ڈاکٹر گلِ رعنا

 یوم پیدائش 30 اپریل 1985

میں نے جب بھی کیا تذکرہ آپ کا

خواب میں دیکھا وجۂ ضیاء آپ کا

چاند کی سمت جب بھی اٹھائی نظر

آگیا ذہن میں معجزہ آپ کا

جس کو یوسف ہے کہتا یہ سارا جہاں

وہ بھی ہے عاشقِِ با صفا آپ کا

میں تو مایوس ہونے لگی تھی مگر

آسرا حشر میں مل گیا آپ کا

ہم کریں نا کریں فرق پڑتا ہے کیا

ذکر کرتا ہے جب خود خدا آپ کا

پڑھ کے کلمہ وہ حق آشنا ہوگیا

جس بشر سے ہوا رابطہ آپ کا

خاکِی انسان سے کیا تقابل بھلا

نور ہی نور ہے سلسلہ آپ کا

آپ رعنا تو نبیوں کے سردار ہیں

جانتا ہے جہاں مرتبہ آپ کا

ڈاکٹر گلِ رعنا

طاہر کنول نعمانی

 یوم وفات 30 اپریل 2021

ہے تمنا یہی نعت لکھتا رہوں نعت پڑھتا رہوں

یا نبی آپ کی نعت لکھتا رہوں نعت پڑھتا رہوں

صبح سے شام تک شام سے رات تک رات سے صبح تک 

مشغلہ ہو یہی نعت لکھتا رہوں نعت پڑھتا رہوں

کوئی لکّھے غزل نظم پر زور دے یا رباعی کہے 

میں تو یا سیدی ! نعت لکھتا رہوں نعت پڑھتا رہوں

ہر طرف نور ہو صاف ہو قلب بھی روح مسرور ہو 

اپنے سرکار کی نعت لکھتا رہوں نعت پڑھتا رہوں 

آرزو ہے یہی میری آنکھوں میں بس اُن کا روضہ رہے 

اے کنول! میں یونہی نعت لکھتا رہوں نعت پڑھتا رہوں 

طاہر کنول نعمانی

عظیم امروہوی

 یوم پیدائش 29 اپریل 1945

انبیاء جتنے ہیں ان کا مرتبہ کچھ اور ہے

عظمتِ حضرت محمد مصطفےؐ کچھ اور ہے

نیل کے پانی میں جو رستہ بنا کچھ اور ہے 

آسمانوں سے جو گزرا راستہ کچھ اور ہے 

چاند ہے سورج ہے تارا ہے نہ ہے کوئی چراغ

آمنہ کے گھر میں یہ جلوہ نما کچھ اور ہے 

ہوگی جنت بھی تری معبود کافی پُر فضا

میری نظروں میں مدینے کی فضا کچھ اور ہے

تھا خدا مطلوب موسیٰؐ کو تو پہنچے طور پر

جس کو بلوایا وہ محبوب خدا کچھ اور ہے

کوئی گزرے گا فلک سے چاند بھی آج خوش

اور تاروں کے چمکنے کی ادا کچھ اور ہے

ہیں محمدؐ تو مدینہ علم کا حیدر ؓ ہیں در

ماسوا حیدر ؓ کہیں سے راستہ کچھ اور ہے

شاعری کا لطف ہر صنف سخن میں ہے عظیم

نعت کہنے کا حقیقت میں مزا کچھ اور ہے 

عظیم امروہوی

مبارک عظیم آبادی

 یوم پیدائش 29 اپریل 1849

درد دل یار رہا درد سے یاری نہ گئی

زندگی ہم سے تو بے لطف گزاری نہ گئی

دن کے نالے نہ گئے رات کی زاری نہ گئی

نہ گئی دل سے کبھی یاد تمہاری نہ گئی

ہم تو خوں گشتہ تمناؤں کے ماتم میں رہے

سینہ کوبی نہ گئی سینہ فگاری نہ گئی

انتظار آپ کا کب لطف سے خالی نکلا

رائیگاں رات کسی روز ہماری نہ گئی

بخشوایا مجھے تم نے تو خدا نے بخشا

نہ گئی روز جزا بات تمہاری نہ گئی

لوگ کہتے ہیں بدلتا ہے زمانہ لیکن

دن ہمارا نہ گیا رات ہماری نہ گئی

مبارک عظیم آبادی

اجے سحاب

 یوم پیدائش 29 اپریل 1969

جب بھی ملتے ہیں تو جینے کی دعا دیتے ہیں

جانے کس بات کی وہ ہم کو سزا دیتے ہیں

حادثے جان تو لیتے ہیں مگر سچ یہ ہے

حادثے ہی ہمیں جینا بھی سکھا دیتے ہیں

رات آئی تو تڑپتے ہیں چراغوں کے لیے

صبح ہوتے ہی جنہیں لوگ بجھا دیتے ہیں

ہوش میں ہو کے بھی ساقی کا بھرم رکھنے کو

لڑکھڑانے کی ہم افواہ اڑا دیتے ہیں

کیوں نہ لوٹے وہ اداسی کا مسافر یارو

زخم سینہ کے اسے روز سدا دیتے ہیں

اجے سحاب

نیاز سواتی

 یوم پیدائش 29 اپریل 1941

ورنہ مجھے بھی جھوٹا سمجھتے تمام لوگ 

صد شکر اپنے حلقے کا ممبر نہیں ہوں میں 

دولت کی ریل پیل ہے اب گھر میں اس لیے 

کسٹم کا اک کلرک ہوں ٹیچر نہیں ہوں میں

نیاز سواتی 

سید خادم رسول عینی

 یوم پیدائش 29 اپریل 1968

ماہ صیام

دے رہا ہے مسلموں کو ضابطہ ماہ صیام

نور ایماں اور تقویٰ کی ضیا ماہ صیام 

اس کا استقبال کیجیے مومنو ، سنت ہے یہ 

تحفہء نیکی لیے پھر آگیا ماہ صیام

ہم گناہوں میں پھنسے تھے ، گرچہ نادم تھے بہت 

تیرے آتے ہی رکا یہ سلسلہ ماہ صیام

تجھ میں اک شب قدر والی ہے ، یہ آقا نے کہا 

تجھ سا ہم لائیں کہاں سے دوسرا ماہ صیام 

مومنوں کے رخ پہ ہیں رعنائیاں ، شادابیاں

منظر افطار و سحری خوش نما ماہ صیام 

اس کا ہر پل ہے مزین برکت و انوار سے 

ہے مقدس ابتدا تا انتہا ماہ صیام 

جس میں توریت و زبور انجیل بھی نازل ہوئیں 

مرحبا صد مرحبا وہ آگیا ماہ صیام

اس کا استقبال کرتے تھے حبیب کبریا

 اس قدر تقدیس کا حامل رہا ماہ صیام

کھل گیے جنت کے دروازے مسلماں کے لیے

بند ہر دوزخ کا دروازہ ہوا ماہ صیام

کرتی ہے مچھلی دعا دریا میں صائم کے لیے

ہے بہت اپنے لیے برکت نما ماہ صیام

نام ہے ماہ مساوات اس کا ، ماہ صبر بھی 

ہوگیے سب حامل صبر و رضا ماہ صیام

چاند کو اس کے پیمبر دیکھتے تھے شوق سے

مومنو خوشیاں مناؤ آگیا ماہ صیام

صائموں کی افضلیت "عینی" اس سے جان لو 

اجر ان کو دیتا ہے خود کبریا ماہ صیام

سید خادم رسول عینی

احمق پھپھوندوی

 یوم پیدائش 26 اپریل 1895

اٹھو اٹھو اٹھو اٹھو 

کمر کسو کمر کسو 

سحر سے پہلے چل پڑو 

کڑی ہے راہ دوستو 

تھکن کا نام بھی نہ لو 

بڑھے چلو بڑھے چلو 

جھجھک نہ دل میں لاؤ تم 

بس اب قدم اٹھاؤ تم 

ذرا نہ ڈگمگاؤ تم 

خدا سے لو لگاؤ تم 

ملول و مضطرب نہ ہو 

بڑھے چلو بڑھے چلو 

اٹھا دیا قدم اگر 

تو ختم ہے بس اب سفر 

ہے راہ صاف و بے خطر 

نہ کوئی خوف ہے نہ ڈر 

چلو چلو بڑھو بڑھو 

بڑھے چلو بڑھے چلو 

تمہارے ہم سفر جو تھے 

وہ منزلوں پہ جا لگے 

سب آگے تم سے بڑھ گئے 

مگر ہو تم پڑے ہوئے 

ذرا سمجھ سے کام لو 

بڑھے چلو بڑھے چلو 

دلوں میں ہے جو ولولہ 

تو ڈال دو گے زلزلہ 

رہے بلند حوصلہ 

وہ سامنے ہے مرحلہ 

وہیں پہنچ کے سانس لو 

بڑھے چلو بڑھے چلو 

احمق پھپھوندوی

 

من موہن عالم

 یوم پیدائش :28 اپریل 1938

گناہ اپنے اپنے ثواب اپنا اپنا 

کتاب اپنی اپنی عذاب اپنا اپنا 

مقدر کا رونا ہے کیسا کہ سب نے 

کیا تھا اگر انتخاب اپنا اپنا 

بھرم بھی ہیں درکار جینے کو شاید 

کہ خواب اپنے اپنے سراب اپنا اپنا 

نہ پوچھو کہ مطلب ہے کیا زندگی کا

سوال ایک ہی ہے جواب اپنا اپنا

من موہن عالم

مصطفٰی ارباب

 یوم پیدائش 28 اپریل

ہانکا

جس خطے پہ

ہمیں زندگی گزارتی ہے

بہت بڑی شکار گاہ ہے یہ

ہر وقت

ہانکا لگا رہتا ہے

دوڑتے دوڑتے

ہم ہانپنے لگتے ہیں

سانس اپنا راستہ بھولنے لگتی ہے

ختم ہی نہیں ہوتا یہ ہانکا

دو پاؤں والے

ہمیشہ چار پاؤں والوں کا ہانکا لگاتے ہیں

ہمارے دو پاؤں

ایک ہانکے کا شکار ہو چکے ہیں

ہم بہت خوش ہوئے تھے

اب ہمارے پاس

ہانکا لگانے والوں کی طرح

دو پاؤں ہیں

مگر پاؤں دو ہوں یا چار

ہانکا لگا ہی رہتا ہے

مصطفٰی ارباب

ارپیت شرما

 یوم پیدائش 28 اپریل

دور کرنے کو یہ تنہائی کہاں سے آئی

تو نہیں ہے تو یہ پرچھائی کہاں سے آئی

آنکھ رکھ کر ہوا جاتا ہے خدا کا منکر 

وہ نہیں ہے تو یہ بینائی کہاں سے آئی

سبز کوسار چمن زار درختوں کی قطار

جو زمیں آپ کو دکھلائی کہاں سے آئی

بام و در دیکھ کہ حیران ہیں آنکھیں میری 

ایسی دیواروں پہ یہ کائی کہاں سے آئی

دیکھ کر غرق ہوئی جاتی ہے ساری دنیا

تیری آنکھوں میں یہ گہرائی کہاں سے آئی

تیری رعنائیِ قدرت پہ تعجب ہے خدا

ان پہاڑوں میں یہ اونچائی کہاں سے آئی

تیرے سجدوں پہ تو نازاں ہیں فرشتے سارے

تجھ میں ارپتؔ یہ جبیں سائی کہاں سے آئی

ارپیت شرما

ڈاکٹر ناہید کیانی

 یوم پیدائش 28 اپریل

عجیب دل میں مچی کھلبلی سے ڈرتے ہوئے

میں سانس کھینچتی ہوں زندگی سے ڈرتے ہوئے

اذیتوں کی کسک سے وہ آشنا کب ہے

مجھے گزرنا ہے جس کی گلی سے ڈرتے ہوئے

چراغ وقت سے پہلے بجھا رہے ہیں لوگ

ہوا کے ساتھ مِلے, روشنی سے ڈرتے ہوئے

کسی کے ہونٹوں پہ لرزے گا قہقہوں کا ہجوم

مکانِ صبر کی اس پختگی سے ڈرتے ہوئے

ہر ایک آئنہ تڑخن کا غم سہے ناہید

مرے خلوص مری سادگی سے ڈرتے ہوئے

ڈاکٹر ناہید کیانی

سیفی سرونجی

 یوم پیدائش 28 اپریل 1952

کیا پوچھتے ہو درد کے ماروں کی زندگی 

یعنی فلک کے ڈوبتے تاروں کی زندگی 

پھیلاؤں ہاتھ جا کے بھلا کس کے سامنے 

ہم کو نہیں گوارا سہاروں کی زندگی

 

ساحل پہ آ کے موج تلاطم سے بارہا 

برباد ہو گئی ہے ہزاروں کی زندگی

 

آتی ہے یاد کیوں مجھے رہ رہ کے آج بھی 

گلشن کے دل فریب نظاروں کی زندگی 

ہے آندھیوں کا خوف نہ ہے ڈوبنے کا ڈر 

مجھ کو نہیں پسند کناروں کی زندگی 

کس درجہ خوش گوار ہے تنہائیوں میں آج 

سیفیؔ چمکتے چاند ستاروں کی زندگی 

سیفی سرونجی

بدنام نظر

 یوم پیدائش 27 اپریل 1941

حیات ڈھونڈ رہا ہوں قضا کی راہوں میں

پناہ مانگنے آیا ہوں بے پناہوں میں

بدن ممی تھا نظر برف سانس کافوری

تمام رات گزاری ہے سرد بانہوں میں

اب ان میں شعلے جہنم کے رقص کرتے ہیں

بسے تھے کتنے ہی فردوس جن نگاہوں میں

بجھی جو رات تو اپنی گلی کی یاد آئی

الجھ گیا تھا میں رنگین شاہراہوں میں

نہ جانے کیا ہوا اپنا بھی اب نہیں ہے وہ

جو ایک عمر تھا دنیا کے خیر خواہوں میں

مری تلاش کو جس علم سے قرار آئے

نہ خانقاہوں میں پائی نہ درس گاہوں میں

بدنام نظر

شوق قدوائی

 یوم وفات 27 اپریل 1925

روح کو آج ناز ہے اپنا وقار دیکھ کر 

اس نے چڑھائیں تیوریاں میرا قرار دیکھ کر 

قصد گلہ نہ تھا مگر حشر میں شوق جوش سے 

ہاتھ مرا نہ رک سکا دامن یار دیکھ کر 

دیکھ کے ایک بار انہیں دل سے تو ہاتھ دھو چکے 

دیکھیے کیا گزرتی ہے دوسری بار دیکھ کر 

آتے ہیں وہ تو پہلے ہی رنج سے صاف ہو رہوں 

آ کے کہیں پلٹ نہ جائیں دل میں غبار دیکھ کر 

وصل سے گزرے اے خدا ہاں یہ شگون چاہیئے 

صبح کو ہم اٹھا کریں روئے نگار دیکھ کر 

کعبہ کو جا نہ شوقؔ ابھی نیت زندگی بخیر 

ہم بھی چلیں گے تیرے ساتھ اب کی بہار دیکھ کر

شوق قدوائی

تابش رامپوری، ممبرا

 انسان کو ڈھونڈو گے تو انسان ملےگا

ورنہ یہاں ہر موڑ پہ حیوان ملے گا

پتھر کو اگر وصف کا ایوان ملے گا

ممکن ہے کہ خود ساختہ بھگوان ملے گا

بہتر ہے کہ یہ پھول کسی قبر پہ رکھ دو

بوسیدہ مکاں میں کہاں گلدان ملے گا

جس غار میں وحدت کی تجلی ہے وہاں جا

بستی میں کہاں صاحب عرفان ملے گا

جنت کی کسی کو بھی تمنا نہیں ہوگی

دنیا میں اگر عیش کا سامآن ملے گا

تابش میں یہی سوچ کے رہتا ہوں پریشاں 

ہر شخص یہاں مجھکو پریشان ملے گا

تابش رامپوری، ممبرا

زعیم رشید

 یوم پیدائش 27 اپریل 1984

دیار شوق میں آئے تھے ایک خواب کے ساتھ 

گزر رہی ہے مسلسل کسی عذاب کے ساتھ 

ہم اہل درد پکارے گئے صحیفوں میں 

ہم اہل عشق اتارے گئے کتاب کے ساتھ 

پھر ایک شام پذیرائی چشم تر کی ہوئی 

پھر ایک شام گزاری گئی جناب کے ساتھ 

ہمیں یہ خوف اندھیرے نگل نہ جائیں کہیں 

سو ہم نے جسم کو ڈھانپا ہے آفتاب کے ساتھ 

مکالمہ رہا جاری ہماری آنکھوں کا 

بدن کی شاخ پہ کھلتے ہوئے گلاب کے ساتھ 

کچھ اور چاہیے تشنہ لبی مٹانے کو 

یہ پیاس وہ ہے جو بجھتی نہیں شراب کے ساتھ 

زعیمؔ وہ مری دریا دلی سے ڈرتا ہے 

وہ مجھ سے ملتا ہے لیکن بڑے حساب کے ساتھ 

زعیم رشید

عشرت رومانی

 یوم وفات 25 اپریل 2021

طلوع صبح تاباں کی جبیں سے

یہ کس کا خون رستا ہے زمیں سے

تری یادوں کی شبنم ضو فشاں ہے

نظر آتے ہیں جگنو شہ نشیں سے

کوئی سورج مرے دل میں اتارو

بنے جاتے ہیں رستے سرمگیں سے

کوئی مانوس خوشبو بس گئی ہے

چلے آتے ہیں جھونکے عنبریں سے

تری قربت کی گرمی کہہ رہی ہے

بکھرنے کو ہیں لمحے آتشیں سے

مرے سپنے مری آنکھیں بھی لے لو

مگر جاناں مجھے دیکھو کہیں سے

جہاں جلتی ہیں یادوں کی چتائیں

پکارا ہے ہمیں اس نے وہیں سے

عشرت رومانی

محب وفا

 یوم پیدائش 26 اپریل 1984

ہجر ہے یاس ہے وحشت کا سماں ہے میں ہوں 

عمر ٹھہرے ہوئے موسم میں رواں ہے میں ہوں 

میرے دامن میں جو گنجینۂ گل ہے تو ہے 

تیرے دامن میں جو اک برگ خزاں ہے میں ہوں 

از زمیں تا بہ فلک رات کا سناٹا ہے 

ایسے عالم میں جو یہ شور فغاں ہے میں ہوں 

دیکھ ہجراں میں خیالات پریشاں کا فسوں 

جا بجا عکس ترا رقص کناں ہے میں ہوں 

طاق ہر شام پہ جلتی ہوئی امید ہے تو 

یہ جو بجھتی ہوئی حسرت کا دھواں ہے میں ہوں 

چشم صد ناز ہے پیکان ستم ہے تو ہے 

اور اک زخم جگر جان ستاں ہے میں ہوں 

برف جذبات کی پگھلی ہے مری حدت سے 

اندروں تیرے جو اک شعلہ فشاں ہے میں ہوں

محب وفا

رفیق رافع

 یوم پیدائش 25 اپریل

ملنے جب جب بھی ان سے جاتے ہیں

دل وہیں اپنا چھوڑ آتے ہیں

ہم نے سیکھا ہے بارہا ان سے

سانحے کچھ نہ کچھ سکھاتے ہیں

تھام لو دل کہ آپ کو اپنی

دکھ بھری داستاں سناتے ہیں

یار ہم بعد میں ہی سوتے ہیں

پہلے بستر پہ غم بچھاتے ہیں

یہ جو ہنستے دکھائی دیتے ہیں

درحقیقت یہ دکھ چھپاتے ہیں

اک قیامت سی ٹوٹ پڑتی ہے

رخ سے آنچل وہ کیا ہٹاتے ہیں

کیا کہا وہ یہاں پہ آئیں گے

رک زرا ہم سنور کے آتے ہیں

رفیق رافع

فاطر فریاد

 یوم پیدائش 25 اپریل

تیرا شانہ جو مجھ کو مل جائے

گریہ زاری کا زخم سِل جائے 

سن کے بیٹھا ہوں تجھ سے جو باتیں

آسماں بھی سنے تو ہِل جائے 

ہاتھ جو تم چھڑائے بیٹھے ہو

دل پہ رکھوں نہ گر تو دل جائے 

بند کرواو کوئے جاناں کو

شاد جو آئے مضمحل جائے 

ہاں اگر ہو تمہارے کمرے میں

خشک گملے میں پھول کھل جائے

فاطر فریاد

ممتاز راشد

 یوم وفات 23 اپریل 2022

انا الیہ وانا الیہ راجعون

رنگ الفاظ کا الفاظ سے گہرا چاہوں 

بات کرنے کے لیے اپنا ہی لہجہ چاہوں 

ہے تھکن ایسی مرا پار اترنا ہے محال 

تشنگی وہ ہے کہ بہتا ہوا دریا چاہوں 

کم نظر ہے جو کرے تیری ستائش محدود 

تو وہ شہکار ہے میں جس کو سراپا چاہوں 

تجھ پہ روشن مرے حالات کی زنجیریں ہیں 

روک لینا جو کبھی تجھ سے بچھڑنا چاہوں 

مفلسی لاکھ سہی دولت نایاب ہے یہ 

میں ترے غم کے عوض کیوں غم دنیا چاہوں 

غم ہے سناٹوں میں قدموں کے نشاں تک راشدؔ 

وہ اندھیرا ہے کہ دیواروں سے رستا چاہوں

ممتاز راشد

روبینہ رانیؔ

 یوم پیدائش 23 اپریل

کھلنے لگے اس دل میں گلاب اور زیادہ 

آتے ہیں مجھے تیرے ہی خواب اور زیادہ

میں نے تو محبت سے نوازا ہے سبھی کو 

دنیا نے دئیے مجھ کو عذاب اور زیادہ

امکان ہے جل جائے نہ اب میرا مکاں بھی

گرتے ہیں زمیں پر یہ شہاب اور زیادہ

پھوٹے نہ کہیں دل سے کوئی خون کا دھارا 

بپھرا ہے مرے دل کا چناب اور زیادہ

اک بار جو نفرت کا لیا نام کسی نے 

میں نے پڑھے الفت کے نصاب اور زیادہ

میں نے تو کبھی درد سے شکوہ نہ کیا تھا 

لیتا رہا کیوں درد حساب اور زیادہ

اس پیاس کو کیسے بھلا سمجھاؤں میں رانی 

صحرا نے دکھانے ہیں سراب اور زیادہ

روبینہ رانیؔ

اِمتیاز انجم

 یوم پیدائش 20 اپریل 2000

جو بات جتائی ہے جتانے کی نہیں تھی 

پھر بات ہماری تھی زمانے کی نہیں تھی

ہر بات ہر اک شخص سمجھ ہی نہیں سکتا 

ہر نظم سرِ بزم سنانے کی نہیں تھی

نقشہ بھی تھا رستہ بھی تھا ہمت بھی تھی لیکن

کنجی ہی مرے پاس خزانے کی نہیں تھی

تھا تیرا تبسّم ہی مری جان قیامت

لیکن جو تری مجھ کو ستانے کی "نہیں" تھی 

کیا جانیے کیا بات تھی اس شخص کے دل میں

یہ بات تو کچھ ایسی رلانے کی نہیں تھی 

آج اس کی صدا پر کوئی لبّیک نہ بولا

وہ جس کی نہیں ایک زمانے کی "نہیں" تھی

جو زخم لگایا ہے لگانے کا نہیں تھا 

جو تیغ چلائی ہے چلانے کی نہیں تھی

جو دل میں بسایا ہے بسانے کا نہیں تھا 

جو آگ لگائی ہے لگانے کی نہیں تھی

کرنے سے کوئی کام بھی ہو سکتا ہے لیکن

نیت ہی مری اس کو بھلانے کی نہیں تھی

 

جاتے ہوئے اس نے بھی پلٹ کر نہیں دیکھا 

خو میری بھی آواز لگانے کی نہیں تھی

اِمتیاز انجم

شہناز نبی

 یوم پیدائش 20 اپریل

ہوا سرکش اندھیرا سخت جاں ہے 

چراغوں کو مگر کیا کیا گماں ہے 

یقیں تو جوڑ دیتا ہے دلوں کو 

کوئی شے اور اپنے درمیاں ہے 

ابھی سے کیوں لہو رونے لگی آنکھ 

پس منظر بھی کوئی امتحاں ہے 

وہی بے فیض راتوں کا تسلسل 

وہی میں اور وہی خواب گراں ہے 

مرے اندر ہے اک پیاسا کنارہ 

مرے اطراف اک دریا رواں ہے 

شہناز نبی

عالم تاب تشنہ

 یوم پیدائش 20 اپریل 1935

وہ کہ ہر عہد محبت سے مکرتا جائے 

دل وہ ظالم کہ اسی شخص پہ مرتا جائے 

میرے پہلو میں وہ آیا بھی تو خوشبو کی طرح 

میں اسے جتنا سمیٹوں وہ بکھرتا جائے 

کھلتے جائیں جو ترے بند قبا زلف کے ساتھ 

رنگ پیراہن شب اور نکھرتا جائے 

عشق کی نرم نگاہی سے حنا ہوں رخسار 

حسن وہ حسن جو دیکھے سے نکھرتا جائے 

کیوں نہ ہم اس کو دل و جان سے چاہیں تشنہؔ 

وہ جو اک دشمن جاں پیار بھی کرتا جائے

عالم تاب تشنہ

شمسؔ ذبیحی بنارسی

 یوم پیدائش 15 اپریل 1923

شب قدر

مومنوں آئی ہے قسمت سے مناجات کی رات

ہو مبارک ہے شبِ قدر عبادات کی رات

جس نے بخشی ہے سلام اور تحیات کی رات

بھیجو کثرت سے درود اس پہ ہے صلوۃ کی رات

دیکھو انوارِ الہی کی تجلی ہر سو

لائی ہے نور ہی نور اہلِ سماوات کی رات

لطف معراج کا لے لو بخدا سجدے میں

 کی ہے ﷲ نے مخصوص ملاقات کی رات

قدر والے ہی شبِ قدر کی کرتے ہیں قدر

سونے کا نام نہیں جاگتے ہیں رات کی رات

خوابِ غفلت میں گنواتی ہے دن اپنا اُمّت

آقاﷺ سوئے نہیں اُمّت کے لیے رات کی رات

اے مرے دوستو تم ذکرِ الٰہی کے سوا

اور باتیں نہ کرو آج نہیں بات کی رات

حتی الامکان دل و جان سے تم قدر کرو

قابلِ قدر ہے یہ تحفہ و سوغات کی رات

شمسؔ ہوتی ہے میسّر اسی خوش قسمت کو

جسکی تقدیر میں ہے فضل و کمالات کی رات

 شمسؔ ذبیحی بنارسی

فہیم الدین احمد فہیم

 یوم پیدائش 19 اپریل 1877

یوں کہنے کو خنجر کو بھی خنجر ہی کہیں گے 

پر کیا تیرے ابرو کے برابر ہی کہیں گے

 

زاہد جو مزا مے میں یہاں پوچھ نہ ہم سے 

کہنا ہے جو کچھ وہ لب کوثر ہی کہیں گے

 

مانا نہ کریں وعدہ ہمیں بھی تو کہیں وہ 

گر کچھ نہیں حال دل مضطر ہی کہیں گے

 

سننے کی کوئی حد بھی ہے ہاں پوچھتے کیوں ہو 

ہم حال بھی اپنا سر محشر ہی کہیں گے

 

دو لفظوں میں کیوں کر ہو نہ سننا ہے نہ سنئے 

ہم کہنے کو بیٹھیں گے تو دفتر ہی کہیں گے

 

سننے کو تو کیا جانئے کیا کیا نہ سنیں گے 

کہنے کو تو حال دل مضطر ہی کہیں گے

 

اس میں تری مژگاں ہو کہ ہو گوشہ ابرو 

چبھ جائے جو دل میں اسے نشتر ہی کہیں گے

 

یوں کام کئے اس نے ہزاروں ہمیں کیا کام 

ہم آئنہ سازیٔ سکندر ہی کہیں گے 

تم نے بھی تو دیکھا ہے فہیمؔ اس کو کہو نہ 

ہم اپنی سی کہنے کو برابر ہی کہیں گے

فہیم الدین احمد فہیم

احمد علی برقیؔ اعظمی

 یاد رفتگا ں: بیاد بیدار مغزناول نگار مشرف عالم ذوقی مرحوم   پہلی برسی کی مناسبت سے

تاریخ وفات:  ۱۹ اپریل ۲۰۲۱

ایم اے ذوقی عہد حاضر کے تھے وہ ناول نگار

جن کی تخلیقات ہیں عصری ادب کا شاہکار

ایم اے ذوقی کا تھا معیاری ادیبوں میں شمار

ہر نئی تخلیق کا رہتا تھا سب کو انتظار

ذوقی تھے عصری ادب کی شخصیت اک عبقری

اردودنیا جن کے رحلت سے ہے ہر سو سوگوار

ان کی ادبی شخصیت تھی نازشِ برِصغیر

جتنے دانشور ہیں ان کے غم میں ہیں وہ دلفگار

اُن کی ہر تخلیق ہے آئینۂ نقد و نظر

ابن آدم کا عیاں ہے جس سے ذہنی انتشار

عہد حاضر میں تھے عصری آگہی کے وہ نقیب

درد کا رشتہ ہے اُن کے فکروفن سے آشکار

نبضِ دوراں پر نہایت سخت تھی ان کی گرفت

بحر ذخار ادب کی تھے وہ دُرِ شاہوار

سب کے ہیں ورد زباں اُن کے نقوش جاوداں 

گلشن اردو میں ان کی ذات تھی مثلِ بہار

اجتماعی زندگی کے ترجماں تھے اس لئے

عہد حاضر میں تھے وہ ناول نگاری کا وقار

لے لی کورونا وائرس نے آج برقیؔ ان کی جان

جن کے اقصائے جہاں میں قدرداں تھے بیشمار

احمد علی برقیؔ اعظمی

یاد رفتگاں بیاد ممتاز تخلیق کار مرحومہ تبسم فاطمہ شریک حیات مشرف عالم ذوقی مرحوم جو ان کے انتقال کے  فورا بعد ہی اس جہان فانی سے رخصت ہوگئیں

ایم اے ذوقی کی تبسم فاطمہ تھیں اہلیہ 

دونوں کے تھا درمیاں اک رشتہ مہر و وفا

دونوں تھے عہد رواں کی شخصیت  اک عبقری

ان  میں تھا یک جاان و دو قالب کا باھم رابطہ

دونوں کی تخلیق میں یکساں تھی عصری حسیت

ہوگئے کورونا کے وہ مہلک مرض میں مبتلا

ذوقی کی رحلت کا تھا ان پر اثر اتنا شدید

جان لیوا ہوگیا ان کے لئے یہ سانحہ

اس سے بڑھ کر اور کیا ہوگی محبت کی مثال

ان کے جاتے ہی جہاں سے  ہوگئیں وہ بھی جدا

جاتے ہی ان کے تبسم فاطمہ بھی چل بسیں

اس خبر سے ادبی دنیا میں تھے سب حیرت زدہ

جنت الفردوس میں درجات ہوں ان کے بلند

دونوں پر نازل وہاں ہوں رحمت و فضل خدا

ان کے غم میں ہیں سبھی اہل قلم برقی شریک

صدمہ جانکاہ ہے سب کے لئے یہ حادثہ

احمد علی برقیؔ اعظمی

رؤف رضا

 یوم پیدائش 18 اپریل 1954

قریب بھی تو نہیں ہو کہ آ کے سو جاؤ 

ستاروں جاؤ کہیں اور جا کے سو جاؤ 

تھکن ضروری نہیں رات بھی ضروری نہیں 

کوئی حسین بہانہ بنا کے سو جاؤ 

کہانیاں تھی وہ راتیں کہانیاں تھے وو لوگ 

چراغ گل کرو اور بجھ بجھا کے سو جاؤ 

طریقِ کار بدلنے سے کچھ نہیں ہوگا 

جو دور ہے اسے نزدیک لا کے سو جاؤ 

خسارے جتنے ہوئے ہیں وہ جاگنے سے ہوئے 

سو ہر طرف سے صدا ہے کے جا کے سو جاؤ 

یہ کار شعر بھی اک کار خیر جیسا ہے 

کے طاق طاق جلو لو بڑھا کے سو جاؤ 

اداس رہنے کی عادت بہت بری ہے تمہیں 

لطیفے یاد کرو ہنس ہنسا کے سو جاؤ

رؤف رضا

اے ڈی اظہر

 یوم پیدائش 18 اپریل 1900

اب نہ ہم چھوڑ کے جائیں گے تمہیں

اب تو سب دل کی بتائیں گے تمہیں

آج کی رات تو جی بھر کے ملو

پھر تو ہم یاد نہ آئیں گے تمہیں

کیسے گزرے گی تمہیں کیا معلوم؟

پاس جب اپنے نہ پائیں گے تمہیں

چھوڑ جاتے ہو جسے ویرانہ 

پھر اسی دل میں بسائیں گے تمہیں

کبھی فرصت جو ملے ، آجانا

قصہ درد سنائیں گے تمہیں

ہجر میں اور کریں گے ہم کیا؟

دل سے ہر لحظہ بھلائیں گے تمہیں

کاش ! وہ بھی تو کہیں مجھ سے کبھی

روٹھ جاؤ تو منائیں گے تمہیں

اپنے دل میں ہے بہت کچھ اظہر

یاد آ لے ، تو جتائیں گے تمہیں

اے ڈی اظہر

ندا فاضلی

 نزدیکیوں میں دور کا منظر تلاش کر

جو ہاتھ میں نہیں ہے وہ پتھر تلاش کر

سورج کے ارد گرد بھٹکنے سے فائدہ

دریا ہوا ہے گم تو سمندر تلاش کر

تاریخ میں محل بھی ہے حاکم بھی تخت بھی

گمنام جو ہوئے ہیں وہ لشکر تلاش کر

رہتا نہیں ہے کچھ بھی یہاں ایک سا سدا

دروازہ گھر کا کھول کے پھر گھر تلاش کر

کوشش بھی کر امید بھی رکھ راستہ بھی چن

پھر اس کے بعد تھوڑا مقدر تلاش کر

ندا فاضلی

قادر صدیقی

 پیدائش 1923

بیکار بھی اس دور میں بیکار نہیں ہے

دیوانہ ہے وہ کون جو ہشیار نہیں ہے

اس دور ترقی پہ بہت ناز نہ کیجے

اس دور میں سب کچھ ہے مگر پیار نہیں ہے

ہر چیز کی بہتات ہے اس دور میں لیکن

وہ چیز جسے کہتے ہیں کردار نہیں ہے

اس بات پہ ناراض ہیں نا خوش ہیں کھنچے ہیں

وہ بات کہ جس بات کا اظہار نہیں ہے

یہ بات ہے کچھ اور کہ دل زخمی ہے اس کا

صورت سے تو قادرؔ ترا بیمار نہیں ہے

قادر صدیقی

شفقت حیات

 اک مسلسل ہجر ہر پل ساتھ رہتا ہے مرے

جو جدا ہوتا نہیں وہ ہمسفر رکھتی ہوں میں

شفقت حیات

 #اردودکن #urdudeccan

وقاص احمد

 یوم پیدائش 16 اپریل 1996

دکھوں سے بڑھ کہ مجھے آنسوؤں کا رونا ہے

کہ آمدن سے زیادہ تو میرا خرچہ ہے

میں بے ارادہ کہیں اٹھ کے دوڑ پڑتا ہوں 

مرا وجود بھی شاید کسی کا سایہ ہے

ہمارے بیچ ہے پوجا سے تھوڑا کم شاید

ہمارے بیچ محبت سے کچھ زیادہ ہے

ہماری آنکھ میں ٹوٹا ہے بارہا اک خواب

ہماری آنکھ میں آنسو نہیں ہیں ملبہ ہے

یہ جسم خاک سے تعمیر کی گئی اک قبر

جو آئینے میں نظر آ رہا ہے کتبہ ہے

وقاص احمد

توحید زیب

 یوم پیدائش 16 اپریل 1999

زبان بند تھی پر ذہن منخسف نہیں تھا

یہی زمانہ تھا انسان منکشف نہیں تھا

کسی وجود نے توصیف فکر میں ڈالی

وگرنہ اس کا کوئی پختہ معترف نہیں تھا

نئی خزاں نے جگہ لے لی تھی گذشتہ کی

تمہارا غم غمِ دنیا سے مختلف نہیں تھا

یہ کائنات تضادات کا شکار ہوئی

ازل سے دیکھیں تو یہ دہر منخسف نہیں تھا

جو روبرو بھی تھا یکسر نہاں بھی رہتا تھا

خدا کے بعد کوئی ایسا منکشف نہیں تھا

مزاج مذہبی اور سوچ غیر مذہبی تھی

قدیم شخص سمجھدار معتکف نہیں تھا

توحید زیب

فرتاش سید

 یوم پیدائش 15 اپریل 1967

برسرِ کوچہء اغیار اٹھا لائے ہیں

یہ کہاں مجھ کو مرے یار اٹھا لائے ہیں

آپ پر وار ہوئے، میں نےوہ سینے پہ لیے

اور اب آپ بھی تلوار اٹھا لائے ہیں

ان کے اسلوبِ فضیلت سے پتا چلتا ہے

یہ کسی اور کی دستار اٹھا لائے ہیں

جب کھلا نامہء اعمال ، تو ہم پر یہ کھلا

جو اٹھا لائے ہیں بے کار اٹھا لائے ہیں

ریت میں پھول کھلانا ہمیں آتا ہے ، سو ہم

عرصہء دشت میں گھر بار اٹھا لائے 

اک ذرا سا بھی نہیں بارِ ندامت دل پر

زر نہیں ، دولتِ کردار اٹھا لائے ہیں

میں نہ یوسف ہوں، نہ سجاد ہوں فرتاش یہ لوگ

کیوں مجھے برسرِبازار اٹھا لائے ہیں

فرتاش سید

محمد نعیم اللہ خیالی

 یوم پیدائش 15 اپریل 1920

ستم کی تیغ چلی تیر بھی جفا کے چلے 

جو بات حق تھی سر دار ہم سنا کے چلے 

کچھ ایسی دور نہ تھیں منزلیں محبت کی 

وفور شوق میں ہم فاصلے بڑھا کے چلے 

جو آب و دانہ چمن سے اٹھا چمن والو 

ہر اک شاخ پہ ہم آشیاں بنا کے چلے 

اٹھے تو محفل رنداں سے تشنہ کام مگر 

قدم قدم پہ ہم ایک مے کدہ بنا کے چلے 

سلگ سلگ کے رہے جو دیا بجھا نہ سکے 

گئے تو جاتے ہوئے آگ وہ لگا کے چلے 

خیالیؔ شعر ہے کیا یہ تو اہل فن جانیں 

ہم اپنے دل کی بہ شکل غزل سنا کے چلے

محمد نعیم اللہ خیالی

ریشمہ زیدی

 یوم پیدائش 15 اپریل

حالات کے ماروں سے یوں موجِ بلا الجھے

جیسے کہ چراغوں سے رہ رہ کے ہوا الجھے

کچھ نظمِ چمن بدلے ہنگامہ بھی ہو برپا

گر شعلہ بیانوں سے بے بس کی صدا الجھے

خوشبو ہو فضاؤں میں خوش رنگ نظارے ہوں

دامانِ گلِ تر سے جب بادِ صبا الجھے

ہر شام اٹھاتی ہے سر تیرہ شبی اپنا

ہر رات اندھیرے سے شمعوں کی ضیا الجھے

یوں حرف نہ آجائے گلشن میں بہاروں پر

اب اور نہ پھولوں سے کانٹوں کی ردا الجھے۔

کیا ہوگا ذرا سوچو *ریشم* سرِ محفل جب

خود دار طبیعت سے گیسوۓ انا الجھے

ریشمہ زیدی

زبیر رضوی

 یوم پیدائش 15 اپریل 1935

بچھڑتے دامنوں میں پھول کی کچھ پتیاں رکھ دو

تعلق کی گرانباری میں تھوڑی نرمیاں رکھ دو

بھٹک جاتی ہیں تم سے دور چہروں کے تعاقب میں

جو تم چاہو مری آنکھوں پہ اپنی انگلیاں رکھ دو

برستے بادلوں سے گھر کا آنگن ڈوب تو جائے

ابھی کچھ دیر کاغذ کی بنی یہ کشتیاں رکھ دو

دھواں سگرٹ کا بوتل کا نشہ سب دشمن جاں ہیں

کوئی کہتا ہے اپنے ہاتھ سے یہ تلخیاں رکھ دو

بہت اچھا ہے یارو محفلوں میں ٹوٹ کر ملنا

کوئی بڑھتی ہوئی دوری بھی اپنے درمیاں رکھ دو

نقوش خال و خد میں دل نوازی کی ادا کم ہے

حجاب آمیز آنکھوں میں بھی تھوڑی شوخیاں رکھ دو

ہمیں پر ختم کیوں ہو داستان خانہ ویرانی

جو گھر صحرا نظر آئے تو اس میں بجلیاں رکھ دو

زبیر رضوی

ساجد امجد

 یوم پیدائش 14 اپریل 1949

شکستہ دل تھے ترا اعتبار کیا کرتے 

جو اعتبار بھی کرتے تو پیار کیا کرتے 

ذرا سی دیر کو بیٹھے تھے پھر اٹھا نہ گیا 

شجر ہی ایسا تھا وہ سایہ دار کیا کرتے 

شب انتظار میں دن یاد یار میں کاٹے 

اب اور عزت لیل و نہار کیا کرتے 

کبھی قدم سفر شوق میں رکے ہی نہیں 

تو سنگ میل بھلا ہم شمار کیا کرتے 

ستم شناس محبت تو جاں پہ کھیل گئے 

نشانۂ ستم روزگار کیا کرتے 

ہماری آنکھ میں آنسو نہ اس کے لب پہ ہنسی 

خیال خاطر ابر بہار کیا کرتے 

وہ ناپسند تھا لیکن اسے بھلایا نہیں 

جو بات بس میں نہ تھی اختیار کیا کرتے 

درون خانۂ دل کیسا شور ہے ساجدؔ 

ہمیں خبر تھی مگر آشکار کیا کرتے

ساجد امجد

شاھین کاظمی

 یوم پیدائش 14 اپریل

جب سے پلٹا تھا تُو من میں رنجش لیے

 دل سلگتا رہا ایک تابش لیے

کھا گئی لفظ لہجے کی تلخی مگر

معنی بیٹھے رہے بس گزارش لیے

آنکھ دامن میں بھر کے مناظر سبھی

 چل پڑی ساتھ صدیوں کی بارش لیے

رات بہتی رہی پھر اُفق تا اُفق

اِک مرادوں بھرے دن کی خواہش لیے

وقت کا دائرہ ٹوٹتا ہی نہیں

لمحہ لمحہ، نئی آزمائش لیے

شاھین کاظمی

میتالی راج تیواری

 یوم پیدائش 11 اپریل 1995

مکمل موت سے پہلے مرا تم خواب ہو جاؤ 

مری آنکھوں کے کوروں پر ٹھہرتا آب ہو جاؤ 

تمہیں بس دیکھنے بھر کو جگر چوکھٹ پہ رکھنا ہو 

اجازت رب سے لینی ہو یوں تم نایاب ہو جاؤ 

کوئی دیکھے نہیں تم کو کوئی چھو بھی نہیں پائے 

مرے سینے میں چھپ جاؤ مرا گرداب ہو جاؤ  

مرا آغاز ہو تم سے تمہیں پر ختم ہوؤں میں 

محبت کے صحیفے میں وفا کا باب ہو جاؤ

میتالی راج تیواری

شبنم عشائی

 یوم پیدائش 12 اپریل 1962

نظم زندگی کی سگریٹ 

تمہارے ساتھ پینے کی خاطر 

میں نے اپنے سوچنے کی صلاحیت 

تمہارے نام کر دی تھی 

اور وہ تمام مکھوٹے 

تمہارے کمرے میں سجا دئے تھے 

جنہیں تم نے عمر بھر 

شکار کیا تھا 

میں اپنی ساری خوشبوئیں 

خرچ کر کے 

تمہارا پورا درد خرید رہی تھی 

لیکن تم نے آنکھوں پر ہی نہیں 

دماغ پر بھی پٹی باندھ رکھی تھی 

سڑک حادثے کے بعد 

میرا پلستر چڑھتے سمے 

جو تم نے ایک لمحے کو 

اپنی آنکھوں کی پٹی کھول دی تھی 

تمہارا سر جھک گیا تھا 

مجھے معلوم تھا میں تمہیں کھو دوں گی 

جو کھو جاتا ہے 

اس کے کھونے کا افسوس گانٹھ بن جاتا ہے 

میں اگرچہ ہل نہیں سکتی تھی 

سوچنے سے محروم نہیں تھی 

اور دنیا سوچنے سے عبارت ہے 

میری آنکھیں سوج گئی تھیں بند نہیں تھیں 

اور کانوں میں وہ سب آوازیں آ رہی تھیں 

جب تم میرے حافظے کے مفلوج ہو جانے کا اعلان کر رہے تھے 

میں دیکھ رہی تھی 

لوگ تمہاری طرف متوجہ ہوئے تھے 

لیکن تمہارے دماغ پہ لگائی ہوئی پٹی 

سب کو نظر آ گئی تھی 

تم جان لو کہ دنیا سوچنے سے عبارت ہے 

اب زندگی کی سگریٹ صرف میں پیوں گی 

اور تم سگریٹ کی راکھ کی طرح 

میری انگلیوں سے جھڑتے رہوگے 

 

شبنم عشائی

ممتاز عزیز نازاں

 یوم پیدائش 11 اپریل 1964

تا عمر سفر کر کے یہ ہم نے کمایا ہے

دو قطرے ہیں شبنم کے اک دھوپ کا ٹکڑا ہے

بخشے ہیں مقدر نے ہم کو جو ستارے دو

اک مہر کا پرتو ہے اک چاند کا سایا ہے

الفت ہو کہ نفرت ہو تصویر کے دو رخ ہیں

دم توڑتی الفت نے نفرت کو جگایا ہے

خوشیاں نہ سہی غم ہی اپنا ہی تھا کہنے کو

اب یہ بھی بھرم ٹوٹا صحرا ہے نہ سایا ہے

ممتاز عزیز نازاں

معین گریڈ یہوی

 یوم پیدائش 12اپریل 1969

بنائےہرطرف ایسی فضا دیکھو

ہونفرت کی محبت ہی دوا دیکھو

اکیلے گھر سے نہ نکلا کرو تم

بہت بگڑی ہے دنیا کی ہوا دیکھو

کسی کو پوچھنے والا نہیں کوئی

زمانہ ہو گیا کتنا برا دیکھو

عدالت سے رہائی پاگیا ظالم

یہاں مظلوم سولی پر چڑھا دیکھو

کبھی پردیس میں بھوکا نہیں سویا

رہی شامل مری ماں کی دعاء دیکھو

یہ میرے عہد کا بیٹا ارے بابا

کہے وہ ماں کو بڑھیا‘ بے حیا دیکھو

وطن کے واسطے میں سر کٹا دوں گا

جہاں والو! یہ میرا حوصلہ دیکھو

کدھر اخلاق ملت ڈھونڈھتے ہو تم

’’ادھر آؤ فریب ارتقاء دیکھو

محبت پیار کی باتیں نہیں چھیڑو

مجھے چھوڑو جی کوئی دوسرا دیکھو

معین گریڈ یہوی

غنی غیور

 یوم پیدائش 12 اپریل 1962

باغی حدود سے بہت آگے نکل گئے 

سورج چھوا نہ تھا کہ مرے ہاتھ جل گئے 

یہ حیرتوں کے بیچ میں حیرت زدہ نقوش 

کیسے تماشبین تھے پتھر میں ڈھل گئے 

جذبات میں کچھ اس طرح اس کا بدن تھا سرخ 

زنجیر آہنی کے کڑے ہی پگھل گئے 

بگلوں سے ان کے روپ بھگت بن کے آئے کچھ 

مکھی کو یار چھوڑ کے ہاتھی نگل گئے 

ٹیلے سے قہقہوں کی پھواروں میں تھے غنیؔ 

تیر ایک آنکھ والے اچانک اچھل گئے

غنی غیور۔ 

سید معراج جامی

 یوم پیدائش 12 اپریل 1955

زندگی کیا ہر قدم پر اک نئی دیوار ہے 

تیرگی دیوار تھی اب روشنی دیوار ہے 

کیوں بھٹکتے پھر رہے ہیں آج ارباب خرد 

کیا جنوں کے راستے میں آگہی دیوار ہے 

بچ نہیں سکتی تغیر کے اثر سے کوئی شے 

پہلے سنتی تھی مگر اب دیکھتی دیوار ہے 

ہم تو وابستہ ہیں ایسے دور سے جس دور میں 

آدمی کے راستے میں آدمی دیوار ہے 

جذبۂ جہد و عمل سے زندگی کوہ گراں 

بے عمل ہو زندگی تو ریت کی دیوار ہے 

آج اپنے دشمنوں سے کھل کے لڑ سکتا نہیں 

دشمنی کے راستے میں دوستی دیوار ہے 

روح کیوں مضطر نہ ہو جامیؔ حریم جسم میں 

جس طرف بھی دیکھتی ہے آہنی دیوار ہے

سید معراج جامی

عابد عمر

 یوم پیدائش 12 اپریل 1977

یقیں نہیں تھا کسی پہ مجھ کو سو راستے میں ٹھہر گیا ہوں

وگرنہ ماضی میں جس نے مجھ سے جدھر کہا میں ادھر گیا ہوں

میں بے وجہ تو نہیں چھپاتا جہان بھر سے شناخت اپنی

ہزار عیبوں سے واسطہ ہے تبھی تو خود سے مکر گیا ہوں

تلاشِ بسیار پر بھی دھڑکن کا مل سکا نہ سراغ کوئی

ہوں ایک مدت سے مخمصے میں ابھی ہوں زندہ کہ مر گیا ہوں

عمر حقائق سے آشنائی عجب اذیت سی دے رہی ہے

وہ آئینے سے ڈرا ہوا ہے میں اپنے سائے سے ڈر گیا ہوں

عابد عمر

واحد نظیر

 یوم پیدائش 12 اپریل 1968

آج میں ایسے حمد زار میں تھا 

اک تحیّر ہر اک نگار میں تھا 

چھو کے جس گل کو لوگ راکھ ہوئے 

میں بقا کی اسی قطار میں تھا

عزم تھا قافلے کے قدموں میں 

دشت روندا ہوا غبار میں تھا

گیسوؤں میں بھی بے نمک ہی رہا

 آبِ شور ایسا آبشار میں تھا 

شہر پاگل تھا شہر یاروں میں 

میں وہاں کب کسی شمار میں تھا

فتح دنیا کو کر رہا تھا میں

اور یمیں نرغۂ یسار میں تھا 

خلق تھی دامِ اعتبار میں اور

شاہ مصروف لوٹ مار میں تھا 

گردشِ آسماں نہ تھی اب کے 

آسماں خود ہی گردبار میں تھا 

حرف تفصیل کے اشارے تھے

کیا ہنر اس کے اختصار میں تھا

عکس تھے اس کے آئنہ تمثال

شعر پھر میر کے دیار میں تھا

 یوں کہیں گے کبھی نظیر نظر

کچھ سلیقہ تو خاکسار میں تھا

واحد نظیر