس نے دیا
فلک کو چُھونے پرندوں کے بال و پر میں رہوں
گرفت حرف کی جاوید لازمی ہے سمجھ
کسی کو زیر کروں کس کے میں زبر میں رہوں
جاوید احمد خان جاویدؔ
یوم پیدائش 21 فروری 1829
بن آئی تیری شفاعت سے رو سیاہوں کی
کہ فرد داخل دفتر ہوئی گناہوں کی
ترے فقیر دکھائیں جو مرتبہ اپنا
نظر سے اترے چڑھی بارگاہ شاہوں کی
ذرا بھی چشم کرم ہو تو لے اڑیں حوریں
سمجھ کے سرمہ سیاہی مرے گناہوں کی
خوشا نصیب جو تیری گلی میں دفن ہوئے
جناں میں روحیں ہیں ان مغفرت پناہوں کی
فرشتے کرتے ہیں دامان زلف حور سے صاف
جو گرد پڑتی ہے اس روضے پر نگاہوں کی
رکے گی آ کے شفاعت تری خریداری
کھلیں گی حشر میں جب گٹھڑیاں گناہوں کی
میں ناتواں ہوں پہنچوں گا آپ تک کیونکر
کہ بھیڑ ہوگی قیامت میں عذر خواہوں کی
نگاہ لطف ہے لازم کہ دور ہو یہ مرض
دبا رہی ہے سیاہی مجھے گناہوں کی
خدا کریم محمدﷺ شفیع روز جزا
امیر کیا ہے حقیقت میرے گناہوں کی
امیر مینائی
یوم پیدائش 20 فروری 1981
کاتب تقدیر میرے حق میں کچھ تحریر ہو
رنج ہو یا شادمانی کچھ تو دامن گیر ہو
آب رود زیست کے کچھ گھونٹ زہریلے بھی ہوں
میں نے کب چاہا تھا ہر قطرہ مجھے اکسیر ہو
عہد آزادی سے بہتر قید زنداں ہو تو پھر
توڑ دینے کی قفس کو کیوں کوئی تدبیر ہو
تیز لہریں آ ہی جاتی ہیں مٹانے کے لیے
غم رہے پنہاں در و دیوار دل کے درمیاں
کیا ضروری ہے کہ کرب زیست کی تشہیر ہو
راغب اختر
#urdupoetry #urdudeccan #اردودکن #اردو #شعراء #birthday #پیدائش #شاعری #اردوشاعری #اردوغزل #urdugazal #urd#rekhtafoundation
یوم پیدائش 20 فروری 1989
اب کہاں تیرے محلات میں جی لگتا ہے
مجھ سے مجنوں کا خرابات میں جی لگتا ہے
اس ڈگر پر تو قواٸد ہی بدل جاتے ہیں
عشق میں جیت نہیں مات میں جی لگتا ہے
حیف بیزار ہوٸے اپنی روایات سے ہم
اور مغرب کی خرافات میں جی لگتا ہے
ہاں یہی کھلتی جوانی ہے اسی عمر میں ہی
پیار کرنے کے تجربات میں جی لگتا ہے
یہ بھی اچھا ہے گناہوں کی سزا دنیا میں
یہ بھی اچھا ہے مکافات میں جی لگتا ہے
رب کی رحمت کی سند مجھ کو ملی ہے قمبر
صبح ِ اول کی عبادات میں جی لگتا ہے
قمبر عباس قمر
یوم پیدائش 20 فروری 1917
تھوڑا سا عکس چاند کے پیکر میں ڈال دے
تو آ کے جان رات کے منظر میں ڈال دے
جس دن مری جبیں کسی دہلیز پر جھکے
اس دن خدا شگاف مرے سر میں ڈال دے
اللہ تیرے ساتھ ہے ملاح کو نہ دیکھ
یہ ٹوٹی پھوٹی ناؤ سمندر میں ڈال دے
آ تیرے مال و زر کو میں تقدیس بخش دوں
لا اپنا مال و زر مری ٹھوکر میں ڈال دے
بھاگ ایسے رہنما سے جو لگتا ہے خضر سا
جانے یہ کس جگہ تجھے چکر میں ڈال دے
اس سے ترے مکان کا منظر ہے بد نما
چنگاری میرے پھوس کے چھپر میں ڈال دے
میں نے پناہ دی تجھے بارش کی رات میں
تو جاتے جاتے آگ مرے گھر میں ڈال دے
اے کیفؔ جاگتے تجھے پچھلا پہر ہوا
اب لاش جیسے جسم کو بستر میں ڈال دے
کیف بھوپالی
میرے فن کار
!!مجھے خوب تراشا تو نے
آنکھ نیلم کی
بدن چاندی کا
یاقوت کے لب
یہ ترے
ذوق طلب کے بھی ہیں
معیار عجب
پاؤں میں میرے
یہ پازیب
سجا دی تو نے
نقرئی تار میں آواز منڈھا دی تو نے
یہ جواہر سے جڑی
قیمتی مورت میری
اپنے سامان تعیش میں لگا دی تو نے
میں نے مانا
کہ حسیں ہے ترا شہکار
مگر
تیرے شہکار میں
مجھ جیسی کوئی بات نہیں
تجھ کو نیلم سی
نظر آتی ہیں آنکھیں میری
درد کے ان میں سمندر
نہیں دیکھے تو نے
تو نے
جب کی
لب و رخسار کی خطاطی کی
جو ورق لکھے تھے
دل پر
نہیں دیکھے تو نے
میرے فن کار
ترے ذوق
ترے فن کا کمال
میرے پندار کی قیمت
نہ چکا پائے گا
تو نے بت یا تو تراشے
یا تراشے ہیں خدا
تو بھلا کیا مری تصویر
بنا پائے گا
تیرے اوراق سے
یہ شکل مٹانی ہوگی
اپنی تصویر
مجھے آپ بنانی ہوگی
ہوش بھی
جرأت گفتار بھی
بینائی بھی
جرأت عشق بھی ہے
ضبط کی رعنائی بھی
جتنے جوہر ہیں نمو کے
مری تعمیر میں ہیں
دیکھ یہ رنگ
جو تازہ مری تصویر میں ہیں
یوم پیدائش 19 فروری 1978
مرے حالات ہی بدلے ' نہ میں حالات سے نکلا
بہت دن رات دیکھے پر نہ کچھ دن رات سے نکلا
بھلا کیسے امیرِ شہر سے بنتی مری کچھ بات
نہ وہ اوقات میں سمٹا ' نہ میں اوقات سے نکلا
وہ کیا فن کی ضمانت تھی جو میرے نام پہ اتری
وہ کیا خوشبو حوالہ تھا جو میری ذات سے نکلا
ابھی تک وصل کا بھیگا ہوا احساس باقی ہے
بدن میرا ناجانے کون سی برسات سے نکلا
ظفر اقبال
یوم پیدائش 18 فروری 1960
نعت
وہ اک بشر جو زمانے میں سب سے بہتر تھا
سراپا نور تھا انسانیت کا رہبر تھا
صفت بیان کروں کیا میں اُسکی لفظوں میں
سمجھ لو کوزہ میں سمٹا ہوا سمندر تھا
بشر کی بند بصیرت کو اُسنے کھول دیا
تو کُفر خود ہی فنا ہو گیا جو اندر تھا
گذاری عمر شہنشاہِ دو جہاں نے یوں
نہ تخت تھا نہ کوئی تاج تھا نہ بستر تھا
کوئی مثال نہیں جسکے وصف کی حشمت
وہ شخص رحمتِ عالم کا ایک پیکر تھا
صلی اللہ علیہ وسلم
حشمت صدیق
یوم پیدائش 18 فروری 1968
اپنی خبر، نہ اس کا پتہ ہے، یہ عشق ہے
جو تھا، نہیں ہے، اور نہ تھا، ہے، یہ عشق ہے
پہلے جو تھا، وہ صرف تمہاری تلاش تھی
لیکن جو تم سے مل کے ہوا ہے، یہ عشق ہے
تشکیک ہے، نہ جنگ ہے مابین عقل و دل
بس یہ یقین ہے کہ خدا ہے، یہ عشق ہے
بے حد خوشی ہے، اور ہے بے انتہا سکون
اب درد ہے، نہ غم، نہ گلہ ہے، یہ عشق ہے
کیا رمز جاننی ہے تجھے اصل عشق کی؟
جو تجھ میں اس بدن کے سوا ہے، یہ عشق ہے
شہرت سے تیری خوش جو بہت ہے، یہ ہے خرد
اور یہ جو تجھ میں تجھ سے خفا ہے، یہ عشق ہے
زیر قبا جو حسن ہے، وہ حسن ہے خدا
بند قبا جو کھول رہا ہے، یہ عشق ہے
ادراک کی کمی ہے سمجھنا اسے مرض
اس کی دعا، نہ اس کی دوا ہے، یہ عشق ہے
شفاف و صاف، اور لطافت میں بے مثال
سارا وجود آئینہ سا ہے، یہ عشق ہے
یعنی کہ کچھ بھی اس کے سوا سوجھتا نہیں؟
ہاں تو جناب، مسئلہ کیا ہے؟ یہ عشق ہے
جو عقل سے بدن کو ملی تھی، وہ تھی ہوس
جو روح کو جنوں سے ملا ہے، یہ عشق ہے
اس میں نہیں ہے دخل کوئی خوف و حرص کا
اس کی جزا، نہ اس کی سزا ہے، یہ عشق ہے
سجدے میں ہے جو محو دعا وہ ہے بے دلی
یہ جو دھمال ڈال رہا ہے، یہ عشق ہے
ہوتا اگر کچھ اور تو ہوتا انا پرست
اس کی رضا شکست انا ہے، یہ عشق ہے
عرفانؔ ماننے میں تأمل تجھے ہی تھا
میں نے تو یہ ہمیشہ کہا ہے، یہ عشق ہے
عرفان ستار
یوم پیدائش 17 فروری 1964
محبتوں کو بھی وعدوں میں رکھ دیا گیا ہے
کہ جیسے پھول کتابوں میں رکھ دیا گیا ہے
چراغ گھر کی منڈیروں پہ رکھ دیئے گئے ہیں
اور انتظار چراغوں میں رکھ دیا گیا ہے
صدائیں سرد ہواوں کو سونپ دی گئ تھیں
پھر اس ہوا کو دریچوں میں رکھ دیا گیا ہے
جو ایک یاد پرانی سجی تھی کمرے میں
اسے بھی اب تو درازوں میں رکھ دیا گیا ہے
میں اک گماں تھی' فسانے میں ڈھل گئ آخر
وہ ایک خواب تھا ' آنکھوں میں رکھ دیا گیا ہے
میں ایک عرصہ اسی کی سپردگی میں رہی
جو ایک لمحہ خیالوں میں رکھ دیا گیا ہے
اب ان ہواوں میں ہے اس کی گنگناہٹ بھی
پھر اس کا لمس گلابوں میں رکھ دیا گیا ہے
سیما
یوم پیدائش 17 فروری 1873
معصوم نظر کا بھولا پن للچا کے لبھانا کیا جانے
دل آپ نشانہ بنتا ہے وہ تیر چلانا کیا جانے
کہہ جاتی ہے کیا وہ چین جبیں یہ آج سمجھ سکتے ہیں کہیں
کچھ سیکھا ہوا تو کام نہیں دل ناز اٹھانا کیا جانے
چٹکی جو کلی کوئل کوکی الفت کی کہانی ختم ہوئی
کیا کس نے کہی کیا کس نے سنی یہ بتا زمانہ کیا جانے
تھا دیر و حرم میں کیا رکھا جس سمت گیا ٹکرا کے پھرا
کس پردے کے پیچھے ہے شعلہ اندھا پروانہ کیا جانے
یہ زورا زوری عشق کی تھی فطرت ہی جس نے بدل ڈالی
جلتا ہوا دل ہو کر پانی آنسو بن جانا کیا جانے
سجدوں سے پڑا پتھر میں گڑھا لیکن نہ مٹا ماتھے کا لکھا
کرنے کو غریب نے کیا نہ کیا تقدیر بنانا کیا جانے
آنکھوں کی اندھی خود غرضی کاہے کو سمجھنے دے گی کبھی
جو نیند اڑا دے راتوں کی وہ خواب میں آنا کیا جانے
پتھر کی لکیر ہے نقش وفا آئینہ نہ جانو تلووں کا
لہرایا کرے رنگیں شعلہ دل پلٹے کھانا کیا جانے
جس نالے سے دنیا بے کل ہے وہ جلتے دل کی مشعل ہے
جو پہلا لوکا خود نہ سہے وہ آگ لگانا کیا جانے
ہم آرزوؔ آئے بیٹھے ہیں اور وہ شرمائے بیٹھے ہیں
مشتاق نظر گستاخ نہیں پردہ سرکانا کیا جانے
آرزو لکھنوی
نسلیں جو اندھیرے کے محاذوں پہ لڑی ہیں
اب دن کے کٹہرے میں خطاوار کھڑی ہیں
بے نام سی آواز شگفت آئی کہیں سے
کچھ پتیاں شاید شجر شب سے جھڑی ہیں
نکلیں تو شکستوں کے اندھیرے ابل آئیں
رہنے دو جو کرنیں مری آنکھوں میں گڑی ہیں
آ ڈوب! ابھرنا ہے تجھے اگلے نگر میں
منزل بھی بلاتی ہے صلیبیں بھی کھڑی ہیں
جب پاس کبھی جائیں تو پٹ بھیڑ لیں کھٹ سے
کیا لڑکیاں سپنے کے دریچوں میں کھڑی ہیں
کیا رات کے آشوب میں وہ خود سے لڑا تھا
آئینے کے چہرے پہ خراشیں سی پڑی ہیں
خاموشیاں اس ساحل آواز سے آگے
پاتال سے گہری ہیں، سمندر سے بڑی ہیں
آفتاب اقبال شمیم
یوم پیدائش 16 فروری 1946
وفا کا یہ صلہ اچھا دیا ہے
مجھے ہی بیوفا ٹھہرا دیا ہے
عزیزوں دوستوں کے مشوروں نے
ہمارا مسئلہ الجھا دیا ہے
بڑھائے جب بھی پاؤں حق کی جانب
مرے رب نے مجھے رستہ دیا ہے
کھلا کر خوبصورت گل خدا نے
ہمارا گلستاں مہکا دیا ہے
سڑک پر آئے دہقانوں نے بھاؤ
سب آٹے دال کا بتلا دیا ہے
'حسن' بندوں نے جیسے بیج بوئے
خدا نے پھل انھیں ویسا دیا ہے
حسن شمسی
یوم پیدائش 16 فروری 1927
ہم دشت سے ہر شام یہی سوچ کے گھر آئے
شاید کہ کسی شب ترے آنے کی خبر آئے
معلوم کسے شہر طلسمات کا رستہ
کچھ دور مرے ساتھ تو مہتاب سفر آئے
اس پھول سے چہرے کی طلب راحت جاں ہے
پھینکے کوئی پتھر بھی تو احساں مرے سر آئے
تا پھر نہ مجھے تیرہ نصیبی کا گلا ہو
یہ صبح کا سورج مری آنکھوں میں اتر آئے
اب آگے علم اور کوئی ہاتھوں سے لے لے
ہم شب کے مسافر تھے چلے تا بہ سحر آئے
اصغر گورکھپوری
یوم پیدائش 15 فروری 1945
اس سے پہلے کہ مجھے وقت علیحدہ رکھ دے
میرے ہونٹوں پہ مرے نام کا بوسہ رکھ دے
حلق سے اب تو اترتا نہیں اشکوں کا نمک
اب کسی اور کی گردن پہ یہ دنیا رکھ دے
روشنی اپنی شباہت ہی بھلا دے نہ کہیں
اپنے سورج کے سرہانے مرا سایہ رکھ دے
تو کہاں لے کے پھرے گی مری تقدیر کا بوجھ
میری پلکوں پہ شب ہجر یہ تارا رکھ دے
مجھ سے لے لے مرے قسطوں پہ خریدے ہوئے دن
میرے لمحے میں مرا سارا زمانہ رکھ دے
ہم جو چلتے ہیں تو خود بنتا چلا جاتا ہے
لاکھ مٹی میں چھپا کر کوئی رستہ رکھ دے
ہم کو آزادی ملی بھی تو کچھ ایسے ناسکؔ
جیسے کمرے سے کوئی صحن میں پنجرہ رکھ دے
نثار ناسک
کیوں ہے روٹھا مرا ہم سفر دیکھنا
اِس ڈگر دیکھنا اُس ڈگر دیکھنا
راستوں کو ترے سر بہ سر دیکھنا
کاش تقدیر میں اب یہی ہو لکھا
ہو رُخِ مصطفیﷺ عمر بھر دیکھنا
زندگی کی اُڑانیں ہوں بھرنی اگر
تم پرندہ نہیں اُس کے پر دیکھنا
کچھ تو دشمن مخالف ہیں صف میں کھڑے
کچھ ہیں احباب سینہ سپر دیکھنا
شام ہوتے ہی سورج بچھڑ جائے گا
پھر نہ اُبھرے گا وہ رات بھر دیکھنا
جن کے آنگن میں خنجر نہ ہوں پھول ہوں
شہر میں کوئی ایسا ہو گھر دیکھنا
مشورہ ہے مرا میرے احباب سے
عیب چُنّا مرے مت ہُنر دیکھنا
اوج پر بھی چڑھے اور زمیں پر گرے
کیسے کیسے یہاں نام ور دیکھنا
اے فلک دے چھپا بادلوں میں اُسے
چاند میرا نہیں بام پر دیکھنا
ہے یہی مشغلہ جب سے تو ہے گیا
ٹِکٹِکی باندھ کر رہ گذر دیکھنا
آج کا نوجواں عشق کی آگ میں
کود پڑتا ہے کیوں بے خطر دیکھنا
نوجوانی میں کر ایک غلطی جواں
ہاتھ ملتا رہا عمر بھر دیکھنا
جانتا ہوں تغافل بجا ہے ترا
پر خُدارا اِدھر اک نظر دیکھنا
رات بھر یہ عبادت ہی کرتا ہوں میں
یاد کرنا تری اور قمر دیکھنا
بس اِسی فکر میں کٹ رہی شب شرر
جاگ جائیں تو ہوگی سحر دیکھنا
خضر احمد خان شرر
در و دیوار سے گھر کے قرینے بات کرتے ہیں
مگر مہمان آجائے تو زینے بات کرتے ہیں
اگر ہم مصلحت کی آڑ لے کر چپ بھی ہو جائیں
ہماری دونوں آنکھوں کے نگینے بات کرتے ہیں
کسی صورت سے ہو جاتا ھے طوفانوں کا اندازہ
سمندر چپ بھی ہوجائے سفینے بات کرتے ہیں
فقیروں کی تو عادت ھے بہت خاموش رہتے ہیں
ذرا ان کو ٹٹولو تو دفینے بات کرتے ہیں
ذرا قرآن کی گہرائیوں میں جھانک کر دیکھو
یقینناٗ علم و حکمت کے خزینے بات کرتے ہیں
بہت مشکل سے ہر ساعت گزرتی ھے غریبی کی
فراغت میں ہواؤں سے مہینے بات کرتے ہیں
ضعیفی میں خود اپنی سانس بھی اک بوجھ لگتی ھے
جوانی میں تو جسموں کے پسینے بات کرتے ہیں
ظہیر ناصری
جینے کو میں احساس کے ہر باندھ رہا ہوں
اک بورئیے میں سارا نگر باندھ رہا ہوں
اس حبس کے ماحول میں میرے لئے جو تھا
لہجے کا تیرے سارا اثر باندھ رہا ہوں
مجھ سے اے میری جان تو اتنا نہ خفا ہو
اک لمس کا احساس اگر باندھ رہا ہوں
عامر زمان خان
یوم پیدائش 15 فروری 1926
آنکھیں جن کو دیکھ نہ پائیں سپنوں میں بکھرا دینا
جتنے بھی ہیں روپ تمہارے جیتے جی دکھلا دینا
رات اور دن کے بیچ کہیں پر جاگے سوئے رستوں میں
میں تم سے اک بات کہوں گا تم بھی کچھ فرما دینا
اب کی رت میں جب دھرتی کو برکھا کی مہکار ملے
میرے بدن کی مٹی کو بھی رنگوں میں نہلا دینا
دل دریا ہے دل ساگر ہے اس دریا اس ساگر کی
ایک ہی لہر کا آنچل تھامے ساری عمر بتا دینا
ہم بھی لے کو تیز کریں گے بوندوں کی بوچھار کے ساتھ
پہلا ساون جھولنے والو تم بھی پینگ بڑھا دینا
فصل تمہاری اچھی ہوگی جاؤ ہمارے کہنے سے
اپنے گاؤں کی ہر گوری کو نئی چنریا لا دینا
یہ مرے پودے یہ مرے پنچھی یہ مرے پیارے پیارے لوگ
میرے نام جو بادل آئے بستی میں برسا دینا
ہجر کی آگ میں اے ری ہواؤ دو جلتے گھر اگر کہیں
تنہا تنہا جلتے ہوں تو آگ میں آگ ملا دینا
آج دھنک میں رنگ نہ ہوں گے ویسے جی بہلانے کو
شام ہوئے پر نیلے پیلے کچھ بیلون اڑا دینا
آج کی رات کوئی بیراگن کسی سے آنسو بدلے گی
بہتے دریا اڑتے بادل جہاں بھی ہوں ٹھہرا دینا
جاتے سال کی آخری شامیں بالک چوری کرتی ہیں
آنگن آنگن آگ جلانا گلی گلی پہرا دینا
اوس میں بھیگے شہر سے باہر آتے دن سے ملنا ہے
صبح تلک سنسار رہے تو ہم کو جلد جگا دینا
نیم کی چھاؤں میں بیٹھنے والے سبھی کے سیوک ہوتے ہیں
کوئی ناگ بھی آ نکلے تو اس کو دودھ پلا دینا
تیرے کرم سے یارب سب کو اپنی اپنی مراد ملے
جس نے ہمارا دل توڑا ہے اس کو بھی بیٹا دینا
رئیس فروغ
یوم پیدائش 15 فروری 1905
اپنی ناکام تمناؤں کا ماتم نہ کرو
تھم گیا دور مئے ناب تو کچھ غم نہ کرو
اور بھی کتنے طریقے ہیں بیان غم کے
مسکراتی ہوئی آنکھوں کو تو پر نم نہ کرو
ہاں یہ شمشیر حوادث ہو تو کچھ بات بھی ہے
گردنیں طوق غلامی کے لیے خم نہ کرو
تم تو ہو رند تمہیں محفل جم سے کیا کام
بزم جم ہو گئی برہم تو کوئی غم نہ کرو
بادۂ کہنہ ڈھلے ساغر نو میں فطرتؔ
ذوق فریاد کو آزردۂ ماتم نہ کرو
عبدالعزیز فطرت
یوم پیدائش 15 فروری 1914
نہ سیو ہونٹ نہ خوابوں میں صدا دو ہم کو
مصلحت کا یہ تقاضا ہے بھلا دو ہم کو
جرم سقراط سے ہٹ کر نہ سزا دو ہم کو
زہر رکھا ہے تو یہ آب بقا دو ہم کو
بستیاں آگ میں بہہ جائیں کہ پتھر برسیں
ہم اگر سوئے ہوئے ہیں تو جگا دو ہم کو
ہم حقیقت ہیں تو تسلیم نہ کرنے کا سبب
ہاں اگر حرف غلط ہیں تو مٹا دو ہم کو
خضر مشہور ہو الیاس بنے پھرتے ہو
کب سے ہم گم ہیں ہمارا تو پتا دو ہم کو
زیست ہے اس سحر و شام سے بیزار و زبوں
لالہ و گل کی طرح رنگ قبا دو ہم کو
شورش عشق میں ہے حسن برابر کا شریک
سوچ کر جرم تمنا کی سزا دو ہم کو
جرأت لمس بھی امکان طلب میں ہے مگر
یہ نہ ہو اور گناہ گار بنا دو ہم کو
کیوں نہ اس شب سے نئے دور کا آغاز کریں
بزم خوباں سے کوئی نغمہ سنا دو ہم کو
مقصد زیست غم عشق ہے صحرا ہو کہ شہر
بیٹھ جائیں گے جہاں چاہو بٹھا دو ہم کو
ہم چٹانیں ہیں کوئی ریت کے ساحل تو نہیں
شوق سے شہر پناہوں میں لگا دو ہم کو
بھیڑ بازار سماعت میں ہے نغموں کی بہت
جس سے تم سامنے ابھرو وہ صدا دو ہم کو
کون دیتا ہے محبت کو پرستش کا مقام
تم یہ انصاف سے سوچو تو دعا دو ہم کو
آج ماحول کو آرائش جاں سے ہے گریز
کوئی دانشؔ کی غزل لا کے سنا دو ہم کو
احسان دانش
یوم پیدائش 15 فروری 1914
رہ گزر ہو یا مسافر نیند جس کو آئے ہے
گرد کی میلی سی چادر اوڑھ کے سو جائے ہے
قربتیں ہی قربتیں ہیں دوریاں ہی دوریاں
آرزو جادو کے صحرا میں مجھے دوڑائے ہے
وقت کے ہاتھوں ضمیر شہر بھی مارا گیا
رفتہ رفتہ موج خوں سر سے گزرتی جائے ہے
میری آشفتہ سری وجہ شناسائی ہوئی
مجھ سے ملنے روز کوئی حادثہ آ جائے ہے
یوں تو اک حرف تسلی بھی بڑی شے ہے مگر
ایسا لگتا ہے وفا بے آبرو ہو جائے ہے
زندگی کی تلخیاں دیتی ہیں خوابوں کو جنم
تشنگی صحرا میں دریا کا سماں دکھلائے ہے
کس طرح دست ہنر میں بولنے لگتے ہیں رنگ
مدرسے والوں کو تاباںؔ کون سمجھا پائے ہے
غلام ربانی تاباں
یوم پیدائش 15 فروری 1935
ہمارا دل سویرے کا سنہرا جام ہو جائے
چراغوں کی طرح آنکھیں جلیں جب شام ہو جائے
کبھی تو آسماں سے چاند اترے جام ہو جائے
تمہارے نام کی اک خوبصورت شام ہو جائے
عجب حالات تھے یوں دل کا سودا ہو گیا آخر
محبت کی حویلی جس طرح نیلام ہو جائے
سمندر کے سفر میں اس طرح آواز دے ہم کو
ہوائیں تیز ہوں اور کشتیوں میں شام ہو جائے
مجھے معلوم ہے اس کا ٹھکانا پھر کہاں ہوگا
پرندہ آسماں چھونے میں جب ناکام ہو جائے
اجالے اپنی یادوں کے ہمارے ساتھ رہنے دو
نہ جانے کس گلی میں زندگی کی شام ہو جائے
بشیر بدر
یوم پیدائش 14 فروری 1925
زمانے پھر نئے سانچے میں ڈھلنے والا ہے
ذرا ٹھہر کہ نتیجہ نکلنے والا ہے
ابھی ہجوم عزیزاں ہے زیر تخت مراد
مگر زمانہ چلن تو بدلنے والا ہے
ہوئی ہے ناقۂ لیلیٰ کو سارباں کی تلاش
جلوس شہر کی گلیوں میں چلنے والا ہے
ضمیر اپنی تمنا کو پھر اگل دے گا
سمندروں سے یہ سونا اچھلنے والا ہے
نیا عذاب نئی صبحوں کی تلاش میں ہے
یہ ملک پھر نیا قاتل بدلنے والا ہے
صدائے صبح بشارت خبر سنائے گی
سلگ رہا ہے جو سینہ وہ جلنے والا ہے
نئے عذاب کی آمد ہے اور ہم ہیں وحیدؔ
عذاب دورۂ حاضر تو ٹلنے والا ہے
وحید قریشی
یوم پیدائش 14 فروری 1931
پتھر میں فن کے پھول کھلا کر چلا گیا
کیسے امٹ نقوش کوئی چھوڑتا گیا
سمٹا ترا خیال تو گل رنگ اشک تھا
پھیلا تو مثل دشت وفا پھیلتا گیا
سوچوں کی گونج تھی کہ قیامت کی گونج تھی
تیرا سکوت حشر کے منظر دکھا گیا
یا تیری آرزو مجھے لے آئی اس طرف
یا میرا شوق راہ میں صحرا بچھا گیا
وہ جس کو بھولنے کا تصور محال تھا
وہ عہد رفتہ رفتہ مجھے بھولتا گیا
جب اس کو پاس خاطر آزردگاں نہیں
مڑ مڑ کے کیوں وہ دور تلک دیکھتا گیا
حفیظ تائب
یوم پیدائش 14 فروری 1938
اے ہم نفسو! شب ہے گراں جاگتے رہنا
ہر لحظہ ہے یاں خطرۂ جاں جاگتے رہنا
ایسا نہ ہو یہ رات کوئی حشر اٹھا دے
اٹھتا ہے ستاروں سے دھواں جاگتے رہنا
اب حسن کی دنیا میں بھی آرام نہیں ہے
ہے شور سر کوئے بتاں جاگتے رہنا
یہ صحن گلستاں نہیں مقتل ہے رفیقو!
ہر شاخ ہے تلوار یہاں جاگتے رہنا
بے داروں کی دنیا کبھی لٹتی نہیں دوراںؔ
اک شمع لئے تم بھی یہاں جاگتے رہنا
اویس احمد دوراں
یوم پیدائش 14 فروری 1948
قرطاس و قلم ہاتھ میں ہے اور شب مہ ہے
اے رب ازل کھول دے جو دل میں گرہ ہے
اطراف سے ہر شب سمٹ آتی ہے سفیدی
ہر صبح جبیں پر مگر اک روز سیہ ہے
میں شام سے پہلے ہی پہنچ جاؤں تو بہتر
جنگل میں ہوں اور سر پہ مرے بار گنہ ہے
مہنگی ہے جہاں دھات مرے سرخ لہو سے
زردی کے اس آشوب میں تو میری پنہ ہے
منہ زور زمانوں کی ذرا کھینچ لے باگیں
میرے کسی بچھڑے ہوئے کی سالگرہ ہے
محمد اظہار الحق
یوم پیدائش 14 فروری 1946
دنیا میں کتنے رنگ نظر آئیں گے نئے
ہوں دید کے عمل میں اگر زاویے نئے
چہرہ بھی آنسوؤں سے تر و تازہ ہو گیا
بارش کے بعد سبزہ و گل بھی ہوئے نئے
بدلی ہے یہ زمیں کہ مری آنکھ وہ نہیں
بیگانہ شہر و دشت ہیں اور راستے نئے
اس کو بدل گیا نشۂ خود سپردگی
مانوس خال و خد مجھے یکسر لگے نئے
سب سے جدا ہیں گر مرے نو زائیدہ خیال
جس نے دیئے خیال وہ الفاظ دے نئے
حسن اکبر کمال
یوم پیدائش کی مبارک باد
14 فروری 1958
بچ کر کہاں میں جاؤں گا تیری نگاہ سے
رہتا ہوں دور اس لئے ہر اک گناہ سے
کھاتا رہے گا ٹھوکریں در در کی اے شفیق
جس کے قدم ہٹے ہیں صداقت کی راہ سے
شفیق عابدی
یوم پیدائش 14 فروری 1940
درد کی رات گزرتی ہے مگر آہستہ
وصل کی دھوپ نکھرتی ہے مگر آہستہ
آسماں دور نہیں ابر ذرا نیچے ہے
روشنی یوں بھی بکھرتی ہے مگر آہستہ
تم نے مانگی ہے دعا ٹھیک ہے خاموش رہو
بات پتھر میں اترتی ہے مگر آہستہ
تیری زلفوں سے اسے کیسے جدا کرتا میں
زندگی یوں بھی سنورتی ہے مگر آہستہ
فاروق نازکی
یوم پیدائش 13 فروری 1973
میں انساں کی بھلائی چاہتا ہوں
خد ایا رہنمائی چاہتا ہوں
مجھے اپنی غلامی کا شرف دے
میں ہر غم سے رہائی چاہتا ہوں
نہیں کچھ مانگتا میں تم سے لیکن
محبت ابتدائی چاہتا ہوں
مجھے اپنی رفاقت کا شرف دے
تجھے میں انتہائی چاہتا ہوں
محبت مٹ نہ جائے اس جہاں سے
میں ایسی روشنائی چاہتا ہوں
اے عزیز
یوم پیدائش 13 فروری 1911
گلوں میں رنگ بھرے باد نوبہار چلے
چلے بھی آؤ کہ گلشن کا کاروبار چلے
قفس اداس ہے یارو صبا سے کچھ تو کہو
کہیں تو بہر خدا آج ذکر یار چلے
کبھی تو صبح ترے کنج لب سے ہو آغاز
کبھی تو شب سر کاکل سے مشکبار چلے
بڑا ہے درد کا رشتہ یہ دل غریب سہی
تمہارے نام پہ آئیں گے غم گسار چلے
جو ہم پہ گزری سو گزری مگر شب ہجراں
ہمارے اشک تری عاقبت سنوار چلے
حضور یار ہوئی دفتر جنوں کی طلب
گرہ میں لے کے گریباں کا تار تار چلے
مقام فیضؔ کوئی راہ میں جچا ہی نہیں
جو کوئے یار سے نکلے تو سوئے دار چلے
فیض احمد فیض
یوم پیدائش 12 فروری 1893
دوست خوش ہوتے ہیں جب دوست کا غم دیکھتے ہیں
کیسی دنیا ہے الٰہی جسے ہم دیکھتے ہیں
دیکھتے ہیں جسے بادیدۂ نم دیکھتے ہیں
آپ کے دیکھنے والوں کو بھی ہم دیکھتے ہیں
بے محل اب تو ستم گر کے ستم دیکھتے ہیں
کیسے کیسوں کو برے حال میں ہم دیکھتے ہیں
ہنس کے تڑپا دے مگر غصے سے صورت نہ بگاڑ
یہ بھی معلوم ہے ظالم تجھے ہم دیکھتے ہیں
لوگ کیوں کہتے ہیں تو اس کو نہ دیکھ اس کو نہ دیکھ
ہم کو اللہ دکھاتا ہے تو ہم دیکھتے ہیں
باغ کی سیر نہ بازار کی تفریح رہی
ہم تو برسوں میں کسی دن پہ قدم دیکھتے ہیں
لعل ہیرے سہی تیرے لب دنداں ادھر آ
توڑ لیتے تو نہیں ہیں انہیں ہم دیکھتے ہیں
شل ہوئے دست طلب بھول گئے حرف سوال
آج ہم حوصلۂ اہل کرم دیکھتے ہیں
میں تماشا سہی لیکن یہ تماشا کیسا
مفت میں لوگ ترے ظلم و ستم دیکھتے ہیں
آپ کی کم نگہی حسن بھی ہے عیب بھی ہے
لوگ ایسا بھی سمجھتے ہیں کہ کم دیکھتے ہیں
ہم کو ٹھکراتے چلیں آپ کی محفل میں عدو
کیا انہیں کم نظر آتا ہے یا کم دیکھتے ہیں
چار لوگوں کے دکھانے کو تو اخلاق سے مل
اور کچھ بھی نہیں دنیا میں بھرم دیکھتے ہیں
میرا ہونا بھی نہ ہونے کے برابر ہے وہاں
دیکھیں جو لوگ وجود اور عدم دیکھتے ہیں
آنکھ میں شرم کا پانی مگر اتنا بھی نہ ہو
دیکھ ان کو جو تری آنکھ کو نم دیکھتے ہیں
ہو تو جائے گا ترے دیکھنے والوں میں شمار
اول اول ہی مگر اپنے کو ہم دیکھتے ہیں
راستہ چلنے کی اک چھیڑ تھی تو آقا نہ آ
ہم تو یہ قول یہ وعدہ یہ قسم دیکھتے ہیں
دیکھنا جرم ہوا ظلم ہوا قہر ہوا
یہ نہ دیکھا تجھے کس آنکھ سے ہم دیکھتے ہیں
آنکھ ان کی ہے دل ان کا ہے کلیجہ ان کا
رات دن جو مجھے بادیدۂ نم دیکھتے ہیں
اپنا رونا بھی صفیؔ راس نہ آیا ہم کو
اس کو شکوہ ہے کہ آنکھیں تری نم دیکھتے ہیں
صفی اورنگ آبادی
یوم پیدائش 12 فروری 1940
اسے یہ حق ہے کہ وہ مجھ سے اختلاف کرے
مگر وجود کا میرے بھی اعتراف کرے
اسے تو اپنی بھی صورت نظر نہیں آتی
وہ اپنے شیشۂ دل کی تو گرد صاف کرے
کیا جو اس نے مرے ساتھ نا مناسب تھا
معاف کر دیا میں نے خدا معاف کرے
وہ شخص جو کسی مسجد میں جا نہیں سکتا
تو اپنے گھر میں ہی کچھ روز اعتکاف کرے
وہ آدمی تو نہیں ہے سیاہ پتھر ہے
جو چاہتا ہے کہ دنیا مرا طواف کرے
وہ کوہ کن ہے نہ ہے اس کے ہاتھ میں تیشہ
مگر زبان سے جب چاہے وہ شگاف کرے
میں اس کے سارے نقائص اسے بتا دوں گا
انا کا اپنے بدن سے جدا غلاف کرے
جسے بھی دیکھیے پتھر اٹھائے پھرتا ہے
کوئی تو ہو مری وحشت کا اعتراف کرے
میں اس کی بات کا کیسے یقیں کروں اعجازؔ
جو شخص اپنے اصولوں سے انحراف کرے
اعجاز رحمانی
یوم پیدائش 12 فروری 1868
درد کو رہنے بھی دے دل میں دوا ہو جائے گی
موت آئے گی تو اے ہمدم شفا ہو جائے گی
ہوگی جب نالوں کی اپنے زیر گردوں بازگشت
میرے درد دل کی شہرت جا بجا ہو جائے گی
کوئے جاناں میں اسے ہے سجدہ ریزی کا جو شوق
میری پیشانی رہین نقش پا ہو جائے گی
کاکل پیچاں ہٹا کر رخ سے آؤ سامنے
پردہ دار حسن محفل میں ضیا ہو جائے گی
جب یہ سمجھوں گا کہ میری زیست ہے ممنون مرگ
موت میری زندگی کا آسرا ہو جائے گی
انتظار وصل کرنا عمر بھر ممکن تو ہے
گو نہیں معلوم حالت کیا سے کیا ہو جائے گی
محتسب اور ہم ہیں دونوں متفق اس باب میں
برملا جو مے کشی ہو بے ریا ہو جائے گی
میں ابھی سے جان دے دوں گا جو راہ عشق میں
انتہا مجنوں کی میری ابتدا ہو جائے گی
فاش راز دل نہیں کرتا مگر یہ ڈر تو ہے
بے خودی میں آہ لب سے آشنا ہو جائے گی
باریاب خواب گاہ ناز ہونے دو اسے
ان کی زلفوں میں پریشاں خود صبا ہو جائے گی
مقصد الفت کو کر لو پہلے شیداؔ دل نشیں
ورنہ ہر آہ و فغاں بے مدعا ہو جائے گی
یوم پیدائش 12 فروری 1868
درد کو رہنے بھی دے دل میں دوا ہو جائے گی
موت آئے گی تو اے ہمدم شفا ہو جائے گی
ہوگی جب نالوں کی اپنے زیر گردوں بازگشت
میرے درد دل کی شہرت جا بجا ہو جائے گی
کوئے جاناں میں اسے ہے سجدہ ریزی کا جو شوق
میری پیشانی رہین نقش پا ہو جائے گی
کاکل پیچاں ہٹا کر رخ سے آؤ سامنے
پردہ دار حسن محفل میں ضیا ہو جائے گی
جب یہ سمجھوں گا کہ میری زیست ہے ممنون مرگ
موت میری زندگی کا آسرا ہو جائے گی
انتظار وصل کرنا عمر بھر ممکن تو ہے
گو نہیں معلوم حالت کیا سے کیا ہو جائے گی
محتسب اور ہم ہیں دونوں متفق اس باب میں
برملا جو مے کشی ہو بے ریا ہو جائے گی
میں ابھی سے جان دے دوں گا جو راہ عشق میں
انتہا مجنوں کی میری ابتدا ہو جائے گی
فاش راز دل نہیں کرتا مگر یہ ڈر تو ہے
بے خودی میں آہ لب سے آشنا ہو جائے گی
باریاب خواب گاہ ناز ہونے دو اسے
ان کی زلفوں میں پریشاں خود صبا ہو جائے گی
مقصد الفت کو کر لو پہلے شیداؔ دل نشیں
ورنہ ہر آہ و فغاں بے مدعا ہو جائے گی
حکیم محمد اجمل خاں شیدا
یوم پیدائش 11 فروری 1927
چراغ حسرت و ارماں بجھا کے بیٹھے ہیں
ہر ایک طرح سے خود کو جلا کے بیٹھے ہیں
نہ کوئی راہ گزر ہے نہ کوئی ویرانہ
غم حیات میں سب کچھ لٹا کے بیٹھے ہیں
جنوں کی حد ہے کہ ہوش و خرد کی منزل ہے
خبر نہیں ہے کہاں آج آ کے بیٹھے ہیں
کبھی جو دل نے کہا اب چلو یہاں سے چلیں
تو اٹھ کے عالم وحشت میں جا کے بیٹھے ہیں
یہ کس جگہ پہ قدم رک گئے ہیں کیا کہیے
کہ منزلوں کے نشاں تک مٹا کے بیٹھے ہیں
باقر مہدی
یوم پیدائش 11 فروری 1972
نعت۔۔۔۔
پیشِ حضور اب بیاں رُوداد کیا کروں
سب کچھ وہ جانتے ہیں میں فریاد کیا کروں
تجھ کو تو چین صرف مدینے میں آئے گا
اب تو بتا ترا دلِ نا شاد کیا کروں
جب سامنے ہے روضہ وہ حاصل حیات کا
ایسے میں زندگی میں تجھے یاد کیا کروں
صدیوں سے بھیجتے ہیں مشائخ اُنہیں سلام
اب رسم میں نئی کوئی ایجاد کیا کروں
پاتا ہے خاکِ طیبہ سے میرا چمن غذا
دُنیا سڑی گلی یہ تری کھاد کیا کروں
آقا نے خود ہی مدح سرائی کے واسطے
آسان لفظ بھیجے ہیں نقّاد کیا کروں
صلی اللہ علیہ وسلم
اظہر حسین
یوم پیدائش 11 فروری 1958
گلشن مرا سباس ہو آقا کے نام سے
دل کو سجایا میں نےبڑے اہتمام سے
انکی غلامی سے ملا مدحت کا حوصلہ
ایسی عطاملی مجھے خیر الانام سے
شیریں زبانی مل گئی دل کا سرور بھی
پڑھتارہا میں صلِ علیٰ جو کلام سے
دل میں کسی کے واسطےکوئی جگہ نہیں
جب عشق ہوگیاہے محمدؐکےنام سے
بےشک کریں گے لوگ ہمارابھی احترام
سنت ادا اگر کریں ہم احترام سے
شافی ہیں اور ساقی بھی روزِ جزا نبی
ہم تشنگی بجھائیں گے کوثر کے جام سے
منظر عجیب ہو گا وہ جنت کا جس گھڑی
ارشد جو کیف پائیں گے آقا کے جام سے
مرزاخان ارشدؔ شمس آبادی
یوم پیدائش 10 فروری 1965
دھوپ پیچھا نہیں چھوڑے گی یہ سوچا بھی نہیں
ہم وہاں ہیں جہاں دیوار کا سایہ بھی نہیں
جانے کیوں دل مرا بے چین رہا کرتا ہے
ملنا تو دور رہا اس کو تو دیکھا بھی نہیں
آپ نے جب سے بدل ڈالا ہے جینے کا چلن
اب مجھے تلخیٔ احباب کا شکوہ بھی نہیں
مے کدہ چھوڑے ہوئے مجھ کو زمانہ گزرا
اور ساقی سے مجھے دور کا رشتہ بھی نہیں
دام میں رکھتا پرندوں کی اڑانیں لیکن
پر کترنے کا مگر اس کو سلیقہ بھی نہیں
مسکراہٹ میں کوئی طنز بھی ہو سکتا ہے
یہ مسرت کی علم دار ہو ایسا بھی نہیں
لاکھ یادوں کی طرف لوٹ کے جاؤں شاہینؔ
پردۂ دل پر اب اس شخص کا چہرہ بھی نہیں
سلمیٰ شاہین
یوم پیدائش 28 فروری 1902 غیر کے خط میں مجھے ان کے پیام آتے ہیں کوئی مانے کہ نہ مانے مرے نام آتے ہیں عافیت کوش مسافر جنھیں منزل سمجھیں عشق...
