یوم پیدائش 31 مارچ 1936
غنچے غنچے پہ گلستاں کے نکھار آ جائے
جس طرف سے وہ گزر جائیں بہار آ جائے
ہر نفس حشر بہ داماں ہے جنون غم میں
کس طرح اہل محبت کو قرار آ جائے
وہ کوئی جام پلا دیں تو نہ جانے کیا ہو
جن کے دیکھے ہی سے آنکھوں میں خمار آ جائے
غیر ہی سے سہی پیہم یہ کدورت کیوں ہو
کہیں آئینۂ دل پر نہ غبار آ جائے
کچھ اس انداز سے ہے حسن پشیمان جفا
کوئی مایوس وفا دیکھے تو پیار آ جائے
نازؔ گھر سے لئے جاتا ہے سوئے دشت مجھے
وہ جنوں جس سے بیاباں کو بھی عار آ جائے
ناز مرادآبادی
یوم پیدائش 30 مارچ 1976
بہت سازش ہوئی پھر بھی مری پہچان باقی ہے
خدا کا شکر ہےاٗردو زباں کی شان باقی ہے
خدا کے واسطے چلمن سے تم باہر نکل آؤ
ابھی تک دل ميں میرے ديد کا ارمان باقی ہے
میں اکثر سوچتا ہوں چھوڑ دوں اٍس شہر کو ليکن
مرے اسلاف سے وابستہ ہر پہچان باقی ہے
کبھی ہم راہٍ ایماں سے بھٹک سکتے نہیں لوگو
ہماری رہبری کے واسطے قرآن باقی ہے
سنو اے نا خداؤ کشتياں ساحل پہ لے آؤ
”ابھی موجوں کے دٍل ميں حشر کا طوفان باقی ہے“
ہر اک طوفان سے اے چاند گزروں گا میں ہنس ہنس کر
مری ماں کی دعاوں کا ابھی فیضان باقی ہے
سرفراز چاند
یوم پیدائش 30 مارچ 1953
بنامِ عشق ترا غم شناس رہتے ہوئے
میں مطمئن بھی بہت ہوں اداس رہتے ہوئے
کبھی تو کھل کے ملو اور ٹوٹ کر برسو
ہو کتنی دور مرے آس پاس رہتے ہوئے
وہ راز مجھ پہ مری بیخودی نے کھول دیا
جو جان پایا نہ ہوش وحواس رہتے ہوئے
یہ انتظار مجھے کیوں گراں گزرتا ہے
رفیقِ جاں ترے ملنے کی آس رہتے ہوئے
دمک رہی ہے جوانی ، چمک رہا ہے شباب
برہنگی ہے یہ کیسی لباس رہتے ہوئے
ایاز میرے لیے حسنِ آگہی تھا بہت
خدا شناس رہا خود شناس رہتے ہوئے
ہارون ایاز قادری
یاد رفتگاں بیاد شفیع الرحمں شفیع مرحوم
تاریخ وفات : 28 مارچ 2022
ہے شفیع الرحمں کی رحلت نہایت دلفگار
ان کے غم میں آج دنیائے ادب ہے سوگوار
ان سے تھا ہر وقت میرا اک خصوصی رابطہ
یہ خبر سن کر مری آنکھیں ہیں پیہم اشکبار
جنت الفردوس میں درجات ہوں ان کے بلند
ان پہ نازل ہو ہمیشہ رحمت پروردگار
فرط رنج و غم سے ان کے اہل خانہ ہیں نڈھال
آتے آتے آئے گا اس بیقراری کو قرار
کرتے تھے آیات قرآں کا وہ اردو ترجمہ
ان کی تاریخ ادب میں ہے جو زریں یادگار
اپنے حسن خلق سے تھے وہ دلوں پر پر حکمراں
مرجع اہل نظر ہیں ان کے ادبی شاہکار
ان کے ہیں اشعار عصری حسیت کے ترجماں
ان کی غزلوں سے عیاں ہے سرد وگرم روزگار
تھی منور ان سے پٹنہ کی ہر ادبی انجمن
ان کے ادبی ذوق کی برقی ہے جو آئینہ دار
احمد علی برقی اعظمی
#شعراء #اردو #اردوشاعری #اردوغزل #اردودکن #urdudeccan #poetrylovers #urduadab #urdu #urdupoetry #urdugazal
یوم وفات 28 مارچ 2022
انا الیہ وانا الیہ راجعون
جو ہے خو گرِضبط، اس کو پتا ہے
نہاں درد ہی میں خود اس کی دوا ہے
نہ شکوہ ہے کوئی، نہ ذکرِجفا ہے
پسند آپ کی مجھ کو اک اک ادا ہے
سرِ راہ پتلا بنا جو کھڑا ہے
وہ اپنے ہر آک ہم سفر سے لٹا ہے
بدن سے یہ جس کے دھواں اٹھ رہا ہے
کسی دل شکن کا بڑا دل جلا ہے
اسی پر سدا لوگ برسائیں پتھر
شجر جو ہرا ہے، پھلوں سے لدا ہے
ادب سیکھ لے گا یہی رفتہ رفتہ
ابھی پختہ کاروں میں بالکل نیا ہے
ڈھلے سارے الفاظ آہ و فغاں میں
معانی سے بھر پور دل کی نوا ہے
کرن چاند کی چھن کے من موہ لیتی
لطافت نواز اس نے اوڑھی نوا ہے
ہمیں بدر و خندق کے، خیبر کے وارث
شفیع آج کل ہر طرف کربلا ہے
شفیع الرحمن شفیع
یوم پیدائش 29 مارچ 1867
جتاتے رہتے ہیں یہ حادثے زمانے کے
کہ تنکے جمع کریں پھر نہ آشیانے کے
سبب یہ ہوتے ہیں ہر صبح باغ جانے کے
سبق پڑھاتے ہیں کلیوں کو مسکرانے کے
ہزاروں عشق جنوں خیز کے بنے قصے
ورق ہوے جو پریشاں مرے فسانے کے
ہیں اعتبار سے کتنے گرے ہوے دیکھا
اسی زمانے میں قصے اسی زمانے کے
قرار جلوہ نمائی ہوا ہے فردا پر
یہ طول دیکھیے اک مختصر زمانے کے
نہ پھول مرغ چمن اپنی خوشنوائی پر
جواب ہیں مرے نالے ترے ترانے کے
اسی کی خاک ہے ماتھے کی زیب بندہ نواز
جبیں پہ نقش پڑے ہیں جس آستانے کے
سائل دہلوی
یوم پیدائش 20 مارچ 1920
بات وہ بات نہیں ہے جو زباں تک پہنچے
آنکھ وہ آنکھ ہے جو سر نہاں تک پہنچے
قدر تعظیم کشش شوق محبت اظہار
روکئے دل کو نہ جانے یہ کہاں تک پہنچے
دل یہ ہر گام پہ کہتا ہے ٹھہر گھر ہے یہی
فرق سے تا بہ قدم آنکھ جہاں تک پہنچے
کس کو فرصت ہے سنے درد بھری ہے روداد
کون بے چارگیٔ خستہ دلاں تک پہنچے
جان لینا یہ اسی لمحہ کہ دل ٹوٹ گیا
بات جب ضبط سے بڑھ جائے فغاں تک پہنچے
مڑ کے دیکھا بھی نہیں دل کے لہو کی جانب
شعر کی داد یہ دی حسن بیاں تک پہنچے
سید حامد
یوم وفات 26 مارچ 1988
مشتاقِ نظارہ ہو کر بھی گستاخ نہ تھی ، بیباک نہ تھی
یہ پاسِ ادب سے اٹھ نہ سکی وہ سمجھے نظر کو تاب نہیں
نواب دہلوی
پاس آ تو بھی دل میں اتر بے خبر
دے کبھی مجھ کو اپنی خبر بے خبر
مجھ کومٹھی میں اپنی تو بھر ریت سا
میں نہ جاوں کہیں یوں بکھر بے خبر
چھوڑ آئینے کو جھا نک آنکھوں میں تو
عکس یاں دیکھ تُو بن سنور بے خبر
موت کا بھی ہوا ہے کبھی کوئی ڈر
ڈرنا ہے زندگی سے تُو ڈر بے خبر
زندگی کی یہ تصویر دل کش لگے
رنگ ایسا تو اک شوخ بھر بے خبر
چھوڑ تنہا محبت کی رہ میں نہ یوں
دیکھ رستے جدا اب نہ کر بے خبر
عمر بھر خود سے ملنے کی چا ہت رہی
میں بھٹکتا رہا در بدر بے خبر
ارفع کنول
یوم پیدائش 27 مارچ 1980
دعا کرو مرے حق میں کہ میرے یار ملے
مجھے بھی اب کوئی اچھا سا کاروبار ملے
انا پہ بوجھ ہے غیروں کی چاکری کرنا
ہو میرا اپنا خدایا جو روزگار ملے
کئی برس کی تھکن دور ہو گئی میری
گلے میں ڈال کے باہوں کا جب وہ ہار ملے
تمہارے حسن کا صدقہ نکالنا ہے مجھے
یہ انتظار ہے کوئی رفیقِ کار ملے
بھروسہ آج بھی میرا تمہی پہ قائم ہے
کہ دھوکے تم سے اگرچہ ہیں بے شمار ملے
ہم آگئے ہیں بڑے تنگ اِس حکومت سے
یہ حکمراں تو خدایا نہ بار بار ملے
امیرِ وقت جو مہنگا کرے نہ نان و نمک
غریبِ شہر کو شاید ذرا قرار ملے
کہ چاہ کر بھی مَیں شہزاد مسکرا نہ سکا
مَیں کیا کروں کہ مجھے لوگ سوگوار ملے
شہزاد مغل عجمی
یوم وفات 27 مارچ 1961
بے پردہ تو جو جلوۂ جانانہ ہو گیا
حیراں تھا پہلے اب تو میں دیوانہ ہو گیا
دیرو حرم میں آپ کو دیکھ ا تھا جلوہ گر
کیا جانے کس طرف دل دیوانہ ہو گیا
اب تم ہو اور شمع بھی ہے کر لو فیصلہ
پروانہ کس کو دیکھ کے پروانہ ہو گیا
تیرے سوا کسی کے نہ آگے جھکے گا سر
میرا مزاج عشق میں شاہانہ ہو گیا
بیکار لوگ دیتے ہیں الزام کفر کا
میں کچھ سمجھ کے ساکن بتخانہ ہو گیا
ہنس ہنس کے پائے یار پہ رافتؔ نے دیدی جان
لو آج ختم عشق کا افسانہ ہو گیا
رافت بہرائچ
یوم پیدائش 27 مارچ 1925
اک شورِ حشر سن مرے دل کی پکار میں
نغمے نہ ڈھونڈ بربطِ ہستی کے تار میں
ارمان شام نگری
یوم پیدائش 27 مارچ 1956
کیا کوئی تصویر بن سکتی ہے صورت کے بغیر
پھر کسی سے کیوں ملے کوئی ضرورت کے بغیر
دشمنی تو چاہنے کی انتہا کا نام ہے
یہ کہانی بھی ادھوری ہے محبت کے بغیر
تیری یادیں ہو گئیں جیسے مقدس آیتیں
چین آتا ہی نہیں دل کو تلاوت کے بغیر
دھوپ کی ہر سانس گنتے شام تک جو آ گئے
چھاؤں میں وہ کیا جئیں جینے کی عادت کے بغیر
بچ گیا دامن اگر میرے لہو کے داغ سے
وہ مرا قاتل تو مر جائے گا شہرت کے بغیر
اس کی سرداری سے اب انکار کرنا چاہیے
روشنی دیتا نہیں سورج سیاست کے بغیر
حسن کی دوکان ہو کہ عشق کا بازار ہو
یاں کوئی سودا نہیں ہے دل کی دولت کے بغیر
شبنمی چہرہ چھپاؤں کیسے بچوں سے فہیمؔ
شام آتی ہی نہیں گھر میں طہارت کے بغیر
فہیم جوگاپوری
یوم وفات 23 مارچ 1887
افشاں چمک کے زلف دوتا ہی میں رہ گئی
کچھ روشنی سی ہو کے سیاہی میں رہ گئی
سمجھوں گا تجھ سے روز قیامت میں اے جنوں
گر کوئی بات میری تباہی میں رہ گئی
آئیں ہزارہا شب ہجراں میں آفتیں
پر صبح اس کی علم الٰہی میں رہ گئی
آ ہی چکی تھی اس کی ادا سے بلا مگر
کچھ شرم کھا کے شوخ نگاہی میں رہ گئی
نوابؔ اپنے دل کو میں کیوں کر نکالتا
کنگھی الجھ کے زلف رسا ہی میں رہ گئی
نواب کلب علی خان
یوم پیدائش 15 مارچ
جب سے مرے رقیب کا رستہ بدل گیا
تب سے مرے نصیب کا نقشہ بدل گیا
شیریں تھا کتنا آپ کا انداز گفتگو
دو چار سکے آتے ہی لہجہ بدل گیا
کس کی زبان سے مجھے دیکھو خبر مجھے
کیسے مرے حریف کا چہرہ بدل گیا
ان کے بدلنے کا مجھے افسوس کچھ نہیں
افسوس یہ ہے اپنا ہی سایہ بدل گیا
جب سے بڑوں کی گھر سے حکومت چلی گئی
جنت نما مکان کا نقشہ بدل گیا
راہوں کی خاک چھانتا پھرتا ہوں آج تک
رہبر بدل گیا کبھی رستہ بدل گیا
کہتا ہے اس کے جانے سے کچھ بھی نہیں ہوا
مہتابؔ جبکہ دل کا وہ ڈھانچہ بدل گیا
بشیر مہتاب
یوم پیدائش 11 مارچ 1712
فدا کر جان اگر جانی یہی ہے
ارے دل وقت بے جانی یہی ہے
یہی قبر زلیخا سیں ہے آواز
اگر ہے یوسف ثانی یہی ہے
نہیں بجھتی ہے پیاس آنسو سیں لیکن
کریں کیا اب تو یاں پانی یہی ہے
کسی عاشق کے مرنے کا نہیں ترس
مگر یاں کی مسلمانی یہی ہے
برہ کا جان کندن ہے نپٹ سخت
شتاب آ مشکل آسانی یہی ہے
پرو تار پلک میں دانۂ اشک
کہ تسبیح سلیمانی یہی ہے
مجھے ظالم نے گریاں دیکھ بولا
کہ اس عالم میں طوفانی یہی ہے
زمیں پر یار کا نقش کف پا
ہمارا خط پیشانی یہی ہے
وو زلف پر شکن لگتی نہیں ہات
مجھے ساری پریشانی یہی ہے
نہ پھرنا جان دینا اس گلی میں
دل بے جان کی بانی یہی ہے
کیا روشن چراغ دل کوں میرے
سراجؔ اب فضل رحمانی یہی ہے
سراج اورنگ آبادی
یوم پیدائش 25 مارچ 1892
پچھتانے سے کیا حاصل پچھتانے سے کیا ہوگا
کچھ تو نے کیا ہوگا کچھ تجھ سے ہوا ہوگا
جینے کا مزہ جب ہے جینے کا ہو کچھ حاصل
یوں لاکھ جئے کوئی تو جینے سے کیا ہوگا
پرسش کی نہیں حاجت پرسش کی ضرورت کیا
معلوم ہے سب تجھ کو جو کچھ بھی ہوا ہوگا
جب تک ہے خودی دل میں ہوگی نہ پذیرائی
بیکار ہیں یہ سجدے ان سجدوں سے کیا ہوگا
جیسی بھی گزرتی ہے اے رازؔ گزرتی ہے
آغاز محبت ہے انجام میں کیا ہوگا
راز چاندپوری
یوم پیدائش 24 مارچ 1952
رو پڑی ہے روشنی کی ایک نازک سی کرن
میری کھڑکی کے شکستہ کانچ سے گزری ہے جب
شاکر ندیم
یوم پیدائش 23 مارچ 1944
خود اپنے آپ کو دھوکا دیا ہے
ہمارے ساتھ یہ اکثر ہوا ہے
یہ مجھ سے زندگی جو مانگتا ہے
نہ جانے کون یہ مجھ میں چھپا ہے
یہی میری شکستوں کا صلا ہے
کوئی میرے بدن میں ٹوٹتا ہے
کتاب گل کا رنگیں ہر ورق ہے
تمہارا نام کس نے لکھ دیا ہے
صلیب وقت پہ تنہا کھڑا ہوں
یہ سارا شہر مجھ پر ہنس رہا ہے
کبھی نیند آ گئی دیوانگی کو
کبھی صحرا بھی تھک کر سو گیا ہے
شمیمؔ اک برگ آوارہ تھا جامیؔ
خلاؤں میں کہیں اب کھو گیا ہے
مختار شمیم
یوم پیدائش 23 مارچ 1939
وہ ستم پرور بہ چشم اشک بار آ ہی گیا
چاک دامانی پہ میری اس کو پیار آ ہی گیا
مٹتے مٹتے مٹ گئی جان وفا کی آرزو
آتے آتے بے قراری کو قرار آ ہی گیا
چپکے چپکے مجھ پہ میری خامشی ہنستی رہی
روتے روتے جذب دل پر اختیار آ ہی گیا
کوئی وعدہ جس کا معنی آشنا ہوتا نہیں
پھر اسی وعدہ شکن پر اعتبار آ ہی گیا
یا الٰہی جذبۂ ہوش و خرد کی خیر ہو
منتظر جس کا جنوں تھا وہ دیار آ ہی گیا
بشیر فاروق
یوم پیدائش 23 مارچ 193
جنون و عقل نے مل کر نشان گاڑا ہے
کوئی بھی معرکہ اب تک ہوا نہ سر تنہا
احمرا بروی
یوم پیدائش 23 مارچ
یہ لُطف بھی مُجھ پر ہو مدینے میں سحر ہو
فیضانِ پیمبر ہو مدینے میں سحر ہو
حسرت یہ میری ہے کہ مرے سر پہ خدایا
خاکِ درِ اطہر ہو مدینے میں سحر ہو
فرقت کی گھڑی ختم ہو اب تو مرے مولا
شاداں دلِ مُضطر ہو مدینے میں سحر ہو
حسرت یہی ہے یادِ شہِ ارض و سما میں
دامانِ طلب تر ہو مدینے میں سحر ہو
اے شوقِ ادب خاکِ مدینہ پہ گرا دے
یہ میرا مقدر ہو مدینے میں سحر ہو
ہر غم میں بھلادوں گی اگر میری نظر میں
وہ روضۂ انور ہو مدینے میں سحر ہو
تصویرِ نبی ہو اگر آئینہ دل میں
دل میرا منور ہو مدینے میں سحر ہو
بشارت جبین
یوم پیدائش 23 مارچ 1982
قدیم دشت کے حالات سے نکلنا ہے
کہ عشق جیسی روایات سے نکلنا ہے
ہمی نے ، پہلی محبت میں ،فیصلہ کِیا تھا
کہ دوسری کی خرافات سے نکلنا ہے
دماغ خالی کِیا ، بند کرلی ہیں آنکھیں
مزید یہ کہ خیالات سے نکلنا ہے
پتہ نہیں ہے کہاں جانا ہے کہاں کے ہیں
ہمیں تو تیرے مضافات سے نکلنا ہے
ہم ایسے لوگ ہیں جن کے سوال ہوتے نہیں
سو ہم کو اپنے جوابات سے نکلنا ہے
کنارے شام کھڑے سوچتے رہے دونوں
کہ کس طرح ہمیں دن رات سے نکلنا ہے
قریب تھا کہ ہمیں معجزہ کوئی لگتا
سو برگزیدہ کرامات سے نکلنا ہے
ہم آدمی ہیں بنے ، ایک دوسرے کے لئے
بس اپنے اپنے مکافات سے نکلنا ہے
خیال ہے یہ زمیں ہی الٹ دی جائے گی
ہمیں خیال کے خدشات سے نکلنا ہے
پگھل رہے ہیں ترے حسن کے محل میں ہم
کہ برف پوش محلات سے نکلنا ہے
مکانِ دل کہ کھنڈر ہو چکا ہے ویراں بھی
کھنڈر سے ہوتے مکانات سے نکلنا ہے
امتیاز علی
یوم پیدائش 23 مارچ 1967
اَلْنَّجْمُ الْثَاقِب ( چمکتا ہوا ستارہ )
صلیّ اللّٰہ علیہ و آلہٖ وسلم
اِک ترا نقش ہی شہکار ہے، نجمِ ثاقب
باقی بازیچۂ اظہار ہے، نجمِ ثاقب
طاقِ چشمانِ تمنّا سے ترا اسمِ منیر
مطلعِ دل پہ ضیا بار ہے، نجمِ ثاقب
تُو فلک زارِ معلّٰی پہ ہے ہر سو روشن
تُو زمیں کا گُلِ بے خار ہے، نجمِ ثاقب
تیرے آثار ہی تاباں ہیں سرِ بامِ یقیں
ما سوا خواب کا انبار ہے، نجمِ ثاقب
تُو جو چاہے تو پسِ صورتِ احوال نہ ہو
یہ جو تشویشِ دلِ زار ہے، نجمِ ثاقب
وہ جو جبریل نے دیکھا تھا ہزاروں برسوں
تُو وہی مہبطِ انوار ہے، نجمِ ثاقب
ہے سرِ دید و پسِ دید ترا نور عیاں
ورنہ دیوار ہی دیوار ہے، نجمِ ثاقب
جس طرف دستِ عنایت ہے ترا خیر فشاں
اُس طرف کاسۂ نادار ہے، نجمِ ثاقب
ساعتِ نغمۂ مدحت ہے سکوں زا، ورنہ
زندگی نوحۂ ادبار ہے، نجمِ ثاقب
ہم نہیں ہوں گے سپردِ شبِ ظلمت مقصود
للّہِ الحمد، نگہدار ہے، نجمِ ثاقب
مقصود شاہ
یوم پیدائش 23 مارچ 1940
زندگی بھر تو سدا جبر سہے صبر کیے
موت کے بعد مجھے کیا جو مری قبر جیے
کھولتے لاوے کے مانند ابلتا ہے دماغ
جب یہ حالت ہو تو کب تک کوئی ہونٹوں کو سیے
جسم زخمی ہو تو سینا بھی اسے ممکن ہے
روح پر زخم لگے ہوں تو انہیں کون سیے
راہرو راہ میں کیڑوں کی طرح رینگتے رہیں
راہ بر اونچی ہواؤں میں ہیں پلکوں کو سیے
وہ اگر چاہیں تو تقدیر بدل سکتی ہے
پر نہیں ان کو غرض کوئی مرے کوئی جیے
روشنی دور بہت دور ہے پھر بھی ہم سے
جگمگاتے ہیں افق تا بہ افق لاکھوں دیے
کیسے زندہ ہوں ابھی تک نہیں سمجھا خود بھی
زخم کھائے ہیں بہت میں نے بہت زہر پیے
خواجہ محمد زکریا
یوم پیدائش 22 مارچ 1933
ایک رنگین کہانی ہے ترے شہر کی رات
ہائے یہ کس کی جوانی ہے ترے شہر کی رات
بس یوں ہی زلف بکھیرے ہوئے آ جا اے دوست
آج کس درجہ سہانی ہے ترے شہر کی رات
ریگزار دل شاعر کے لئے جان غزل
موج دریا کی روانی ہے ترے شہر کی رات
دل کی اس کہر زدہ یاس بھری بستی میں
تجھ سے ہی مانگ کے لانی ہے ترے شہر کی رات
بار ہو جائے گا ذہنوں پہ تصور دن کا
آج اس طرح جگانی ہے ترے شہر کی رات
وہ نہیں ہے تو غمستان تخیل کی قسم
ہوشؔ افسردہ کہانی ہے ترے شہر کی رات
ہوش نعمانی رامپوری
یوم پیدائش 22 مارچ 1929
اک حسنِ دل نوار کو کیا کیا کہا گیا
شبنم کہا گیا کبھی شعلہ کہا گیا
اہلِ ادب کی دیکھیے جدّت طرازیاں
پھولوں کی اک نقاب کو سہرا کہا گیا
اہل جنونِ شوق بھی کتنے عجیب ہیں
تم مسکرا دیئے ہو تو مژدہ کہا گیا
اجداد کی حیات کی تفسیر تھی جسے
تہذیب کی زبان میں شجرہ کہا گیا
مطرب حدیث شوق کا یہ بھی تو ہے عروج
جلوؤں کو حسنِ یار کا پردہ کہا گیا
مطرب بلیاوی
یوم پیدائش 22 مارچ 1937
سفر میں ایسے کئی مرحلے بھی آتے ہیں
ہر ایک موڑ پہ کچھ لوگ چھوٹ جاتے ہیں
یہ جان کر بھی کہ پتھر ہر ایک ہاتھ میں ہے
جیالے لوگ ہیں شیشوں کے گھر بناتے ہیں
جو رہنے والے ہیں لوگ ان کو گھر نہیں دیتے
جو رہنے والا نہیں اس کے گھر بناتے ہیں
جنہیں یہ فکر نہیں سر رہے رہے نہ رہے
وہ سچ ہی کہتے ہیں جب بولنے پہ آتے ہیں
کبھی جو بات کہی تھی ترے تعلق سے
اب اس کے بھی کئی مطلب نکالے جاتے ہیں
عابد ادیب
یوم پیدائش 21 مارچ 1938
صرف آغوشِ چمن تک ہی نہیں اپنا قیام
ہم ہیں خوشبو ، خوشبوؤں کو قید کر پاؤ گے کیا
رحمت جمال
یوم پیدائش 21 مارچ 1941
میری ماں نے مجھے بتایا ہے
اگلے وقتوں کے صاحبان دول
جو خداوند کی مشیت سے
عمر بھر لا ولد رہا کرتے
یہ عجب کار خیر فرماتے
اپنی دولت کو ایک برتن میں
بند کر کے کہیں دبا دیتے
اس پہ آٹے یا چکنی مٹی کا
سانپ ضامن بنا کے رکھ دیتے
تاکہ آئندہ کوئی شخص اگر
ان کی دولت کی سمت آنکھ اٹھائے
یہ خزانے کا سانپ لہرا کر
اس کی اولاد بھینٹ میں چاہے
لوگ اولاد بھینٹ دیتے تھے
اور یہ مال کھود لیتے تھے
میری ماں نے مجھے بتایا ہے
میرے ناپختہ گھر کے آنگن میں
ایسا ہی مال دفن تھا شاید
اور یہ مال یوں ہی دفن رہا
یا کسی اور گھر میں جا پہنچا
میری ماں نے مجھے نہ بھینٹ دیا
اور وہ مال ہاتھ سے کھویا
میری ماں بھی عجیب عورت ہے
اپنی ماں سے یہ واقعہ سن کر
پہلے مجھ کو یقیں نہ آتا تھا
میں نے افسانہ اس کو سمجھا تھا
پر یہ افسانہ اک حقیقت تھا
پر یہ افسانہ اک حقیقت ہے
میں نے شاداب کھیتیاں دیکھیں
میں نے مل دیکھے بنک بھی دیکھے
میں نے دیکھا کہ مال و دولت کے
ہر خزانے پہ ہر جگہ ہر پل
اک نہ اک سانپ بیٹھا رہتا ہے
سردار نقوی
یوم پیدائش 21 مارچ 1944
زیرِ زمیں کھلے کہ تہِ آسماں کھلے
میرے خدا کہیں تومری داستاں کھلے
کھلتا نہیں ہے بیٹھے بٹھائے کوئی یہاں
ہم نے زمین اوڑھ لی تب آسماں کھلے
مدت ہوئی ہے دونوں کو بچھڑے ہوئے مگر
اب تک نہ ہم یہاں نہ وہ ابتک وہاں کھلے
وہ شہرِ دوستاں ہو کہ شہرِ ستم شعار
آوارگانِ عشق کسی پر کہاں کھلے
اب تک تو شہر مہر بلب ہے مرا سعید
شاید ستم کچھ اور بڑھے تو زباں کھلے
سعید الظفر صدیقی
یوم پیدائش 21 مارچ
ہمنوا ہے، نہ ہمدم نہ درد آشنا، اس جہاں میں کوئی میرا اپنا نہیں
ہر کسی نے مجھے صرف دھوکا دیا، اب کسی پر بھی مجھ کو بھروسہ نہیں
سوزشیں، رتجگے، سسکیوں کے سوا اور کیا اب تلک زندگی نے دیا
غم مسلسل مقرب رہے عمر بھر رشتہ خوشیوں نے بھی تو بنایا نہیں
حق ہمیشہ سے میرا ہی مارا گیا، میرا سایہ تلک مجھ سے چھینا گیا
روشنی ہر کسی کو ملی ہے تو پھر میری قسمت میں ہی کیوں اجالا نہیں
منہ زبانی جتاتے ہیں ہمدردیاں، ڈوبتے کو بچاتا نہیں اب کوئی
ہائے مرنا بھی جیسے تماشا ہوا، کیوں مدد کے لئے کوئی آتا نہیں
میری راہوں میں کانٹے بچھائے گئے، تیر و نشتر مجھی پر چلائے گئے
میں کہ ایماں کی دولت سے سرشار تھا، صبر کا راستہ میں نے چھوڑا نہیں
عشق سچا اگر ہو تو صدیوں تلک یہ جہاں یاد رکھتا ہے دل والوں کو
زندہ ہے قیس و لیلیٰ کے قصے ابھی، ہیر رانجھا کو جگ نے بھلایا نہیں
شاؔد اچھلتی رہی اور سنبھلتی رہی، کشتیءِ زیست طوفاں سے لڑتی رہی
عزم و ہمت سے میں نے کیا سامنا، ہو مصیبت کوئی ڈر کے بھاگا نہیں
شمشاد شاؔد
یوم پیدائش 21 مارچ 1925
وہ کسی سے تم کو جو ربط تھا تمہیں یاد ہو کہ نہ یاد ہو
وہ کسی پہ تھا کوئی مبتلا تمہیں یاد ہو کہ نہ یاد ہو
کبھی ہم میں تم میں بھی پیار تھا تمہیں یاد ہو کہ نہ یاد ہو
کبھی ہم بھی تم بھی تھے ایک جا تمہیں یاد ہو کہ نہ یاد ہو
وہ بنانا چہرہ عتاب کا وہ نہ دینا منہ سے جواب کا
وہ کسی کی منت و التجا تمہیں یاد ہو کہ نہ یاد ہو
تمہیں جس کی چاہ پہ ناز تھا جو تمھارا محرم راز تھا
میں وہی ہوں عاشق باوفا تمہیں یاد ہو کہ نہ یاد ہو
کبھی ہم میں تم میں بھی ساز تھے کبھی ہم بھی وقف نیاز تھے
ہمیں یاد تھا سو جتا دیا تمہیں یاد ہو کہ نہ یاد ہو
کبھی بولنا وہ خفا خفا کبھی بیٹھنا وہ جدا جدا
وہ زمانہ ناز و نیاز کا تمہیں یاد ہو کہ نہ یاد ہو
ابھی تھوڑے دن کا ہے تذکرہ کہ رقیب کہتے تھے برملا
مرے آگے تم کو برا بھلا تمہیں یاد ہو کہ نہ یاد ہو
کبھی ہنس کے منہ کو چھپا لیا کبھی مسکرا کے دکھا دیا
کبھی شوخیاں تھیں کبھی حیا تمہیں یاد ہو کہ نہ یاد ہو
جو بنا ہے عارف با خدا یہ وہی ظہیرؔ ہے بے حیا
وہ جو رند خانہ بدوش تھا تمہیں یاد ہو کہ نہ یاد ہو
ظہیرؔ دہلوی
یوم پیدائش 19 مارچ 1937
آؤ ہم تم عشق کے اظہار کی باتیں کریں
ڈال کر بانہوں میں باہیں پیار کی باتیں کریں
پھول کی باتیں کریں گلزار کی باتیں کریں
پیار کی باتیں کریں بس پیار کی باتیں کریں
بات ہم دونوں کو یہ تو سوچنی ہی چاہئے
پیار کے موسم میں کیوں تکرار کی باتیں کریں
اس سے اچھی بات کوئی اور ہو سکتی نہیں
یار کا افسانہ چھیڑیں یار کی باتیں کریں
کاش بچپن لوٹ آئے اور ہم سب بیٹھ کر
کچی مٹی کے در و دیوار کی باتیں کریں
شکریہ بازاریت کی روشنی کا شکریہ
گاؤں کی پگڈنڈیاں بازار کی باتیں کریں
کعبہ و کاشی کے قصے ہو چکے اب بس کرو
آؤ قیصرؔ نقش پائے یار کی باتیں کریں
قیصر صدیقی
یوم پیدائش 20 مارچ 2001
سب کا اک انتخاب ہو جیسے
تم ہی عزت مآب ہو جیسے
تیرے جذبات خود بتاتے ہیں
تجھ میں چڑھتا شباب ہو جیسے
یوں جو کرتے ہو تم جناب جناب
کوئی اعلیٰ خطاب ہو جیسے
اس قدر خود پہ ناز کرتے ہو
اک تمہی کامیاب ہو جیسے
آتی رہتی ہے ہر گھڑی ہرپل
یاد تیری ثواب ہو جیسے
میری ہستی میں آپ کی یاری
باعثِ انقلاب ہو جیسے
آپ کا یہ حسین سا چہرہ
کوئی کھلتا گلاب ہو جیسے
دور ہی سے سلام کرتے ہو
میری عادت خراب ہو جیسے
تیری دلکش حسین چشمِ تر
کوئی جامِ شراب ہو جیسے
ایسا لگتا ہے آپ کو مجھ سے
عاشقی بےحساب ہو جیسے
تیری فرقت میں ایسا لگتا ہے
زندگانی عذاب ہو جیسے
اس کا چہرہ میں پڑھتا ہوں نازاؔں
حسن کی اک کتاب ہو جیسے
صدام حسین نازاں
یوم پیدائش 20 مارچ 1951
کوئی درخت کوئی سائباں رہے نہ رہے
بزرگ زندہ رہیں آسماں رہے نہ رہے
کوئی تو دے گا صدا حرف حق کی دنیا میں
ہمارے منہ میں ہماری زباں رہے نہ رہے
ہمیں تو پڑھنا ہے میدان جنگ میں بھی نماز
مؤذنوں کے لبوں پر اذاں رہے نہ رہے
ہمیں تو لڑنا ہے دنیا میں ظالموں کے خلاف
قلم رہے کوئی تیر و کماں رہے نہ رہے
یہ اقتدار کے بھوکے یہ رشوتوں کے وزیر
بلا سے ان کا یہ ہندوستاں رہے نہ رہے
خدا کرے گا سمندر میں رہنمائی بھی
یہ ناؤ باقی رہے بادباں رہے نہ رہے
رئیس انصاری
یوم وفات 19 مارچ 1962
دم اخیر بھی ہم نے زباں سے کچھ نہ کہا
جہاں سے اٹھ گئے اہل جہاں سے کچھ نہ کہا
چلی جو کشتئ عمر رواں تو چلنے دی
رکی تو کشتئ عمر رواں سے کچھ نہ کہا
خطائے عشق کی اتنی سزا ہی کافی تھی
بدل کے رہ گئے تیور زباں سے کچھ نہ کہا
بلا سے خاک ہوا جل کے آشیاں اپنا
تڑپ کے رہ گئے برق تپاں سے کچھ نہ کہا
گلہ کیا نہ کبھی ان سے بے وفائی کا
زباں تھی لاکھ دہن میں زباں سے کچھ نہ کہا
خوشی سے رنج سہے نازؔ عمر بھر ہم نے
خدا گواہ کبھی آسماں سے کچھ نہ کہا
شیر سنگھ ناز دہلوی
یوم پیدائش 19 مارچ 1917
چھیڑ کر تذکرۂ دور جوانی رویا
رات یاروں کو سنا کر میں کہانی رویا
ذکر تھا کوچہ و بازار کے ہنگاموں کا
جانے کیا سوچ کے وہ یوسف ثانی رویا
غیرت عشق نے کیا کیا نہ بہائے آنسو
سن کے باتیں تری غیروں کی زبانی رویا
جب بھی دیکھی ہے کسی چہرے پہ اک تازہ بہار
دیکھ کر میں تری تصویر پرانی رویا
چشم ارباب وفا ہے جو لہو روتی ہے
غیر پھر غیر ہے رویا بھی تو پانی رویا
تیری مہکی ہوئی سانسوں کی لویں یاد آئیں
آج تو دیکھ کے میں صبح سہانی رویا
اے وطن جب بھی سر دشت کوئی پھول کھلا
دیکھ کر تیرے شہیدوں کی نشانی رویا
جعفر طاہر
یوم پیدائش 17 مارچ 1962
میں روز صحن سے پتے سمیٹتا جاؤں
لگا گیا ہے کوئی اک شجر اداسی کا
نصیر وارثی
یوم پیدائش 18مارچ 1916
اچھی نہیں ہمیشہ حقیقت کی بات چیت
کرتے ہیں لوگ اس سے شرارت کی بات چیت
مومن ہلاک لذت افطار ہو گیا
لیکن زباں پہ اس کی ہے جنت کی بات چیت
وہ آئے جب تو بحث کا نقشہ بدل گیا
کل سے چھڑی ہوئی تھی حماقت کی بات چیت
ہر روزہ دار مفتی اسلام ہوگیا
ہر مسئلہ میں کرتا ہے جنت کی بات چیت
روزہ میں کھل کے ہوتی ہے دو مفتیوں میں جنگ
اور اس کے بعد صاف جہالت کی بات چیت
کرتے ہیں ضبط غصہ کو دونوں بجبر وقہر
رہ جاتی ہے ادھوری شجاعت کی بات چیت
مغرب کے بعد چھڑتی ہے پھر ٹھنڈی ٹھنڈی جنگ
ہوتی ہے سرد سرد امامت کی بات چیت
ایسے بھی خال خال ہیں جن سے اگر ملو
کرتے ہیں کچھ شگفتہ طبیعت کی بات چیت
رکھتے ہیں وہ بلندئ گفتار فطرتاً
شکوے کا شائبہ نہ شکایت کی بات چیت
دشمن کے نام کو بھی وہ لیتے ہیں اس طرح
اڑ جاتی ہے ہوا میں عداوت کی بات چیت
اور ایسے روزہ دار بھی ملتے ہیں صبح وشام
ہوتی ہے جن کے انس میں وحشت کی بات چیت
ذکر عذاب قبر زباں پر ہے رات دن
ملتے ہی چھیڑتے ہیں قیامت کی بات چیت
واقف آروی
یوم پیدائش 17 مارچ 1953
فلک پہ مہرِ درخشاں ، زمیں پہ کھلتے گلاب
ہمارے حال پہ تادیر مسکرا نہ سکے
مختار مشرقی
یوم پیدائش 17 مارچ 1909
کچھ ایسی محبت ہے ہمیں گنگ و جمن سے
مرکر بھی جدا ہوں گے نہ ہم اپنے وطن سے
جلنے پہ بھی ہر بار بنائیں گے نشیمن
حق دارِ چمن جا نہیں سکتے ہیں چمن سے
کلیم فیض آبادی
یوم پیدائش 16 مارچ 1972
اب کون زندگی کا طلبگار ہے یہاں
ہر شخص خود سے برسر پیکار ہے یہاں
رشتوں کی پاسداری رکھے کون دہر میں
جب آدمی سے آدمی بیزار ہے یہاں
اپنی جڑوں کو کھوجتے گزری تمام عمر
پھل پھول کی تو بات ہی بیکار ہے یہاں
دستار کی فضیلتیں اپنی جگہ مگر
بے سر کا آدمی بھی سر دار ہے یہاں
سانسوں سے رشتہ توڑ لیا تو نے تو مگر
اب کون زندگی ترا غمخوار ہے یہاں
ساقی نہ تیرے جام و سبو معتبر رہے
ہوش و حواس میں ابھی میخوار ہے یہاں
تنہا سفر کی جھیل نہ پائے صعوبتیں
پھر آدمی کو قافلہ درکار ہے یہاں
چہرے چھپائے پھرتے مکھوٹوں سے ہیں سبھی
اب کون شخص آئینہ بردار ہے یہاں
اشفاق فکر کون ترا دیکھتا ہے اب
بے بحر شاعری میاں شہکار ہے یہاں
اشفاق اسانغنی
یوم پیدائش 16 مارچ 1935
اٹھ کے محفل سے مت چلے جانا
تم سے روشن یہ کونا کونا ہے
واجدہ تبسم
غزل
مہماں ہوۓ ہیں آج وہ گھر مدتوں کے بعد
آہوں میں آگیا ہے اثر مدتوں کے بعد
پوشیدہ ان کو رکھا ہے پتلی میں آنکھ کی
دیکھا ہے ان کو بارِ دگر مدتوں کے بعد
معکوس آئینہ بھی ہے قلب و نظر بھی ہیں
دیکھی گئ ہے ایسی نظر مدتوں کے بعد
واجدہ تبسمؔ
یوم پیدائش 16 مارچ 1941
قطرہ قطرہ تری پلکوں سے اٹھانا چاہوں
ہرطرح پیاس صدف کی میں بجھانا چاہوں
میں اک آنسو جسے پلکوں پہ نہ لانا چاہوں
تو ہے نغمہ تجھے ہونٹوں پہ سجانا چاہوں تو
کئی چہرے ابھر آتے ہیں سیر جادۂ شوق
کوئی اک چہرہ اگر بھول بھی جانا چاہوں
تیرا لہجہ ہی کچھ ایسا ، کہ یقیں آجائے
میں تری باتوں میں ہر چند نہ آنا چاہوں
آہ وہ شخص، اسے دیکھ لیا ہے جب سے
آنکھیں سوتی ہی نہیں لاکھ سلانا چاہوں
میرے ہونٹوں پہ کوئی انگلیاں رکھ دیتا ہے
اب جو سچ بات بھی یاروں کو بتانا چاہوں
وہی انداز پرانا ، وہ جہاں مل جائے
وہی بھولا ہوا افسانہ سنانا چاہوں
میں ہو کہدوں کہ جو تم ہو وہ نہیں ہو، تو ہنسو
روٹ جاؤ جو یہی بات چھپانا چاہوں
روٹھنے لگتی ہیں یہ تازہ ہوا میں افسر
جب بھی گھر کی کوئی دیوار اٹھانا چاہوں
خورشید افسر بسوانی
یوم پیدائش 15 مارچ 1959
ہر سانس ہے کراہ مگر تم کو اس سے کیا
ہو زندگی تباہ مگر تم کو اس سے کیا
تم ہو سہیلیوں میں مگن اور میرا حال
تنہائی بے پناہ مگر تم کو اس سے کیا
تم تو ہر ایک بات پہ دل کھول کر ہنسو
بھرتا ہے کوئی آہ مگر تم کو اس سے کیا
منزل ملی نہ ساتھ تمہارا ہوا نصیب
کھوئی ہے میں نے راہ مگر تم کو اس سے کیا
سیلاب میں سروں کی فصیلیں بھی بہہ گئیں
بے جرم بے گناہ مگر تم کو اس سے کیا
اب زندگی کی مانگتے ہیں بھیک در بہ در
شاہانِ کج کلاہ مگر تم کو اس سے کیا
رفیق احمد نقشؔ
یوم پیدائش 15 مارچ 1949
آنکھوں سے وہ کبھی مری اوجھل نہیں رہا
غافل میں اس کی یاد سے اک پل نہیں رہا
کیا ہے جو اس نے دور بسا لی ہیں بستیاں
آخر مرا دماغ بھی اول نہیں رہا
لاؤ تو سرّ دہر کے مفہوم کی خبر
عقدہ اگرچہ کوئی بھی مہمل نہیں رہا
شاید نہ پا سکوں میں سراغ دیار شوق
قبلہ درست کرنے کا کس بل نہیں رہا
دشت فنا میں دیکھا مساوات کا عروج
اشرف نہیں رہا کوئی اسفل نہیں رہا
ہے جس کا تخت سجدہ گہہ خاص و عام شہر
میں اس سے ملنے کے لیے بے کل نہیں رہا
جس دم جہاں سے ڈولتی ڈولی ہی اٹھ گئی
طبل و علم تو کیا کوئی منڈل نہیں رہا
سعادت سعید
یوم پیدائش 28 فروری 1902 غیر کے خط میں مجھے ان کے پیام آتے ہیں کوئی مانے کہ نہ مانے مرے نام آتے ہیں عافیت کوش مسافر جنھیں منزل سمجھیں عشق...
