سوئے مے کدہ نہ جاتے تو کچھ اور بات ہوتی
وہ نگاہ سے پلاتے تو کچھ اور بات ہوتی
گو ہوائے گلستاں نے مرے دل کی لاج رکھ لی
وہ نقاب خود اٹھاتے تو کچھ اور بات ہوتی
یہ بجا کلی نے کھل کر کیا گلستاں معطر
اگر آپ مسکراتے تو کچھ اور بات ہوتی
یہ کھلے کھلے سے گیسو انہیں لاکھ تو سنوارے
مرے ہاتھ سے سنورتے تو کچھ اور بات ہوتی
گو حرم کے راستے سے وہ پہنچ گئے خدا تک
تری رہ گزر سے جاتے تو کچھ اور بات ہوتی
آغا حشر کاشمیری
یوم پیدائش 01 اپریل 1954
جب اسے راستہ دکھائی نہ دے
آنکھ والے کی رہنمائی نہ دے
چھین لے مجھ سے چاہے سب دولت
مفت میں ایسی جگ ہنسائی نہ دے
میں بھلا، اپنی خصلتوں میں بھلا
مجھ کو بے داغ پارسائی نہ دے
بے سکوں ہے یہ نامراد ابھی
درد سے گہری آشنائی نہ دے
ٹانگا ڈولی جو کر کے لے جائیں
ٹوٹی پھوٹی وہ چار پائی نہ دے
تو ہی کافی ہے اور یہ فرعون!
میرے مولا مجھے خدائی نہ دے
میری دنیا ہے چھوٹی سی "تشنہ"
دعوتِ جشنِ اجتماعی نہ دے
مسعود بیگ تشنہ
یوم پیدائش 01 اپریل
اک ادائے خوش نما زنجیر کیسے ہو گئی ؟
روشنی کی زلف یوں دل گیر کیسے ہو گئی ؟
میرے اللہ! تجھ کو مجھ پہ پیار کتنا آ گیا
اک ذرا سی آہ میـں تاثیر کیسے ہو گئی ؟
تیرے دل کے چور مجھ پہ سارے کیسے کُھل گئے
ہائے ! نادانی مِری تقصیر کیسے ہو گئی ؟
سارے وعدے ایسے کیسے پانیوں پہ بَہہ گئے
چاہِ یوسُف کی صدا تحریر کیسے ہو گئی ؟
دل سمَجھنے سے ہے قاصِر' اک جدائی کی خبر
مسئَلہ کیوں بن گئی ؟ گمبھیر کیسے ہو گئی ؟
وقت کی اک چال سے سب برملا کہنے لگے
بے صدا لاٹھی تھی جو' وہ تیر کیسے ہو گئی ؟
سعدیہؔ بشـیر
یوم پیدائش 01 اپریل 1936
یوں توڑ نہ مدت کی شناسائی ادھر آ
آ جا مری روٹھی ہوئی تنہائی ادھر آ
مجھ کو بھی یہ لمحوں کا سفر چاٹ رہا ہے
مل بانٹ کے رو لیں اے مرے بھائی ادھر آ
اے سیل روان ابدی زندگی نامی
میں کون سا پابند ہوں ہرجائی ادھر آ
اس نکہت و رعنائی سے کھائے ہیں کئی زخم
اے تو کہ نہیں نکہت و رعنائی ادھر آ
اعصاب کھنچے جاتے ہیں اب شام و سحر میں
ہونے ہی کو ہے معرکہ آرائی ادھر آ
سنتا ہوں کہ تجھ کو بھی زمانے سے گلہ ہے
مجھ کو بھی یہ دنیا نہیں راس آئی ادھر آ
میں راہ نماؤں میں نہیں مان مری بات
میں بھی ہوں اسی دشت کا سودائی ادھر آ
مظفر حنفی
خودخدا محبت ہے
گھر کے سُونے آنگن میں
رونقیں محبت سے
دِل کی ویراں بستی میں
راحتیں محبت سے
بزمِ کیف و مستی کی
شدتیں محبت سے
تیرے میرے جذبوں کی
حِدتیں محبت سے
مامتا کے ہونٹوں پر
اِک دعا محبت ہے
باپ کے بڑھاپے کا
آسرا محبت ہے
ظلمتوں کی بستی میں
اِک دِیا محبت ہے
زہر کے پیالے کا
فلسفہ محبت ہے
سُولیوں پہ چڑھنے کا
سِلسلہ محبت ہے
سجدہ گاہِ مقتل کی
ہر دُعا محبت ہے
رزمِ حق و باطل میں
کربلاؔ محبت ہے
مُنکرِ محبت سُن!
خود خُدا محبت ہے
اس جیسا یہاں کوئی بھی فن کار نہیں ہے
قاتل ہے مگر ہاتھ میں تلوار نہیں ہے
اٹھوں گا مگر صبح تو ہونے دے مؤذن
سونے کے لئے نیند بھی درکار نہیں ہے
یوں ہے کہ فقط دیکھ کے ہوتی ہے تسلی
معمولی کوئی نقش یا دیوار نہیں ہے
درد دل مجروح کوئی سمجھے تو کیسے
اس شہر میں مجھ سا کوئی بیمار نہیں ہے
ہاتھوں میں لئے ہاتھ گزرتے رہے ہم دو
پھر جا کے ہوا علم مجھے پیار نہیں ہے
تصویر تری آنکھ ملاتی رہی دن بھر
پر ہاتھ ملانے کو یہ تیار نہیں ہے
احمد صدیقی
یوم پیدائش 31 مارچ 1973
انکار ہی کر دیجیے اقرار نہیں تو
الجھن ہی میں مر جائے گا بیمار نہیں تو
لگتا ہے کہ پنجرے میں ہوں دنیا میں نہیں ہوں
دو روز سے دیکھا کوئی اخبار نہیں تو
دنیا ہمیں نابود ہی کر ڈالے گی اک دن
ہم ہوں گے اگر اب بھی خبردار نہیں تو
کچھ تو رہے اسلاف کی تہذیب کی خوشبو
ٹوپی ہی لگا لیجیے دستار نہیں تو
ہم برسر پیکار ستم گر سے ہمیشہ
رکھتے ہیں قلم ہاتھ میں تلوار نہیں تو
بھائی کو ہے بھائی پہ بھروسہ تو بھلا ہے
آنگن میں بھی اٹھ جائے گی دیوار نہیں تو
بے سود ہر اک قول ہر اک شعر ہے راغبؔ
گر اس کے موافق ترا کردار نہیں تو
افتخار راغب
یوم پیدائش 31 مارچ 1930
ابھی رنج سفر کی ابتدا ہے
ابھی سے جی بہت گھبرا رہا ہے
دئے بجھنے لگے ہیں طاقچوں میں
ہر اک شے پر اندھیرا چھا رہا ہے
ہوا شاخوں میں چھپ کر رو رہی ہے
نہ جانے کیسا موسم آ رہا ہے
ٹھٹھرتی رت میں زخمی انگلیوں سے
ہمیں دریا میں سونا ڈھونڈھنا ہے
اسی امید پر بن باس کاٹیں
ہمیں بھی ایک دن گھر لوٹنا ہے
بہت چاہوں کہ میں بھی ہاتھ اٹھاؤں
مرے ہونٹوں پہ لیکن بد دعا ہے
احمد شمیم
یوم پیدائش 29 مارچ
پس یقیں کہیں ہم بھی ترے گمان میں ہیں
ترا نشاں ہیں یہ تارے جو آسمان میں ہیں
حرم سرا تھا ترا دل سو چھوڑ آئے اسے
وگرنہ کہنے کو اب بھی اسی مکان میں ہیں
مرے نصیب کے خوش رنگ خواب اور سراب
نہ اس جہان میں تھے اور نہ اس جہان میں ہیں
میں اپنے واسطے ان میں سے خود ہی چن لوں گی
وہ سانحے جو میسر تری دکان میں ہیں
سراب ہیں یہ تمہارے سب آئنہ خانے
بصارتیں بھی نہ جانے کس امتحان میں ہیں
کبھی وہ آئنہ چشم میں سنورتے تھے
وہ سارے خواب نصابوں کے جو بیان میں ہیں
نہ جانے لائیں گے دل پر تباہیاں کیا کیا
وہ حادثے جو ابھی تک تری کمان میں ہیں
یہ پل صراط کہاں لے چلا ہمیں انجمؔ
نہ ہم زمیں کے رہے اور نہ آسمان میں ہیں
انجم عثمان
سب سے افضل بشر آپؐ ہیں آپؐ ہیں
خوب سے خوب تر آپ ؐہیں آپؐ ہیں
مسکراکر صحابہ یہ کہتے رہے
یا نبی ہمسفر آپؐ ہیں آپؐ ہیں
آپ ؐکی یاد ہے آپ ؐکا ذکر ہے
لب پہ شام و سحر آپؐ ہیں آپؐ ہیں
آپؐ کی ذاتِ اقدس ہے خود معجزہ
دوجہاں میں امر آپؐ ہیں آپؐ ہیں
آپؐ کا واسطہ رب کو منظور ہے
ہر دُعا کا اثر آپؐ ہیں آپؐ ہیں
قافیے نور کے، نوری ہر اک ردیف
شاعری کا ثمر آپؐ ہیں آپؐ ہیں
یہ علی کا وظیفہ رہے یا نبیؐ
میں کہوں عمر بھر آپؐ ہیں آپؐ ہیں
صلی اللہ علیہ وسلم
پیر محمد علی نعیمی
پل بھر کو میرے خواب میں آ کر چلا گیا
اک شخص میری نیند اڑا کر چلا گیا
ممکن ہے واپسی نہ تو آگے ہے راستہ
تو مجھ کو کیسے موڑ پہ لا کر چلا گیا
نفرت سی ہو گئی ہے مجھے اپنی شکل سے
آئینہ کوئی ایسے دکھا کر چلا گیا
وہ مجھ کو جان سے بھی زیادہ عزیز تھا
جو مجھ سے اپنی جان چھڑا کر چلا گیا
اشکوں کی بارشیں بھی بجھا پائیں نہ جسے
وہ ایسی آگ دل میں لگا کر چلا گیا
اسکی جدائی نے نہ رکھا کام کا مجھے
کچھ دن جو مجھ سے پیار جتا کر چلا گیا
ہنستے تھے اس کے حال پہ سب لوگ ہی مگر
یاسین آج سب کو رلا کر چلا
یاسین باوزیر
ہمیں لوگ کیوں کر گدا سوچتے ہیں
مگر یہ حقیقت بجا سوچتے ہیں
ستائش کریں گی، تمنا کسے ہے
تغافل کریں گے بھلا سوچتے ہیں
رہے عرش سے فرش تک بول بالا
فدا جان اپنی خدا سوچتے ہیں
ہمیں فکر تیری شب و روز رہتی
عجب ہے مگر وہ برا سوچتے ہیں
عداوت سہی ہے مگر دشمنوں سے
کروں کوچ پاشا جیا سوچتے ہیں
ہوئیں دھڑکنیں کب بتا تیز یاور
بھلا سوچتے ہی فنا سوچتے ہیں
یاور حبیب ڈار
نظم
تیرے چہرے پہ پڑے درد کے وحشی دھبے
قصہ بتلاتے ہیں حالات کی تنگ دستی کا
کیسے پاتے ہیں نمو زیست میں جاں لیوا عذاب
پھیکا پڑ جاتا ہے کس واسطے رنگ ہستی کا
کیسے دب جاتا ہے غربت سے محبت کا گلا
ہجر کھا جاتا ہے کسطرح سے چہرے کے نقوش
حال بتلاتے ہیں شکنوں میں دبے رنج و الم
کتنا پر نور تھا چہرہ کیسے گہرے تھے نقوش
لوگ کہتے ہیں کہ دن رات بدل جاتے ہیں
وقت جب بدلے تو حالات بدل جاتے ہیں
آ ہی جاتا ہے سکون ایک دریدہ دل کو
فلسفے ، سوچ و خیالات بدل جاتے ہیں
عزم پختہ ہو اگر حوصلہ اقبال سا ہو
تو کنول کتنے ہی تالاب میں کھل جاتے ہیں
اک سمندر میں پناہ لیتے ہیں کتنے دریا
کتنے سورج ہیں جو اک شام میں ڈھل جاتے ہیں
عمیر ساحل
کتنے ہی گھٹا ٹوپ اندھیرے مرے آقاﷺ
ہونے نہیں دیتے ہیں سویرے مرے آقاﷺ
اشراف سبھی اپنے ضمیروں میں ہوئے قید
پھرتے ہیں کُھلے عام لُٹیرے مرے آقاﷺ
انسان تو پیدائشی آذاد تھا پھر کیوں ؟
قابض ہیں ابھی تک یہ وڈیرے مرے آقاﷺ
اپنوں میں وہی خوئے ابو جہل بہر طور
ظالم کے حواری ہیں چچیرے مرے آقاﷺ
دھرتی بھی ترے ﷺ نقش ِکف ِ پا سے مزیّن
اور عرش پہ بھی تیرے بسیرے مرے آقاﷺ
یہ دھیان اگر تیرا سمیٹے نہ مجھے تو
یہ گردش ِ غم کتنا بکھیرے مرے آقاﷺ
جاوید رامشؔ
ایک چہرہ کل سے آنکھوں میں سمایا ساقیا
ایک مدت بعد جس نے ہے سلایا ساقیا
کیا لکھوں تعریف میں اس مہ جبیں کے حسن کی
خوب فرصت سے جسے رب نے بنایا ساقیا
اس کی آنکھیں جھیل سی تھیں ڈوبنے کو من کیا
مجھ کو آکر کس لئے تو نے بچایا ساقیا
ہونٹ اس کے سرخی مائل پھول سا نازک مزاج
مجھ کو آکر تتلیوں نے سب بتایا ساقیا
جب سے اس کو دیکھا ہے، مجھ کو نہ جانے کیا ہوا
بھول بیٹھا ہوں میں اپنا اور پرایا ساقیا
بھول جانا یادِ ماضی کتنا مشکل تھا مگر
بھول جانے کا ہنر اس نے سکھایا ساقیا
اسامہ بابر ماحی
یوم پیدائش 27 مارچ 1918
ہٹ جائیں اب یہ شمس و قمر درمیان سے
میری زمیں ملے گی گلے آسمان سے
سینے میں ہیں خلا کے وہ محفوظ آج بھی
جو حرف ادا ہوئے ہیں ہماری زبان سے
وہ میرے ہی قبیلے کا باغی نہ ہو کہیں
اک تیر ادھر کو آیا ہے جس کی کمان سے
صیاد نے کیا ہے اسی کو اسیر دام
طائر جو دل گرفتہ رہا ہے اڑان سے
ناکامیوں نے اور بڑھائے ہیں حوصلے
گزرا ہوں جب کبھی میں کسی امتحان سے
کہلائے جس میں رہ کے ہمیشہ کرایہ دار
کیا انس ہو مکین کو ایسے مکان سے
کیوں پیروی پہ ان کی ہو مائل مرا دماغ
غالبؔ کے ہوں نہ میرؔ کے میں خاندان سے
راغبؔ بہ احتیاط ہی لازم ہے گفتگو
دشمن کو بھی گزند نہ پہنچے زبان سے
راغب مرادآبادی
یوم پیدائش 27 مارچ 1920
وہ حسرت بہار نہ طوفان زندگی
آتا ہے پھر رلانے کو ابر بہار کیوں
آلام و غم کی تند حوادث کے واسطے
اتنا لطیف دل مرے پروردگار کیوں
جب زندگی کا موت سے رشتہ ہے منسلک
پھر ہم نشیں ہے خطرۂ لیل و نہار کیوں
جب ربط و ضبط حسن محبت نہیں رہا
ہے بار دوش ہستئ ناپائیدار کیوں
رونا مجھے خزاں کا نہیں کچھ مگر شمیمؔ
اس کا گلہ ہے آئی چمن میں بہار کیوں
صفیہ شمیم
یوم پیدائش 26 مارچ
وہ جو اترا تھا میری روح میں خوشبو بن کر
اب میری آنکھ سے ٹپکا ہے وہ آنسو بن کر
کرجیاں خواب ہیں تعبیر ہے ریزہ ریزہ
رقصِ تقدیر میں ٹوٹا ھوں میں گھنگرو بن کر
یاد کرتا ہوں تو اطراف مہک اٹھتے ہیں
جیسے وہ آپ ہی آجاتا ہے خوشبو بن کر
گھیرے رکھتے ہیں مجھے یوں تیری یاوں کے حصار
بام و دیوار بھی ملتے ہیں مجھے تو بن کر
ہائے اُس دوش پہ وہ رات سے کالی زلفیں
جن پہ خورشید بھی منڈلائے ہے جگنو بن کر
جنسِ بازار سمجھتے ہیں مجھے لوگ قمر
جو بھی ملتا ہے وہ ملتا ہے ترازو بن کر
زوار قمر عابدی
یوم پیدائش 26 مارچ 1960
ہمیں خانوں میں مت بانٹو
کہ ہم تو روشنی ٹھہرے
کسی دہلیز پر جلتے ہوئے شب بھر
کسی کا راستہ تکتے
چراغوں سے بھی آگے ہے جہاں اپنا
اجالوں کی کمک لے کر
اندھیرے کی صفوں کو چیر جاتے ہیں
یہ جگنو چاند اور تارے
ہماری صورتیں جیسے
ہمیں خانوں میں مت بانٹو
ہوا ہیں ہم
بھلا دیوار و در میں قید کیا ہوں گے
سنہری صبح ڈھلتی شام کی راحت ہمیں سے ہے
ہمیں میزان پر رکھنے سے پہلے
تولنے سے قبل اتنا سوچ لینا ہے
ہمارا بوجھ تیری بند مٹھی میں دبی رسی
اٹھائے گی بھلا کیسے
کہ ہم تو شش جہت میں
جس طرف نظریں اٹھاؤ
دیکھ لو پھیلی ہوئی بکھری ہوئی ہم کو
کہ ہم تو زندگی ہیں
کہکشاں تبسم
یوم پیدائش 25 جنوری 1912
میں نے کہا کہ تجزیۂ جسم و جاں کرو
اس نے کہا یہ بات سپرد بتاں کرو
میں نے کہا کہ بہار ابد کا کوئی سراغ
اس نے کہا تعاقب لالہ رخاں کرو
میں نے کہا کہ صرف دل رائیگاں ہے کیا
اس نے کہا آرزوئے رائیگاں کرو
میں نے کہا کہ عشق میں بھی اب مزا نہیں
اس نے کہا کہ از سر نو امتحاں کرو
میں نے کہا کہ اور کوئی پند خوش گوار
اس نے کہا کہ خدمت پیر مغاں کرو
میں نے کہا ہم سے زمانہ ہے سر گراں
اس نے کہا کہ اور اسے سر گراں کرو
میں نے کہا کہ زہد سراسر فریب ہے
اس نے کہا یہ بات یہاں کم بیاں کرو
میں نے کہا کہ حد ادب میں نہیں ظفرؔ
اس نے کہا نہ بند کسی کی زباں کرو
سراج الدین ظفر
یوم پیدائش 25 مارچ 1887
نظم پیارا دیس
دیس اپنا ہم کو پیارا کیوں نہ ہو
دل فدا اس پر ہمارا کیوں نہ ہو
''ہند'' سے بڑھ کر نہیں کوئی زمین
گو جہاں جنت ہی سارا کیوں نہ ہو
کہتے ہیں جس چیز کو آب حیات
پھر وہ شے گنگا کی دھارا کیوں نہ ہو
جس نے پھیلایا جہاں میں نور علم
آنکھ کا دنیا کی تارا کیوں نہ ہو
کب مٹا سکتا ہے ہم کو آسماں
گو وہ دشمن ہی ہمارا کیوں نہ ہو
ہندو و مسلم کو لڑتے دیکھ کر
رنج سے دل پارا پارا کیوں نہ ہو
ہم نے یہ مانا کبھی لڑ بھی لیے
از سر نو بھائی چارہ کیوں نہ ہو
کیوں نہ ہو الفت عداوت کیوں رہے
دشمنی کیوں ہو مدارا کیوں نہ ہو
ہم ہیں ہندوستان کے سچے سپوت
دیس کی خدمت گوارا کیوں نہ ہو
حامد حسن قادری
یوم پیدائش 25 مارچ 1864
ہوتے ہی جواں ہو گئے پابند حجاب اور
گھونگھٹ کا اضافہ ہوا بالائے نقاب اور
جب میں نے کہا کم کرو آئین حجاب اور
فرمایا بڑھا دوں گا ابھی ایک نقاب اور
پینے کی شراب اور جوانی کی شراب اور
ہشیار کے خواب اور ہیں مدہوش کے خواب اور
گردن بھی جھکی رہتی ہے کرتے بھی نہیں بات
دستور حجاب اور ہیں انداز حجاب اور
پانی میں شکر گھول کے پیتا تو ہے اے شیخ
خاطر سے ملا دے مری دو گھونٹ شراب اور
ساقی کے قدم لے کے کہے جاتا ہے یہ شیخ
تھوڑی سی شراب اور دے تھوڑی سی شراب اور
سائلؔ نے سوال اس سے کیا جب بھی یہ دیکھا
ملتا نہیں گالی کے سوا کوئی جواب اور
سائل دہلوی
شمع دل تم بجھانے آئے تھے
دولتِ دل چرانے آئے تھے
زندگی ساتھ لے کے میری جاں
ہم تو تجھ سے نبھانے آئے تھے
غیر سے مل کے وہ بدل گئی تھی
پھر بنانے بہانے آئے تھے
کیا ستم تھے مرے مقدر میں
دوست مجھ کو مٹانے آئے تھے
اپنا سب کچھ سمجھ لیا تھا اسے
کیسے کیسے زمانے آئے تھے
پیار کا نام پھر لیا نہ کبھی
ہوش ایسے ٹھکانے آئے تھے
ریاض حازم
نہیں کرتے جو لوگ اوروں کی عزت
اٹھانی پڑےگی انھیں خودبھی ذلت
شمار انکا بھی کجیے ظالموں میں
کہ کرتے ہیں جو ظالموں کی حمایت
وہ اک قصۂِ غم ہی پڑھتے رہے ہم
نہ بدلے ہے راوی نہ بدلے روایت
نگاہیں ملانا ملاکر چرانا
یہ معصومیت ہے یا کوئی شرارت
تم اک بار بولی لگاکر تو دیکھو
بکے گی صحافت عدالت حکومت
خدا دے گا بے شک تمہیں اس کا بدلا
کرو کام کوئی رکھو صاف نیت
یوں بیٹھے بٹھائے نہیں ملتا کچھ بھی
کہا سچ کسی نے ہے حرکت میں برکت
مزاج اپنا ہے دوستو سیدھا سادا
کہ کرتے نہیں ہم کسی سے سیاست
بڑا ہے وہ سب سے بڑی شان اس کی
بیاں کرسکے نہ کوئی اس کی عظمت
کسی کو بھی اپنے سے کم ترسمجھنا
حماقت ہے ہرگز نہ کرنا حماقت
حقیقت میں ہیں صاحبِ زر وہی لوگ
جنھیں مل گئی ہے ہدایت کی دولت
کٹے زیست حکمِ خدا کے مطابق
نہ ہو کام کوئی خلافِ شریعت
میں شاعر ہوں میرا فریضہ ہے ماجؔد
بیاں کرنا ہر دم حقیقت صداقت
عبدالماجد عادل آبادی
اگر تو خدا کا نہیں ہے
قسم سے کسی کا نہیں ہے
محمدﷺ وہاں پر ہے پہنچے
جہاں کوئی پہنچا نہیں ہے
خدایا ترے اس جہاں میں
کوئی بھی تو اپنا نہیں ہے
بہت سے حسیں لوگ دیکھے
مگر کوئی تجھ سا نہیں ہے
جسے تو سمجھتا ہے اپنا
نہیں ہے وہ تیرا نہیں ہے
سخن ور بہت ہم نے دیکھے
کوئی تم سا دیکھا نہیں ہے
تو کس کی زباں بولتا ہے
ترا تو یہ لہجہ نہیں ہے
مرے رب کی خیرات تو ہے
کسی کا تو صدقہ نہیں ہے
نہیں کھیل تو میرے دل سے
مرا دل کھلونا نہیں ہے
اداسی میں کیوں مجھ کو حاشر
کوئی یاد آتا نہیں ہے
حاشر افنان
یوم پیدائش 24 مارچ 1928
تم سے پہلے وہ جو اک شخص یہاں تخت نشیں تھا
اس کو بھی اپنے خدا ہونے پہ اتنا ہی یقیں تھا
کوئی ٹھہرا ہو جو لوگوں کے مقابل تو بتاؤ
وہ کہاں ہیں کہ جنہیں ناز بہت اپنے تئیں تھا
آج سوئے ہیں تہ خاک نہ جانے یہاں کتنے
کوئی شعلہ کوئی شبنم کوئی مہتاب جبیں تھا
اب وہ پھرتے ہیں اسی شہر میں تنہا لیے دل کو
اک زمانے میں مزاج ان کا سر عرش بریں تھا
چھوڑنا گھر کا ہمیں یاد ہے جالبؔ نہیں بھولے
تھا وطن ذہن میں اپنے کوئی زنداں تو نہیں تھا
حبیب جالب
یوم پیدائش 23 مارچ 1939
وہ ستم پرور بہ چشم اشک بار آ ہی گیا
چاک دامانی پہ میری اس کو پیار آ ہی گیا
مٹتے مٹتے مٹ گئی جان وفا کی آرزو
آتے آتے بے قراری کو قرار آ ہی گیا
چپکے چپکے مجھ پہ میری خامشی ہنستی رہی
روتے روتے جذب دل پر اختیار آ ہی گیا
کوئی وعدہ جس کا معنی آشنا ہوتا نہیں
پھر اسی وعدہ شکن پر اعتبار آ ہی گیا
یا الٰہی جذبۂ ہوش و خرد کی خیر ہو
منتظر جس کا جنوں تھا وہ دیار آ ہی گیا
بشیر فاروق
یوم پیدائش 23 مارچ 1960
عورت ہوں مگر صورت کہسار کھڑی ہوں
اک سچ کے تحفظ کے لیے سب سے لڑی ہوں
وہ مجھ سے ستاروں کا پتا پوچھ رہا ہے
پتھر کی طرح جس کی انگوٹھی میں جڑی ہوں
الفاظ نہ آواز نہ ہم راز نہ دم ساز
یہ کیسے دوراہے پہ میں خاموش کھڑی ہوں
اس دشت بلا میں نہ سمجھ خود کو اکیلا
میں چوب کی صورت ترے خیمے میں گڑی ہوں
پھولوں پہ برستی ہوں کبھی صورت شبنم
بدلی ہوئی رت میں کبھی ساون کی جھڑی ہوں
فرحت زاہد
یوم پیدائش 23 مارچ 1975
مسرّتوں کا سماں دیر تک نہیں رہتا
دیا بجھے تو دھواں دیر تک نہیں رہتا
شباب آتا ہے لیکر پروں کو ساتھ اپنے
زمیں پہ کوئی جواں دیر تک نہیں رہتا
حساب سودِمحبّت کا یاد کیا رکھتے
ہمیں تو یاد زیاں دیر تک نہیں رہتا
مری خطاؤں کو گر وہ معاف کر دیتا
تو دل۔ پہ بار گراں دیر تک نہیں رہتا
فلاح اسکو بلاتی ہے۔ یہ خبر ہے جسے
وہ گھر میں سن کے اذاں دیر تک نہیں رہتا
جو مشکلات کا کرتے ہیں سامنا ھنس کر
یہ غم انہی کے یہاں دیر تک نہیں رہتا
ہزار کوششیں کر لیں مگر زمانے سے
کسی کا درد ۔نہاں دیر تک نہیں رہتا
یہ کیسا دور ہے آیا کہ ملک میں انجم
کہیں گمان ِاماں دیر تک نہیں رہتا
شاداب انجم، کامٹی
شوق سے پالے تھے میں نے جس کے نخرےناز بھی
وہ مرا قاتل بھی نکلا وہ مرا ہمراز بھی
سرخ لب ابرو کشیدہ اور نگاہِ ناز بھی
ہر ادا قاتل صنم کی اور عجب انداز بھی
بادشاہِ عشق ہوں پر دوں کسے دل کا محل
اک طرف گلناز ہے اور اک طرف ممتاز بھی
ہے نصیبا خاک اپنی جگ خیالی تشنگی
یا الٰہی کیا غضب ہے زندگی کا راز بھی
میں نہ واعظ میں نہ زاہد میں نہ عابد ساقیا
کیا نہیں میرے لئے اب ساغر و شیراز بھی
گر فلک منزل ہے تیری یوں نہ ڈر طوفان سے
ہے بہت اونچی دلِ ناداں تری پرواز بھی
لوٹ لی محفل جو تو نے دفعتاً اک شعر سے
یوں لگا عابؔد ہمیں تو ہے سخن شہباز بھی
عابد حسین عابؔد
چهوٹی چهوٹی رنجشوں میں فاصلوں کا شورتھا
جس نے بدلا راستہ وہ ظرف میں کم زور تها
اس بدن کی سلطنت میں کس قدر بے خامشی
دل ذرا سا ، چار خانے ، کس قدر منہ زور تها
ہم وفاؤں کے خزانے کهنکهناتے رہ گئے
اور جفا کے چار سکوں کا بهی کتنا شور تھا
اب کہاں تصویر میں وہ رنگ وہ رعنائیاں
ایک جذبہ ڈھے چکا تھا اب کنار گور تھا
منصفوں نے بھی سنی تھی آہ زاری کی صدا
فیصلہ محفوظ رکھا ، ان کے دل میں چور تھا
سعدیہ بشیر
شہرِ وفا میں اپنا بھی کیا نام آیا ہے
مانگا خدا سے جو ہے وہی کام آیا ہے
ہر اور پھول کِھل اُٹھے اُجڑے دیار میں
تیری نگاہِ شوق کا انعام آیا ہے
لوٹ آئے گا وہ وقت،امیدِ بہار رکھ
فطرت سے ہم کو آج یہ پیغام آیا ہے
یامین یاسمین
روز و شب ہم نے اشکباری کی
انتہا ہے یہ بے قراری کی
میرا دامن سیاہ تھا پھر بھی
اے خدا تو نے پاسداری کی
جانے کب کا میں مر گیا ہوتا
ان کی یادوں نے آبیاری کی
کوستا ہی رہا مجھے ہر دم
قدر کیا جانے وہ بھکاری کی
خاک ہوں خاک میں ہی ملنا ہے
بُو بھی آتی ہے خاکساری کی
کام میں نے کیا مصور کا
میں نے شعروں میں دستکاری کی
میں تو مجنون بن گیا بسمل
مجھ پہ لوگوں نے سنگ باری کی
سید مرتضی بسمل
مالی کی حرکتوں پہ قدغن ہے
اس لیے داغدار گلشن ہے
خون کرنا پڑا ہے خواہش کا
ہم یہ سمجھے تھے سہل جیون ہے
ہوش آتے ہی مشکلیں دیکھیں
میری خوشیوں کا عہد بچپن ہے
اُس کو کرنا ہے فیصلہ میرا
اس لیے تیز آج دھڑکن ہے
کتنے رازوں کو دفن ہم نے کیا
دل ہمارا بھی ایک مدفن ہے
ایک پل میں ،میں ہو گیا تیرا
تیرے چہرے پہ کتنا جوبن ہے
ہم کو کیا لینا شہر سے فیضی
دشتِ ویراں میں اپنا مسکن ہے
میر خوشحال فیضی
ایسا تو نہیں دل میں محبت ہی نہیں تھی
اظہار محبت کی بھی ہمت ہی نہیں تھی
آساں تو نہیں عشق کا سودا مرے ہمدم
ایسا بھی نہیں مجھ میں وہ دولت ہی نہیں تھی
ترسیلِ عدم سے نہ ہوا عشق کا اظہار
افسوس زمانے میں سہولت ہی نہیں تھی
ہم اپنی انا لے کے ہی واپس چلے آئے
تکرار کی ہم میں کوئی عادت ہی نہیں تھی
ہم بس کہ کتابوں میں ہی کھوئے رہے اب تک
دل کے لئے اپنے کوئی مہلت ہی نہیں تھی
پہلی ہی نظر میں ترا ہونا بھی عجب تھا
اور بن ترے دل میں کوئی حاجت ہی نہیں تھی
اُس وقت میرے نام سے واقف نہ تھی دنیا
الیاس کی اس دور میں شہرت ہی نہیں تھی
محمد الیاس کرگلی
نظر لگی ہے کس کی میرے شہر کو
کہ خون نے ہے اوڑھا پورے شہر کو
جکڑ کے پنجرے میں قید کرنا یوں
سمجھ یہ آ رہا ہے سارے شہر کو
بجھائے ہیں چراغ کتنے بے وجہ
بنایا مقبرہ پیارے شہر کو
یہاں کے تخت کا اٹھا کے فائدہ
کئے خسارے ہی خسارے شہر کو
سبھی ہیں محو اپنے آپ میں عمر
یہاں پہ کون اب نکھارے شہر کو
راتھر عمر
ترس جاتی ہیں آنکھیں جینا بھی دشوار ہوتاہے
بڑی مشکل سے اب تو چاند کا دیدار ہوتا ہے
نہ دولت میں سکونِ دل ہے نہ شہرت میں اے جاناں
کہ تجھ کو دیکھ کر ہی دل گلِ گلزار ہوتا ہے
زباں سے اسکی سننے کے لیے بے چین ہوں کب سے
محبت کا مگر اس سے کہاں اظہار ہوتا ہے
مکمل کوئی ہوتا ہے ادھورا رہتا ہے کوئی
محبت میں کہاں ہر اک کا بیڑا پار ہوتا ہے
نگاہوں کو تو بھاتے ہیں کئی چہرے یہاں اشرف
مگر دل جس پہ آجائے اسی سے پیار ہوتا ہے
اشرف نرملی
یوم پیدائش 21مارچ 1940
ہو کے دنیا میں بھی دنیا سے رہا اور طرف
دل کسی اور طرف ،دستِ دعا اور طرف
اک رجز خواں ہنر ِکاسہ و کشکول میں طاق
جب صفِ آرا ہوئے لشکر تو ملا اور طرف
اے بہ ہر لمحہ نئے وہم میں الجھے ہوئے شخص
میری محفل میں الجھتا ہے تو جا اور طرف
اہلِ تشہیر و تماشا کے طلسمات کی خیر
چل پڑے شہر کے سب شعلہ نوا اور طرف
کیا مسافر تھا سفر کرتا تھااِس بستی میں
اور لو دیتے تھے نقشِ کفِ پا اور طرف
شاخِ مژگاں سے جو ٹوٹا تھا ستارہ سرِ شام
رات آئی تو وہی پھول کھلا اور طرف
نرغۂ ظلم میں دکھ سہتی رہی خلقتِ شہر
اہلِ دنیا نے کیے جشن بپا اور طرف
افتخار عارف
یوم پیدائش 21 مارچ 1974
کوئی ہمدرد بن کر آ گیا ہے
ہوا جب حال ابتر آ گیا ہے
ِمرے مدِ مقابل جنگ لڑنے
ِمرا یارِ ستمگر آ گیا ہے
جو ان دیکھا تھا پڑھ کر دیکھنا ہے
فسانے میں وہ منظر آ گیا ہے
ارے یارا ! نہیں تکلیف ، مت رو
یونہی بس ہاتھ دل پر آ گیا ہے
بنے گا کل مرا بازو ۔۔ کہ بیٹا
مرے قد کے برابر آ گیا ہے
پرانے درد اوڑھے تھا جو موسم
نئے کپڑے پہن کر آ گیا ہے
نہیں تھا نام میرا سرکشوں میں
مگر حسبِ مقدر آ گیا ہے
مجھے جانا تھا لیکن جا نہ پایا
اسے آنا نہ تھا ۔۔ پر آ گیا ہے
تمہاری منتظر خوشیاں ہیں " طاہر"
اب آنکھیں پونچھ لو گھر آ گیا ہے
" طاہر مسعود "
یوم پیدائش 21 مارچ 1863
دے محبت تو محبت میں اثر پیدا کر
جو ادھر دل میں ہے یا رب وہ ادھر پیدا کر
دود دل عشق میں اتنا تو اثر پیدا کر
سر کٹے شمع کی مانند تو سر پیدا کر
پھر ہمارا دل گم گشتہ بھی مل جائے گا
پہلے تو اپنا دہن اپنی کمر پیدا کر
کام لینے ہیں محبت میں بہت سے یا رب
اور دل دے ہمیں اک اور جگر پیدا کر
تھم ذرا اے عدم آباد کے جانے والے
رہ کے دنیا میں ابھی زاد سفر پیدا کر
جھوٹ جب بولتے ہیں وہ تو دعا ہوتی ہے
یا الٰہی مری باتوں میں اثر پیدا کر
آئینہ دیکھنا اس حسن پہ آسان نہیں
پیشتر آنکھ مری میری نظر پیدا کر
صبح فرقت تو قیامت کی سحر ہے یا رب
اپنے بندوں کے لیے اور سحر پیدا کر
مجھ کو روتا ہوا دیکھیں تو جھلس جائیں رقیب
آگ پانی میں بھی اے سوز جگر پیدا کر
مٹ کے بھی دوری گلشن نہیں بھاتی یا رب
اپنی قدرت سے مری خاک میں پر پیدا کر
شکوۂ درد جدائی پہ وہ فرماتے ہیں
رنج سہنے کو ہمارا سا جگر پیدا کر
دن نکلنے کو ہے راحت سے گزر جانے دے
روٹھ کر تو نہ قیامت کی سحر پیدا کر
ہم نے دیکھا ہے کہ مل جاتے ہیں لڑنے والے
صلح کی خو بھی تو اے بانئ شر پیدا کر
مجھ سے گھر آنے کے وعدے پر بگڑ کر بولے
کہہ دیا غیر کے دل میں ابھی گھر پیدا کر
مجھ سے کہتی ہے کڑک کر یہ کماں قاتل کی
تیر بن جائے نشانہ وہ جگر پیدا کر
کیا قیامت میں بھی پردہ نہ اٹھے گا رخ سے
اب تو میری شب یلدا کی سحر پیدا کر
دیکھنا کھیل نہیں جلوۂ دیدار ترا
پہلے موسیٰ سا کوئی اہل نظر پیدا کر
دل میں بھی ملتا ہے وہ کعبہ بھی اس کا ہے مقام
راہ نزدیک کی اے عزم سفر پیدا کر
ضعف کا حکم یہ ہے ہونٹ نہ ہلنے پائیں
دل یہ کہتا ہے کہ نالے میں اثر پیدا کر
نالے بیخودؔ کے قیامت ہیں تجھے یاد رہے
ظلم کرنا ہے تو پتھر کا جگر پیدا کر
بیخود دہلوی
یوم پیدائش کی مبارک باد
21م مارچ ۔۔۔۔
دُکھوں کو ایڑ لگاتے ہیں غم سے کھیلتے ہیں
وہ جیتتے ہیں جو لوح و قلم سے کھیلتے ہیں
نہ جانے کس لئے اہلِ کرم سے کھیلتے ہیں
زمانے والے دلِ محترم سے کھیلتے ہیں
یہی رواج ہے شہرِ ستم کا صدیوں سے
جو شاد ہیں وہ اسیرانِ غم سے کھیلتے ہیں
قسم ہے ان کی قسم کا یقین مت کرنا
منافقین خدا کی قسم سے کھیلتے ہیں
مخالفین میں یہ بات مشتہر کر دو
ہے مات ان کی یقینی جو ہم سے کھیلتے ہیں
کہ اپنے اپنے عقیدوں کو طاق پر رکھ کر
جنابِ شیخ و برہمن دھرم سے کھیلتے ہیں
اے شاؔد رنج و الم کا نہیں ہے خوف ہمیں
ہم ابتدا ہی سے رنج و الم سے کھیلتے ہیں
شمشاد شاؔد
یوم پیدائش 20 مارچ
بظاہر زیست سے شکوہ نہیں ہے
ہے سب اچھا مگر، اچھا نہیں ہے
میں کیسی بستیوں میں آگیا ہوں
یہاں دیواریں ہیں، سایہ نہیں ہے
فقط گھنٹی سے ہی پہچانتا ہوں
تِرا ہے فون یا تیرا نہیں ہے
زمین و آسماں دھندلے پڑے ہیں
یہ آنسو آنکھ سے گرتا نہیں ہے
یہ سچ ہے میرا برتاؤ ہے بدلا
مگر تُو بھی تو پہلے سا نہیں ہے
جو سوچا رات بھر تجھ کو، لگا یہ
مِرا چہرہ تھا جو، میرا نہیں ہے
جاوید اقبال
یوم پیدائش 20مارچ 1922
ستم گر تجھ سے ہم کب شکوۂ بیداد کرتے ہیں
ہمیں فریاد کی عادت ہے ہم فریاد کرتے ہیں
متاع زندگانی اور بھی برباد کرتے ہیں
ہم اس صورت سے تسکین دل ناشاد کرتے ہیں
ہواؤ ایک پل کے واسطے للہ رک جاؤ
وہ میری عرض پر دھیمے سے کچھ ارشاد کرتے ہیں
نہ جانے کیوں یہ دنیا چین سے جینے نہیں دیتی
کوئی پوچھے ہم اس پر کون سی بیداد کرتے ہیں
نظر آتا ہے ان میں بیشتر اک نرم و نازک دل
مصائب کے لیے سینے کو جو فولاد کرتے ہیں
خدا کی مصلحت کچھ اس میں ہوگی ورنہ بے حس بت
کسے شاداں بناتے ہیں کسے ناشاد کرتے ہیں
نہیں دیکھا کہیں جو ماجرائے عشق میں دیکھا
کہ اہل درد چپ ہیں چارہ گر فریاد کرتے ہیں
اسیر دائمی گر دل نہ ہو تو اور کیا ہو جب
کہیں وہ مسکرا کر جا تجھے آزاد کرتے ہیں
کیا ہوگا کبھی آدم کو سجدہ کہنے سننے سے
فرشتے اب کہاں پروائے آدم زاد کرتے ہیں
ہمیں اے دوستو چپ چاپ مر جانا بھی آتا ہے
تڑپ کر اک ذرا دل جوئی صیاد کرتے ہیں
بہت سادہ سا ہے اے کیفؔ اپنے غم کا افسانہ
وہ ہم کو بھول بیٹھے ہیں جنہیں ہم یاد کرتے ہیں
سرسوتی سرن کیف
یوم پیدائش 20 مارچ 1922
مری داستان حسرت وہ سنا سنا کے روئے
مرے آزمانے والے مجھے آزما کے روئے
کوئی ایسا اہل دل ہو کہ فسانۂ محبت
میں اسے سنا کے روؤں وہ مجھے سنا کے روئے
مری آرزو کی دنیا دل ناتواں کی حسرت
جسے کھو کے شادماں تھے اسے آج پا کے روئے
تری بے وفائیوں پر تری کج ادائیوں پر
کبھی سر جھکا کے روئے کبھی منہ چھپا کے روئے
جو سنائی انجمن میں شب غم کی آپ بیتی
کئی رو کے مسکرائے کئی مسکرا کے روئے
سیف الدین سیف
یوم پیدائش 19 مارچ 1898
دم اخیر بھی ہم نے زباں سے کچھ نہ کہا
جہاں سے اٹھ گئے اہل جہاں سے کچھ نہ کہا
چلی جو کشتئ عمر رواں تو چلنے دی
رکی تو کشتئ عمر رواں سے کچھ نہ کہا
خطائے عشق کی اتنی سزا ہی کافی تھی
بدل کے رہ گئے تیور زباں سے کچھ نہ کہا
بلا سے خاک ہوا جل کے آشیاں اپنا
تڑپ کے رہ گئے برق تپاں سے کچھ نہ کہا
گلہ کیا نہ کبھی ان سے بے وفائی کا
زباں تھی لاکھ دہن میں زباں سے کچھ نہ کہا
خوشی سے رنج سہے نازؔ عمر بھر ہم نے
خدا گواہ کبھی آسماں سے کچھ نہ کہا
شیر سنگھ ناز دہلوی
یوم پیدائش 19 مارچ 1946
چاند تارے یہ رہگزر مانوس
جس سفر سے ہیں ہم سفر مانوس
اُن سے کتنا پرانا رشتہ ہے
پتھروں سے ہمارے سر مانوس
موت کا بھی مزا چکھیں گے ہم
زندگی سے ہیں سانس بھر مانوس
حادثوں سے ہے کون اب محفوظ
آنسوؤں سے ہیں سارے گھر مانوس
دوستی صرف اُن سے رکھتا ہوں
جن کے شانوں سے ہے یہ سر مانوس
میرا دُکھ کیا ہے آپ کیا جانیں
آپ مجھ سے ہیں آنکھ بھر مانوس
خامشی ٹھیک ہے مگر اے دوست
شور محشر سے میرا گھر مانوس
محشر حبیبی
یوم پیدائش 19 مارچ 1923
قلب و نظر کا سکوں اور کہاں دوستو
کوئے بتاں دوستو کوئے بتاں دوستو
میرا ہی دل ہے کہ میں پھرتا ہوں یوں خندہ زن
کم نہیں پردیس میں دل کا زیاں دوستو
جن میں خلوص وفا اور نہ شعور ستم
مجھ کو بٹھایا ہے یہ لا کے کہاں دوستو
چار گھڑی رات ہے آؤ کہ ہنس بول لیں
جانے سحر تک ہو پھر کون کہاں دوستو
ربط مراسم کے بعد ترک تعلق غلط
آگ بجھانے سے بھی ہوگا دھواں دوستو
لاکھ چھپو سایۂ گیسوئے شب رنگ میں
مل نہیں سکتی مگر غم سے اماں دوستو
شاعر ارشدؔ ہوں میں شاعر فطرت ہوں میں
مٹ نہیں سکتا مرا نام و نشاں دوستو
ارشد صدیقی
یوم پیدائش 18 مارچ 1951
پردہ آنکھوں سے ہٹانے میں بہت دیر لگی
ہمیں دنیا نظر آنے میں بہت دیر لگی
نظر آتا ہے جو ویسا نہیں ہوتا کوئی شخص
خود کو یہ بات بتانے میں بہت دیر لگی
ایک دیوار اٹھائی تھی بڑی عجلت میں
وہی دیوار گرانے میں بہت دیر لگی
آگ ہی آگ تھی اور لوگ بہت چاروں طرف
اپنا تو دھیان ہی آنے میں بہت دیر لگی
جس طرح ہم کبھی ہونا ہی نہیں چاہتے تھے
خود کو پھر ویسا بنانے میں بہت دیر لگی
یہ ہوا تو کہ ہر اک شے کی کشش ماند پڑی
مگر اس موڑ پہ آنے میں بہت دیر لگی
یاسمین حمید
یوم پیدائش 28 فروری 1902 غیر کے خط میں مجھے ان کے پیام آتے ہیں کوئی مانے کہ نہ مانے مرے نام آتے ہیں عافیت کوش مسافر جنھیں منزل سمجھیں عشق...
