ثریا جبیں قادری

یوم پیدائش 08 اپریل 1941

نظم اردو زبان

مہہ لقا ، اے دل ربا ، اے ریختی تجھ کو سلام

مہہ جبیں، اے دل نشیں اے نازنیں تجھ کو سلام

تاجروں اور صوفیوں کے ساتھ عربی فارسی

ہند ساگر طے کیا پھر سنسکرت سے مل گئی

کچھ زبانیں ہند کی جب ہوگئی تھیں ایک ساتھ

گفتگو ہونے لگی تو بن گئی اردو زباں

شاعری ہو، نثر ہو یا پھر کوئی مضمون ہو

خوبصورت اس طرح ہونے لگی اردو زباں

میر نے اس کو سنوارا ، خسرو نے پالا اسے

جام و مینا بھر لیے غالب نے اس کے عشق میں

شاعری ، گیتوں کی دھن ، کہکشاں چنتی ہے یہ

نکہت و رعنائیاں آہ و بقا بنتی ہے یہ

مسکراتی چاندنی یا چلچلاتی دھوپ ہو

آنکھ میں آنسو بھرے پوں یا دلِ غمگین ہو

دوستو کی دوست ہو ، اہلِ وطن کی ہم نوا

دل میں بستی ہے سبھی کے ، جاوداں اس کی ادا

ہند میں پیدا ہوئی سارے جہاں کی لاڈلی

پھر بھی اب تک مل نہیں پایا اسے جائز مقام

کہہ رہی ہے اب جبیں ، صد آفریں اردو زباں

صد آفریں اردو زباں ، صد آفریں اردو زباں

ثریا جبیں قادری

 

راحیل فاروق

یوم پیدائش 08 اپریل 1986

پختہ ہونے نہ دیا خام بھی رہنے نہ دیا 

عشق نے خاص تو کیا عام بھی رہنے نہ دیا 

ہائے رے گردش ایام کہ اب کے تو نے 

شکوۂ گردش ایام بھی رہنے نہ دیا 

کوئی کیوں آئے گا دوبارہ تری جنت میں 

دانہ بھی چھین لیا دام بھی رہنے نہ دیا 

عیش میں پہلے کہاں اپنی بسر ہوتی تھی 

یاد نے دو گھڑی آرام بھی رہنے نہ دیا 

دل کو آوارگیاں دور بہت چھوڑ آئیں 

ذکر خیر ایک طرف نام بھی رہنے نہ دیا 

وہی زنجیر ہے تیرے بھی گلے میں راحیلؔ 

جس نے سورج کو لب بام بھی رہنے نہ دیا

راحیل فاروق

 

آغا ظفر احمد

یوم پیدائش 07 اپریل 1940

آج ان کی بزم میں اپنے ذرا لب کھولیے

ان سے کھل کر بات کیجے ، چپ نہ رہیے ، بولیے

سادگی سے کتنی ہم راہِ وفا پر ہولیے

وہ ملے تو ہنس لیے جب وہ گئے تو رولیے

جالیا ہم نے بھی منزل کو پر اس انداز سے

بے خودی میں چل پڑے جب ہوش آیا ہولیے

خوشنما تھے کس قدر وہ خار ، اکثر ہم نے جو

عشق کی راہوں سے چن کر اپنے دل میں بو لیے

آخرش دیوانگی کو ہم نے اپنا ہی لیا

آخرش عقل و خرد سے ہاتھ اپنے دھو لیے

ان کٹھن راہوں پہ بھی ہم مسکراتے ہی رہے

جب ہزاروں غم کے ساتھی ساتھ اپنے ہولیے

زندگی کی راہ میں جب آئے کچھ دلکش مقام

ہم ذرا سی دیر ٹھہرے اور آگے ہولیے

خار بن کے زندگی بھر روح میں چبھتے رہے

ہم نے رومانوں کی پھلواری سے غنچے جو لیے

آنسوؤں کے پاک سرچشموں پہ ہم نے بارہا

حسرتوں کے اور تمناؤں کے دامن دھو لیے

ان تضادوں سے ہی لطفِ زندگی قائم رہے

روتے روتے ہنس پڑے اور ہنستے ہنستے رولیے

فصلِ گل کے اوّلیں رنگیں شگوفوں میں ظفر

آپ بھی اپنی بیاضِ شاعری کو کھو لیے

آغا ظفر احمد

 

رضیہ صدیقی بصیر

یوم پیدائش 07 اپریل 1946

ممکن نہیں الفت کا ہو اظہار غزل میں

کرتی ہوں مگر بات میں ہر بار غزل میں

بھیجا تو ہے خط اس نے مگر سادہ ورق ہے

انکار غزل میں ہے نہ اقرار غزل میں

صحرا کا فسانہ ہو یا جنگل کی کہانی

یہ تذکرے بن جاتے ہیں گلزار غزل میں

اس دور کا حاصل ہے فقط ضبطِ قلم ہی

ہے سوز نہ اب ساز نہ جھنکار غزل میں

ہے غور طلب بات یہی بزمِ سخن میں

بازاروں میں غزلیں ہیں کہ بازار غزل میں

رضیہؔ ہو مبارک تمہیں معراجِ سخن یہ

فطرت کا نظر آتا ہے کردار غزل میں

رضیہ صدیقی بصیر

 

پونم یادو

یوم پیدائش 07 اپریل 1984

کوئی بھی ارمان نہیں ہے 

یوں جینا آسان نہیں ہے 

آہیں اندر گھٹ جاتی ہیں 

دل میں روشن دان نہیں ہیں 

چھوڑو بھی اب ان قصوں کو 

ان قصوں میں جان نہیں ہے 

بات چھپانا سیکھو صاحب 

کس گھر میں طوفان نہیں ہے 

اب بھی تیرا حصہ ہوں میں 

بس تجھ کو ہی دھیان نہیں ہے 

جب تب خواہش اگ آتی ہیں 

دل ہے ریگستان نہیں ہے 

میں اک ایسا افسانا ہوں 

جس کا کچھ عنوان نہیں ہے

پونم یادو

 

ابوزر ہاشمی

یوم پیدائش 06 اپریل1957

سلگتے صحرا کا میں مسافر مری غزل بھی ہے آتشیں سی

مہکتے لمحوں کا ذکر چاہو تو تم کو میرا سلام لوگو

ابوزر ہاشمی

 

شریش چند شوق

یوم پیدائش 05 اپریل 1938

ترے سلوک کا چاہا تھا تجزیہ کرنا

تمام عمر میں الجھا رہا سوالوں میں

شریش چند شوق

 

محمد علی طارق

یوم پیدائش 05 اپریل 1971

عشق میں اس کے مبتلا نہ ہوا

دل کا سودا ہوا ،ہوا نہ ہوا

وہ مسافر بھی کیا مسافر تھا

جو جدا ہو کے بھی جدا نہ ہوا

پارساؤں کے ساتھ رہ کر بھی

ہائے کمبخت پارسا نہ ہوا

کیسے تم اس کے ہوگئے یارو

جو مرا ہوکے بھی مرا نہ ہوا

راہِ دشوار اور تنہائی

پھر بھی کم دل کا حوصلہ نہ ہوا

محمد علی طارق

 

بلال راز

یوم پیدائش 05 اپریل 1994

کیا ہے بارہا اس کا بھی تجربہ ہم نے

بھلائی کرکے سُنا ہے بُرا بھلا ہم نے

زمانہ داغ ہمارے دکھا رہا تھا ہمیں

دکھا دیا ہے زمانے کو آئینہ ہم نے

ہماری راہ میں کانٹے بچھائے تھے جس نے

اُسی کو بھیجا ہے پھولوں کا ٹوکرا ہم نے

اندھیرے ہم سے خفا ہو گئے ہیں دنیا کے

کہ اک چراغ سے رشتہ بنا لیا ہم نے

تھے کیسے لوگ وطن سے جو کر گئے ہجرت

خطا تھی اُن کی مگر پائی ہے سزا ہم نے

تو اُس بدن کی مہک ساتھ کیوں نہیں لائی

تجھی کو سونپا تھا یہ کام اے صبا ہم نے  

ہمارے شعروں سے سب رازؔ کھُل گیا ورنہ

چُھپا کے رکھا تھا دل کا معاملہ ہم نے

بلال راز

 

عاصم عاصی

یوم پیدائش 04 اپریل 1976

ہر دل کی تڑپ روح کا سامان ہمِیں تھے 

اس شہرِ طلسمات کے سلطان ہمیں تھے 

ہر چشمِ فروزاں میں عیاں تاب تھی اپنی 

ہر اُلجھی ہوئی زُلف کے پُرسان ہمیں تھے 

کھِلتے تھے خزاں دیدہ چمن دیکھ کے جس کو 

اس نقشِ لطافت کی فقط جان ہمیں تھے 

ہر کوئی طلب گارِ جوئے مالِ غنیمت 

ویرانئ گلشن پہ پریشان ہمیں تھے 

آئے نہ سمجھ اپنی طبیعت کے تقاضے 

سب پا کے بھی اُس شہر میں ویران ہمیں تھے 

ہر پیکرِ ذیشان ہی سجدے میں پڑا تھا 

خوش فہمئ شیطان کا نقصان ہمِیں تھے 

سب لوگ ہی عاصیؔ تھے پُجاری تھے ہوس کے

بس حُسنِ طرح دار پہ قربان ہمیں تھے

عاصم عاصی

 

آزاد جرولی

یوم پیدائش 04 اپریل 

تیری محفل میں موجود سب ہیں ترے جام کے منتظر

ساقیا ہم مگر ہیں یہاں ایک گمنام کے منتظر

سچ ہے مدت سے انکی نہیں کچھ خبر ہے ملی ہاں مگر

یہ بھی سچ ہے سدا ہم رہے انکے پیغام کے منتظر

صبح سے پوچھتا ہوں میں ان سے مگر کچھ بتاتے نہیں

جانے کیا بات ہے آج ہیں صبح سے شام کے منتظر

حاکمِ وقت کے کان میں یہ خبر آپ ڈالیں ذرا

آج بھی شہر میں کتنے مزدور ہیں کام کے منتظر

کیا سبب ہے قمرآج نکلا نہیں بس یہی سوچ کر

ہم زمیں پر کھڑے کب سے ہیں رونق بام منتظر

آپ کا شکریہ آپ آئے تو یہ شام دلکش ہوئی

مدتوں سے تھے ہم ایسی ہی اک حسیں شام کے منتظر

دیکھیے کس کو آزاد ملتا ہے کیا اس کے دربار سے

لے کے حسرت کھڑے ہم بھی صف میں ہیں انعام کے منتظر

آزاد جرولی

 

شاہدریاض عباس

یوم پیدائش 04 اپریل 1981

بے خطر سارا سفر اور بے ضرر سا راستہ

تم سمجھتے ہو کہ ہے یہ انبیا کا راستہ

چوک تم سےہو گئی ہے مصلحت کے چوک پر

سہل رستہ دیکھ کر چھوڑا جو سیدھا راستہ

کچھ سناؤ اس تذبذب کی گلی کی داستاں

کس نے رکھا یاد اور پھر کون بھولا راستہ؟

راہِ حق میں درہِ جاں سے گزر کر دوستو

ایک لمحے میں سمیٹو عمر بھر کا راستہ

ایک لمحے کیلئے خود موت سے جاکر ملو

زندگی سے پھر ملا دو زندگی کا راستہ

یاس کی شاموں میں جب تشکیک کی آندھی چلے

لا الہ کے نور سے پھر دیکھ لینا راستہ

دستِ موسی اور پھر زورِ عصا بھی چاہیے

ہر کس و نا کس کو کب دیتا ہے دریا راستہ

پیر ، ملا اور لیڈر کے مقلد کیا بنے

پھرنہ کھولیں اپنی آنکھیں پھر نہ دیکھا راستہ

شاہدریاض عباس

محمد فیضی

یوم پیدائش 04 اپریل

نقشہء خاک سجانے کے لئے آپؐ آئے

روح کی روح جگانے کے لئے آپؐ آئے 

بوجھ ایسا کہ پہاڑوں سے نہیں اٹھتا تھا

وہ کڑا بوجھ اٹھانے کے لئے آپؐ آئے

آپ آئے تو بہت تیرہ و تاریک تھے دل

نور پر نور دکھانے کے لئے آپؐ آئے 

آپؐ جب آئے تو پھر اور نہ آیا کوئی 

یعنی ہر ایک زمانے کے لئے آپؐ آئے 

ایک آدم کہ بنایا تھا خدا نے جس کو

اس کو انسان بنانے کے لئے آپؐ آئے 

محمد فیضی

 

بابر علی اسد

یوم پیدائش 04 اپریل 

ہر ایک لب پہ نہ آ ، سب کی التجاء تو نہ بن

تو مہربان بھلے رہ مگر خدا تو نہ بن 

طلب کی سانس پہ کھل اے مشام ِ جاں کی مہک 

یوں اپنا آپ نہ کھو شہر کی فضا تو نہ بن 

جو تجھ کو سوچ کے بولے ، ہو منکشف اس پر 

زباں دراز کسی شخص کا کہا تو نہ بن  

تجھے کہیں کا نہ چھوڑے گا انفراد کا شوق 

تو اپنے آپ سا لگ ، خود سے ماورا تو نہ بن 

بابر علی اسد

 

منظر نقوی

یوم پیدائش 04 اپریل 

سچ کو جھوٹ بنا جاتا ہے بعض اوقات 

بندہ ٹھوکر کھا جاتا ہے بعض اوقات 

گھر کی چھت پر رم جھم بارش جلتی دھوپ 

یہ موسم بھی آ جاتا ہے بعض اوقات 

اچھی قسمت اچھا موسم اچھے لوگ 

پھر بھی دل گھبرا جاتا ہے بعض اوقات 

روزانہ تو رات گئے گھر آتا ہے 

شام سے پہلے آ جاتا ہے بعض اوقات 

جیت کے مجھ سے اتنا کیوں اتراتے ہو 

ہار کے بھی جیتا جاتا ہے بعض اوقات 

تم نے ناحق رونے کا الزام دیا 

آنکھ میں پانی آ جاتا ہے بعض اوقات 

منظرؔ میٹھی باتیں بھی تو کرتا ہے 

کڑوے بول سنا جاتا ہے بعض اوقات

منظر نقوی

 

شازیہ قمر

یوم پیدائش 04 اپریل 

ہر ایک اہل چمن کیوں نہ پھر ہراس میں ہو

جب ایک سانپ کی آمد و رفت گھانس میں ہو

نگاہ شک کی ہر اک محترم پہ رکھنا ضرور

کوئی رجیم فرشتوں کے سے لباس میں ہو

نوازشات ، عنایات ، مہربانی کرم

غرض چھپی ہوئی شاید کہ التماس میں ہو

محل وہ رشتوں کا ہوگا نہیں کبھی زمیں بوس

خلوص و انس کا جذبہ اگر آساس میں ہو

دھیان رکھے گا قرب و جوار پر اپنے

طلب ہے جسکی وہ شاید کہ اس پاس میں ہو

غرور شازیہ کرتی ہوں اپنے بخت پہ جب 

مرا وجود کسی کی نگاہ خاص میں ہو

شازیہ قمر

 

اختر امام رضوی

یوم پیدائش 04 اپریل 1937

دنیا بھی پیش آئی بہت بے رخی کے ساتھ 

ہم نے بھی زخم کھائے بڑی سادگی کے ساتھ 

اک مشت خاک آگ کا دریا لہو کی لہر 

کیا کیا روایتیں ہیں یہاں آدمی کے ساتھ 

اپنوں کی چاہتوں نے بھی کیا کیا دیئے فریب 

روتے رہے لپٹ کے ہر اک اجنبی کے ساتھ 

جنگل کی دھوپ چھاؤں ہی جنگل کا حسن ہے 

سایوں کو بھی قبول کرو روشنی کے ساتھ 

تم راستے کی گرد نہ ہو جاؤ تو کہو 

دو چار گام چل کے تو دیکھو کسی کے ساتھ 

کوئی دھواں اٹھا نہ کوئی روشنی ہوئی 

جلتی رہی حیات بڑی خامشی کے ساتھ

اختر امام رضوی

 

عمران راقم

یوم پیدائش 02 اپریل 1973

وہ کیا کریں کہ اپنی حماقت سے تنگ ہیں 

جو لوگ میری ذات کی شہرت سے تنگ ہیں 

راہ طلب میں خیر و خبر کس کی کون لے 

سب لوگ اپنی اپنی ضرورت سے تنگ ہیں 

کترا رہا ہے ہر کوئی اپنوں سے غیر سے 

جو مل گئے تو سب کی شکایت سے تنگ ہیں 

تاریکیاں گھنیری ہیں جگنو بھی کیا کرے 

رستے اندھیری رات کی ظلمت سے تنگ ہیں 

کیا ہی مزے کی بات ہے راقمؔ یہاں کے لوگ 

خوددار آدمی کی شرافت سے تنگ ہیں 

عمران راقم

رمیشا قمر

یوم پیدائش 02 اپریل 

عجز و خلوص جب مرے پیکر میں آ گیا

سارا کمال پھر مرے دفتر میں آ گیا

دل کا تھا باب گرچہ مقفّل وہ اجنبی

"دستک دیے بغیر مرے گھر میں آگیا"

اس آسماں نے مجھ پہ مصیبت جو توڑ دی

میرا وجود کرب کے محور میں آگیا

میں منتظر رہی کوئی مشقِ ستم تو ہو

وہ مصلحت شناس کہ لشکر میں آگیا

میری وفا پہ تم کو جو کچھ اعتبار تھا

تو کیسا انقلاب یہ تیور میں آگیا؟

وہ میری زندگی کی تمنا، وہ میری جان

بگڑا تو پھر زمانے کی ٹھوکر میں آگیا

میرے ہر ایک لفظ، مری سوچ کا محل

بے لوث آج دامنِ دلبر میں آگیا

کس کو رمیشا ؔدرد کا انبار چاہیے

جتنا ہنود قسمتِ دختر میں آگیا

رمیشا قمر

سلمان منیر خاور

یوم پیدائش 02 اپریل 1992

کسی کا بدتر کسی کا اچھا گزر رہا ہے

یہ وقت ہے اور ازل سے ایسا گزر رہا ہے

ہزار عاشق خدا سے محوِ دعا ہوئے ہیں

فلک پہ ٹوٹا ہوا ستارا گزر رہا ہے

رقیب میرے نے اسکو ٹھکرا دیا ہے شاید

وہ آج میری گلی سے تنہا گزر رہا ہے

یہ نم تمہاری نگاہ سے بھی بہے گا اک دن

جو میری آنکھوں سے رفتہ رفتہ گزر رہا ہے

یہ ریل گاڑی کی چین کھینچو مجھے اتارو

یہ کیا مصیبت ہے میرا رستہ گزر رہا ہے

تمہیں پتا ہے تمہارا سلمان خوش نہیں ہے؟

تمہیں پتا ہے جو اس پہ صدمہ گزر رہا ہے؟

سلمان منیر خاور

 

آفتاب نعمانی

یوم پیدائش 01 اپریل 1970

شامِ غم کو رات بھر کا آسرا مل جائے گا

شہر میں کوئی نہ کوئی در کھلا مل جائے گا

سر سے پا تک اَٹ گیا ہوں راستے کی دھول میں

میں نے یہ سوچا تھا تیرا نقشِ پا مل جائے گا

شب گئے تک میں نہیں لوٹا تو میرے ہم سفر

غم کے خالی پن سے غم دہلیز کا مل جائے گا

میں نے کتنے موڑ کاٹے ہیں اسی امید پہ

زندگی شاید کہیں تیرا پتا مل جائے گا

غم کے دریاؤں کا رخ تنہا مری جانب نہیں 

اور بھی کوئی یہاں ہنستا ہوا مل جائے گا

 میں زمیں سے آسمانوں تک گیا ہوں آفتاب

کیا وہی جو پہلے میرے ساتھ تھا مل جائے گا

آفتاب نعمانی

سہیل عثمانی

یوم پیدائش 01 اپریل 1973

ہر گھڑی اک نئی سونامی ہے 

یہ سیاست بڑی حرامی ہے 

سہیل عثمانی

 

عطیہ داؤد

یوم پیدائش 01 اپریل 1958

نظم بھروسے کا قتل

مذہب کی تلوار بنا کر 

خواہشوں کے اندھے گھوڑے پر سوار 

میرے من آنگن کو روند ڈالا 

میرے بھروسے کو سولی پر ٹانگ کر 

تم نے دوسرا بیاہ رچا لیا

تمہارے سنگ گزارے پل پل کو 

میں نے اپنے ماس پر کھال کی طرح منڈھ لیا تھا 

تمہارے ساتھ آنچل باندھ کر 

بابا کا آنگن پار کر کے 

تمہارے لائے سانچے میں 

میں نے پایا تھا اپنا وجود 

پیار کیا ہے یہ نہیں جانتی 

پر تمہارے گھر نے بڑ کے پیڑ سی چھاؤں کی تھی مجھ پر 

بچایا تھا زمانے کے گناہوں کے 

تیروں کی بوچھاڑ سے 

اس سانچے میں رہنے کی خاطر 

میں اپنے وجود کو کاٹتی چھانٹتی تراشتی رہی 

تمہارے لہو کی بوند کو اپنے ماس میں جنم دیا 

اولاد بھی ہم دونوں کا بندھن نہ بن سکی 

بندھن کیا ہے یہ نہیں جانتی 

مجھے فقط ایک سبق پڑھایا گیا تھا 

تمہارا گھر میری آخری پناہ گاہ ہے 

میں نے کئی بار دیکھا ہے 

زمانے کی نگاہوں سے سنگسار ہوتے 

طلاق یافتہ عورت کو 

اس لیے بارش سے ڈری بلی کی طرح 

گھر کے ایک کونے اور تمہارے نام کے استعمال پر 

قناعت کیے بیٹھی رہی 

جنت کیا ہے جہنم کیا ہے یہ نہیں جانتی 

مگر اتنا یقین ہے 

جنت بھروسے سے بالاتر نہیں 

اور جہنم سوت کے قہقہوں سے بڑھ کر گراں نہیں 

طعنوں اور رحم بھری نظروں سے بڑھ کر مشکل 

کوئی پل صراط نہیں 

کبھی کبھی سوت کا چہرہ مجھے اپنا جیسا لگتا ہے 

اس کی پیشانی پر بھی 

میں نے بے اعتباری کی شکنیں دیکھی ہیں 

جب وہ مجھے دیکھتی ہے 

خوشی اس کے سینے میں 

ہاتھوں میں دبائے کبوتر کی طرح پھڑ پھڑا اٹھتی ہے 

میں ان سے لڑ نہیں سکتی 

ان میں تم شامل ہو 

میں تم سے لڑ نہیں سکتی 

مذہب قانون اور سماج تمہارے ساتھ ہیں 

ریتیں رسمیں تمہارے ہتھیار ہیں 

دل چاہتا ہے کہ زندگی کی کتاب سے 

وہ باب ہی پھاڑ کر پھینک دوں 

جو اپنے مفاد میں تم نے 

میرے مقدر میں لکھا ہے 

عطیہ داؤد 

 

آصف علی آصف

یوم پیدائش 01 اپریل 1988

دوسروں سے سوا سمجھتے ہیں

ہم تجھے با خدا سمجھتے ہیں

اور کچھ بھی سمجھ نہیں آتا

آپ کا ہر کہا سمجھتے ہیں

رب کی ساری نشانیوں میں ہم

آدمی کو بڑا سمجھتے ہیں

تو جو ہم پر ہے معترض واعظ

ہم ترا مسئلہ سمجھتے ہیں

جو لطافت ہے بزم رنداں میں

وہ کہاں پارسا سمجھتے ہیں

دل کو یکسر جو نور سے بھر دے

ہم اسے پیشوا سمجھتے ہیں

ہم میں آصف یہی برُائی ہے

ہم برے کو برا سمجھتے ہیں

آصف علی آصف

نصیر احمد ناصر

یوم پیدائش 01 اپریل 1954

ستارہ شام سے نکلا ہوا ہے

دیا بھی طاق میں رکھا ہوا ہے

کوئی نیندوں میں خوشبو گھولتا ہے

دریچہ خواب کا مہکا ہوا ہے

کہیں وہ رات بھی مہکی ہوئی ہے

کہیں وہ چاند بھی چمکا ہوا ہے

ابھی وہ آنکھ بھی سوئی نہیں ہے

ابھی وہ خواب بھی جاگا ہوا ہے

کسی بادل کو چھو کر آ رہی ہے

ہوا کا پیرہن بھیگا ہوا ہے

زمیں بے عکس ہو کر رہ گئی ہے

فلک کا آئنہ میلا ہوا ہے

خموشی جھانکتی ہے کھڑکیوں سے

گلی میں شور سا پھیلا ہوا ہے

ہوا گم صم کھڑی ہے راستے میں

مسافر سوچ میں ڈوبا ہوا ہے

کسی گزرے برس کی ڈائری میں

تمہارا نام بھی لکھا ہوا ہے

چراغ شام کی آنکھیں بجھی ہیں

ستارہ خواب کا ٹوٹا ہوا ہے

سفر کی رات ہے ناصرؔ دلوں میں

عجب اک درد سا ٹھہرا ہوا ہے

نصیر احمد ناصر

 

وسیم ساغر

یوم پیدائش 28 مارچ 1991

نہ شکوہ نہ برہم ہوا جانتی ہے

یہ ظرفِ وفا ہے ،دعا جانتی ہے

سفینہ مرا چُوم لوٹے گی آندھی

مرے حوصلوں کو ہوا جانتی ہے

جنوں اک طرف وصل کی آرزو کا

محبت روا ناروا جانتی ہے

در و بام واقف ہیں کلفت سے میری

مرے غم کی شدت دوا جانتی ہے

بہت نرم یوں ہی نہیں فصلِ گل پر

صبا رنگ و بو کی نوا جانتی ہے

وہی ساغرِ خستہ دامن ہوں لوگو

ستمگر جسے ماسوا جانتی ہے

وسیم ساغر

 

فیصل رضوان

یوم پیدائش 28 مارچ

زندگی کا خمار دیکھا ہے

سب کو یاں سوگوار دیکھا ہے

عشق سینہ فِگار دیکھا ہے

حسن کو لالہ زار دیکھاہے

خارزاروں کا ساتھ دینے میں

گل کا دامن ہی تار دیکھا ہے

سانس رکتے ہی اپنے پیاروں کا

میتوں میں شمار دیکھا ہے

بھول جانا جسے ضروری تھا

اس کو ہی بار بار دیکھا ہے

ساتھ دل ہے حباب سے آگے

زیست کا اعتبار دیکھا ہے

فیصل رضوان

سید حامد

یوم پیدائش 28 مارچ 1920

حق کسی کا ادا نہیں ہوتا 

ورنہ انساں سے کیا نہیں ہوتا 

دل کا جانا تو بات بعد کی ہے 

دل کا آنا برا نہیں ہوتا 

کیا ہوا دل کو مدتیں گزریں 

ذکر مہر و وفا نہیں ہوتا 

حسن کے ہیں ہزارہا پہلو

ایک پہلو ادا نہیں ہوتا 

خود پہ کیا کیا وہ ناز کرتے ہیں 

جب کوئی دیکھتا نہیں ہوتا 

دل بجھا ہو تو خندۂ گل بھی 

چبھتا ہے جاں فزا نہیں ہوتا 

ڈھونڈھ لاتی ہے ایک شوخ نگاہ 

لب پہ جو مدعا نہیں ہوتا 

خوں بہاتے ہیں بے گناہوں کا 

یہ کوئی خوں بہا نہیں ہوتا 

زندگی میں ہیں تلخیاں پھر بھی 

آدمی بے مزا نہیں ہوتا 

حق تو حامدؔ یہ ہے کہ حق کے سوا 

کوئی مشکل کشا نہیں ہوتا

سید حامد

 

شیما نظیر

یوم پیدائش 27 مارچ 1972

ایک مدت سے جو ٹھہری ہے ٹھہر جائے گی

ایسا لگتا ہے یونہی عمر گزر جائے گی

ہم کو تہذیب پہ اپنی تھا بہت ناز مگر

اب وہ تہذیب یوں بے موت ہی مرجائے گی

وقت یکساں نہیں رہتا ہے کسی کا بھی کبھی

کبھی ایسے کبھی ویسے بھی گزر جائے گی

عزم.مضبوط رکھو کوششیں کرکے دیکھو

زندگی بکھری بھی ہو گر تو سنور جائے گی

وہ دعا ہوگی یقیناً تری مقبول نظیرؔ

ساتھ اشکوں کے دعا تیری اگر جائے گی

شیما نظیر

 

سعید افسر

یوم پیدائش 26 مارچ 1941

دھوپ کو گرم نہ کہہ سایۂ دیوار نہ دیکھ 

تجھ کو چلنا ہے تو پھر وقت کی رفتار نہ دیکھ 

میری فکروں سے الجھ مجھ کو سمجھنے کے لئے 

دور سے موج میں الجھی ہوئی پتوار نہ دیکھ 

ان کی روحوں کو پرکھ آدمی ہیں بھی یا نہیں 

صرف صورت پہ نہ جا جبہ و دستار نہ دیکھ 

اپنے آنگن ہی میں کر فکر نموئے گلشن 

کوئی جنت بھی اگر ہے پس دیوار نہ دیکھ 

ان دمکتے ہوئے لمحات کے جادو سے نکل 

وقت کی چال سمجھ شوخئ رفتار نہ دیکھ 

غم سے لڑنا ہے تو پھر غم زدہ صورت نہ بنا 

زندہ رہنا ہے تو مردوں کے یہ اطوار نہ دیکھ 

میرے نغمات کو تفریح کے کانوں سے نہ سن 

رقص کی پیاس ہے آنکھوں میں تو پیکار نہ دیکھ 

قدردانی کو مراتب کے ترازو میں نہ تول

کون افسرؔ ہوا یوسف کا خریدار نہ دیکھ

سعید افسر

 

انجم عثمان

یوم پیدائش 29 مارچ

زر غبار کو آئینہ بار کر نہ سکے

نقوش عکس کو تصویر یار کر نہ سکے

ہے وحشتوں کا تلاطم پسِ نوائے سکوت

میان موجۂ گل ذکر یار کر نہ سکے

نہ اضطراب، نہ غوغائے گریہ و ماتم

شہاب غم بھی مجھے بے قرار کر نہ سکے

ٹپک نہ چشمِ ہم آہنگ سے اے قطرۂ خوں

کہ چارہ گر بھی تجھے شرمسار کر نہ سکے

ستارہ گیر تھا رخشِ ہنر مگر پھر بھی

طلسم حسن سخن بے کنار کر نہ سکے

ہزار زاویۂ حرف آشکار کیے

قبائے سرو غزل زرنگار کر نہ سکے

انجم عثمان

 

پروین صباء

یوم پیدائش 25 مارچ 1969

اپنی ہی راہ پہ ہر حال میں چلتے رہنا

وقت کے ساتھ نہ رفتار بدلتے رہنا

میری رسوائی کا باعث نہ کہیں بن جائے

رات بھر شمع کی مانند پگھلتے رہنا

عشق کی راہ میں شعلوں کے سوا کچھ بھی نہیں

پاؤں جل جائیں مگر آگ پہ چلتے رہنا

دو قدم بھی کوئی ہمراہ نہ چل پائے گا

میری قسمت میں ہے گر گر کے سنبھلتے رہنا

تجھ کو خوش آگئی دنیا ، ہے نصیبہ تیرا

ورنہ سورج کی بھی قسمت میں ہے ڈھلتے رہنا

کس قدر فرصتیں ہیں ، مجھ کو تو حیرت ہے صبا

کام ہے لوگوں کا بس زہر اگلتے رہنا

پروین صباء

 

آرتی کماری

یوم پیدائش 25 مارچ 1977

تری یاد میں جو گزارا گیا ہے 

وہی وقت اچھا ہمارا گیا ہے 

بھلا اور کیا اپنا پن وہ دکھائے 

ترا نام لے کر پکارا گیا ہے 

تمہیں میری حالت پتہ کیا چلے گی 

مرا جو گیا کب تمہارا گیا ہے 

عجب ہے محبت کا میدان یارو 

نہ جیتا گیا ہے نہ ہارا گیا ہے 

لکھا ریت پر نام میں نے تمہارا 

ندی میں بھی چہرہ نہارا گیا ہے 

ہے میری بھی عادت تمہارے ہی جیسی 

ہر اک رنگ مجھ پہ تمہارا گیا ہے 

آرتی کماری

 

ظہور بیگ حامی

یوم پیدائش 24 مارچ 2000

سمجھ یہ آئے نہ ہر کسی کی

سزا ملے گی جو سرکشی کی

وہ غرق دریا ھوا ھے لیکن 

وہ بات کرتا ھے تشنگی کی

وفا کے مفہوم سے تو عاری 

زباں پہ باتیں ہیں عاشقی کی

وہ ماں کو گھر سے نکال بیٹھے

یہ اک کہانی ہے بے حسی کی

کبھی نہ بھاگا خوشی کے پیچھے

ہمیشہ غم کی ہی پیروی کی

ظہور بیگ حامی

 

ضمیر اختر نقوی

یوم پیدائش 24 مارچ 1940

مرے وجود نے یوں تو ضمیر کیا نہ دیا

انا کی آگ میں جلنے کا حوصلہ نہ دیا

شمار اپنا بھی ہوجاتا عشق والوں میں

پیالہ زہر کا ہم کو بھی کیوں پلا نہ دیا

کچل نہ پائے گا پھر بھی ہمارا جذبۂ دل

جو حسن نے ہمیں اعزازِ باوفا نہ دیا

ضمیر ایسی غزل کو تو دور ہی سے سلام

کہ جس نے فکر کو میدانِ ارتقا نہ دیا

ضمیر اختر نقوی

ڈاکٹر وسیم راشد

یوم پیدائش 23 مارچ

تیرا خیال میری انجمن میں رہتا ہے

عجیب پھول ہے تنہا چمن میں رہتاہے

میں اس سے دور بھی جاؤں تو کس طرح جاؤں

وہ عطر بن کے میرے پیرہن میں رہتا ہے

وہ اپنی روح کے زخموں کو کس طرح گنتا 

ہمیشہ الجھا ہوا وہ بدن میں رہتا ہے

تری تلاش میں تھک جاتے ہیں قدم لیکن

سکون قلب بھی شامل تھکن میں رہتا ہے

یہ بات سچ ہے نظریات جس کے چھوٹے ہوں

بڑے مکان میں بھی وہ گھٹن میں رہتا ہے

وسیم ہند کی مٹی میں کیسا جادو ہے 

کہیں بھی جاؤں مرا دل وطن میں رہتا ہے

ڈاکٹر وسیم راشد

پرویز رحمانی

یوم پیدائش 23 مارچ 1952

اندر باہر اوپر نیچے خواب ہی خواب 

دائیں بائیں آگے پیچھے خواب ہی خواب 

خوشبو شبنم رنگ کی دنیا ایک فریب 

غنچے گل بوٹے باغیچے خواب ہی خواب 

آنکھیں چہرے چاند ستارے رات ہی رات 

دروازے دیوار دریچے خواب ہی خواب 

حسرت ٹہنی ٹہنی نیند میں ڈوبی تھی 

بکھرے تھے پیڑوں کے پیچھے خواب ہی خواب

 

کاش کہ زندہ ہوتے احساسات سبھی 

دیکھا کرتے آنکھیں میچے خواب ہی خواب 

امیدیں مہدی کے تلوے چاٹ گئیں 

دکھلاتے کب تک غالیچے خواب ہی خواب 

خواہش خواہش جو چاہو چن لو پرویزؔ 

چھوڑ چلے ہم اپنے پیچھے خواب ہی خواب

پرویز رحمانی

 

ریحانہ شبیر

یوم پیدائش 23 مارچ 1972

نظم اک جوگی

اک جوگی ڈھونڈ رہی ہوں میں

جو زہر نکالے سانپوں کا

ہر جانب پھن پھیلائے ہوئے

ہیں ڈھیروں کالے ناگ یہاں

کچھ ہوس زدہ، کچھ حرص زدہ

کچھ اس دھرتی کی مایا پہ

پھن کو پھیلائے بیٹھے ہیں

کچھ استحصال کے کنڈل میں

سب کو لپٹائے بیٹھے ہیں

کوئی ہمت والا جوگی ہو

نہ زر کا کوئی روگی ہو

اک جوگی ڈھونڈ رہی ہوں میں

جو زہر نکالے سانپوں کا

ہے لفظوں میں تاثیر بہت

اور لفظوں میں تریاق بھی ہے

ان لفظوں سے انساں بدلے

ان لفظوں سے قومیں بدلیں

یہ طاقت ور کو زیر کریں

اور بزدل کو بھی شیر کریں

الفاظ میں ایسی خوبی ہے

الفاظ میں ایسی طاقت ہے

اے میرے دیس کے سخن ورو!

اپنے الفاظ کی لاٹھی سے

کچلو سر کالے ناگوں کے

اور استحصال کی کنڈل کو

کھولو الفاظ کی قوت سے

مزدور کی ہمت بن جاؤ

مظلوم کی طاقت بن جاؤ

تم سب کے سب ہی جوگی ہو

اب بین بجاؤ لفظوں کی

اور زہر نکالو سانپوں کا

ریحانہ شبیر

 

غلام مرتضی راہی

یوم پیدائش 23 مارچ 1937

نایاب چیز کون سی بازار میں نہیں

لیکن میں ان کے چند خریدار میں نہیں

چھو کر بلندیوں کو پلٹنا ہے اب مجھے

کھانے کو میرے گھاس بھی کہسار میں نہیں

آتا تھا جس کو دیکھ کے تصویر کا خیال

اب تو وہ کیل بھی مری دیوار میں نہیں

عرفان و آگہی کی یہ ہم کس ہوا میں ہیں

جنبش تک اس کے پردۂ اسرار میں نہیں

اگلا سا مجھ میں شوق شہادت نہیں اگر

پہلی سی کاٹ بھی تری تلوار میں نہیں

غلام مرتضی راہی

ڈاکٹر مختار شممیم

یوم پیدائش 23 مارچ 1944

صبح رنگین و جواں شام سہانی مانگے 

دل بیتاب کہ تیری ہی کہانی مانگے 

کوئی دیکھے یہ مرا عالم‌ جولانی طبع 

جس طرح آب رواں آپ روانی مانگے 

خوگر عیش نہیں فطرت شوریدہ‌ سراں 

غم و اندوہ طلب سوز نہانی مانگے 

دشت غربت میں ان آنکھوں کی نمی یاد آئے 

تشنہ لب جیسے کوئی صحرا سے پانی مانگے 

شومیٔ زیست کہ یہ آج زلیخا کی طرح 

کاسۂ عمر میں لمحات جوانی مانگے 

اپنے خوابوں پہ ہے شرمندہ شب غم دیدہ 

صبح معصوم اسی شب کی کہانی مانگے 

غنچۂ شوق شمیمؔ آج کھلا ہے شاید 

دل وحشت زدہ خوننابہ نشانی مانگے

 ڈاکٹر مختار شممیم

فیاض حسین شاہ

یوم پیدائش 22 مارچ

ایسا نہیں کہ حیلے بہانے بناؤں گا

کشتی نہ بن سکی تو میں تنکے بناؤں گا

اک روز میں بناؤں گا دونوں جہاں میں ربط

اور موت کے علاوہ بھی رستے بناؤں گا

یہ دیکھ میرے ہاتھوں کی پامال انگلیاں

پردیس آ کے سوچا تھا پیسے بناؤں گا

اک تیری کائنات ہے اک میری کائنات

گر ہوسکا تو ان میں دریچے بناؤں گا

اک روز میں بناؤں گا کاغذ کی تتلیاں

اور سات آٹھ پھول بھی نیلے بناؤں گا

پہلے بناؤں گا کسی کاغذ پہ اپنی آنکھ

پھر اس میں تیرے خواب کے ریشے بناؤں گا

فیاض حسین شاہ

 

آصفہ رومانی

یوم پیدائش 22 مارچ 1945

گھر کو کیسا بھی تم سجا رکھنا 

کہیں غم کا بھی داخلہ رکھنا 

گر کسی کو سمجھنا اپنا تم 

دھوکہ کھانے کا حوصلہ رکھنا 

اتنی قربت کسی سے مت رکھو 

کچھ ضروری ہے فاصلہ رکھنا 

ان کی ہر بات میٹھی ہوتی ہے 

جھوٹی باتوں کا مت گلہ رکھنا 

زندگی ایک بار ملتی ہے 

اس کو جینے کا حوصلہ رکھنا 

ناامیدی کو کفر کہتے ہیں 

رب سے امید آصفہؔ رکھنا 

آصفہ رومانی

 

نصرت عتیق

یوم پیدائش 22 مارچ 1975

یہ اور بات ہے کہ سہارا نہیں بنے 

لیکن کسی کی راہ کا کانٹا نہیں بنے 

یاروں کے ہم نے عیب چھپائے ہیں بارہا 

ان کو بچایا خود بھی تماشہ نہیں بنے 

دشوار راستوں کا انہیں تجربہ نہیں 

منزل جو لوگ بن گئے رستا نہیں بنے 

انسان ہی تو بن نہیں پائے جو اہم تھا 

ویسے تو لوگ بننے کو کیا کیا نہیں بنے 

تم سے بڑی امید لگا رکھی تھی مگر 

تم بھی تو میرے حق میں مسیحا نہیں بنے 

نصرتؔ وہ ہم سے اس لیے ناراض ہیں کہ ہم 

ان کی بلائی بھیڑ کا حصہ نہیں بنے 

نصرت عتیق

 

شمشاد شاد

یوم پیدائش 21 مارچ 1963

اللہ کرے درد ترا سب پہ عیاں ہو

اے دشمنِ جاں تیرے جگر کا بھی زیاں ہو

حاوی ترے اعصاب پہ ہو عشق کا آسیب

اطراف مرے ہونے کا تجھ کو بھی گماں ہو

کیا میں ہی ترے ہجر میں روتا رہوں پہیم

چشمہ تری آنکھوں سے بھی اشکوں کا رواں ہو

غافل نہ رہوں ظلم وستم سے کبھی تیرے

شعروں میں مرے تیری جفاؤں کا بیاں ہو

اک دوجے کے بن حال یہ ہو جائے ہمارا

جینا تو الگ بات ہے مرنا بھی گراں ہو

مرکوز مری آنکھ رہے چہرے پہ تیرے

تو ساتھ ہو جب روح نکلنے کا سماں ہو

ہیں شہرِ خموشاں میں بھی ہنگامے بہت شاد

لے چل مجھے اس جا کہ جہاں امن و اماں ہو

شمشاد شاد

 

 

مبارک علی انمول

یوم پیدائش 21 مارچ 1992

تجھ سے ملنا محال ہے پھر بھی

دل میں تیرا خیال ہے پھر بھی

ہم پہ آئے نہ کیوں زوال مگر

عشق تو لازوال ہے پھر بھی

جانتا ہوں کوئی جواب نہیں

ان لبوں پر سوال ہے پھر بھی

آنکھ روتی ہے خون کے آنسو

دل کے اندر ملال ہے پھر بھی

مبارک علی انمول

 

راجیش الفت

یوم پیدائش 21 مارچ 1961

کہہ دو دل میں جو بات باقی ہے 

یہ نہ سوچو کہ رات باقی ہے 

عشق کی بات ہے ابھی کر لو 

بھول جاؤ حیات باقی ہے 

ساری دنیا ہے پھر بھی تنہا ہوں 

اک تمہارا ہی ساتھ باقی ہے 

آج کہتے ہیں بس شراب شراب 

کل کہیں گے نجات باقی ہے 

پہلے لازم ہے جیتنا دل کا 

پھر کہاں کائنات باقی ہے

راجیش الفت

 

سعید الظفر صدیقی

یوم پیدائش 21 مارچ 1944

زیرِ زمیں کھلے کہ تہِ آسماں کھلے

میرےخداکہیں تومری داستاں کھلے

کھلتانہیں ہے بیٹھے بٹھائے کوئی یہاں

ہم نے زمین اوڑھ لی تب آسماں کھلے

مدت ہوئی ہے دونوں کوبچھڑےہوئےمگر

اب تک نہ ہم یہاں نہ وہ ابتک وہاں کھلے

وہ شہرِ دوستاں ہو کہ شہرِ ستم شعار

آوارگانِ عشق کسی پر کہاں کھلے

اب تک تو شہر مہر بلب ہے مرا سعید

شایدستم کچھ اوربڑھے تو زباں کھلے

سعید الظفر صدیقی

 

سعدشاہد

یوم پیدائش 20 مارچ 2002

ہرا بھرا تھا خزاں میں شجر اداسی کا

ہم اہلِ درد نے کھایا ثمر اداسی کا

دیارِ دل کسی خوش رنگ کے در آنے سے 

ہوا ہے بے سر و ساماں نگر اداسی کا 

ِادھر اُدھر ہیں بہاروں نے گھر بسائے ہوئے 

وہ شاخ پھول کھلائے کدھر اداسی کا 

میں خوش خیال تلاشِ خدا میں سمجھا ہوں 

وہی خدا ہے جو ہے چارہ گر اداسی کا

سعدشاہد

 

کنول نور پوری

یوم پیدائش 20 مارچ 1931

آغاز سے غرض ہے نہ انجام سے مجھے

اے عشق واسطہ ہے ترے نام سے مجھے

راحت نصیب ہوتی ہے آلام سے مجھے

کہنا ہے بس یہ گردشِ ایام سے مجھے

کتنا سکوں ہے حسرتِ ناکام سے مجھے

کانٹوں پہ نیند آگئی آرام سے مجھے

دیوانہ وار جل کے پتنگے نے شمع پر

آگاہ کردیا مرے انجام سے مجھے

میرے جنونِ عشق کا شاید ہے یہ اثر

دنیاپکارتی ہے ترے نام سے مجھے

کہنا ہو جو مجھے ، میں وہ کہتا ہوں برملا

تعریف سے غرض ہے نہ دشنام سے مجھے

اک بوند بھی خلوص کی جس میں نہیں کنول

راحت کبھی ملےگی نہ اس جام سے مجھے

کنول نور پوری

 

عالیہ بخآری ہالہ

یوم پیدائش 20 مارچ 1970

اس نے بھیجا ہے پیار کا تحفہ

اک دل بے قرار کا تحفہ

قسمتو ں سے کسی کو ملتا ہے

جانِ جاں وصلِ یار کا تحفہ

سرد موسم نے لی ہے انگڑائی

آ چکا ہے بہار کا تحفہ

میرے قدموں کو کیجیے مضبوط

دیجیے اعتبار کا تحفہ

تیرا غم یوں چھپائے پھرتے ہیں

 جیسے دیرینہ یار کا تحفہ

آپ کے روپ میں ہمیں ہالہؔ

مل گیا غمگسار کا تحفہ

عالیہ بخآری ہالہ