سُکھ چین ، اضطراب سے پہلے کی بات ہے
یہ پیار کے عذاب سے پہلے کی بات ہے
دو سے نکالو ایک تو بچتا تھا ایک ہی
یہ عشق کے حساب سے پہلے کی بات ہے
پڑھتے رہے وفاؤں کا مطلب خلوص ہم
یہ ہجر کے نصاب سے پہلے کی بات ہے
پہلے میں کہہ رہا تھا فقط پھول ہی تو ہے
تیرے دیے گلاب سے پہلے کی بات ہے
خوشبو طواف کرتی تھی پلکوں کا نصف شب
آنکھوں میں تیرے خواب سے پہلے کی بات ہے
پہلے تکلفات میں ہم ، تم رہا مگر
یہ آپ اور جناب سے پہلے کی بات ہے.
صدیوں خمار کا رہا الزام آنکھ پر
دنیا میں یہ شراب سے پہلے کی بات ہے
اشفاق احمد صائم
یوم پیدائش 30 اپریل 1962
جدھر دیکھو ادھر دہشت کھڑی ہے
خدارا خير ہو مشکل بڑی ہے
خموشی اس قدر چھائی ہے ہر سو
نگر کی ہر گلی سونی پڑی ہے
پرندے ناتواں ہیں آشیاں میں
نگاه باز ہر جاں پر گڑی ہے
جہاں پر بھائی چارے کی ضیا تھی
وہاں اب تیرگی پھیلی پڑی ہے
محبت آئے تو آئے کدھر سے
عداوت راستہ روکے کھڑی ہے
بنایا کارواں کا جن کو رہبر
شرارت ان کے تاجوں میں جڑی ہے
حکومت ہے جہاں میں نفرتوں کی
نظر یہ بھی سیاست کی کڑی ہے
نظرعلی
یوم پیدائش 29 اپریل 1941
حسینوں سے تمہاری دوستی اچھی نہیں لگتی
بڑھاپے میں یہ عشق و عاشقی اچھی نہیں لگتی
مزا کچھ اور ہی تھا پی ڈبلیو ڈی کی سروس کا
ہمیں اب اور کوئی نوکری اچھی نہیں لگتی
الیکشن میں تو ہر ووٹر پر اپنی جاں چھڑکتے تھے
اب ان سے رہنماؤ بے رخی اچھی نہیں لگتی
کھلائے جو بھی حلوا تم اسی کا ساتھ دیتے ہو
ہمیں واعظ تمہاری پالیسی اچھی نہیں لگتی
رگڑنا پڑ رہا ہے سر ہر اک ووٹر کے پاؤں پر
اسی باعث تو ہم کو ممبری اچھی نہیں لگتی
نیاز سواتی
یوم پیدائش 29 اپریل 1954
انبیاء جتنے ہیں ان کا مرتبہ کچھ اور ہے
عظمتِ حضرت محمد مصطفےؐ کچھ اور ہے
نیل کے پانی میں جو رستہ بنا کچھ اور ہے
آسمانوں سے جو گزرا راستہ کچھ اور ہے
چاند ہے سورج ہے تارا ہے نہ ہے کوئی چراغ
آمنہ کے گھر میں یہ جلوہ نما کچھ اور ہے
ہوگی جنت بھی تری معبود کافی پُر فضا
میری نظروں میں مدینے کی فضا کچھ اور ہے
تھا خدا مطلوب موسیٰؐ کو تو پہنچے طور پر
جس کو بلوایا وہ محبوب خدا کچھ اور ہے
کوئی گزرے گا فلک سے چاند بھی آج خوش
اور تاروں کے چمکنے کی ادا کچھ اور ہے
ہیں محمدؐ تو مدینہ علم کا حیدر ؓ ہیں در
ماسوا حیدر ؓ کہیں سے راستہ کچھ اور ہے
شاعری کا لطف ہر صنف سخن میں ہے عظیم
نعت کہنے کا حقیقت میں مزا کچھ اور ہے
عظیم امروہوی
یوم پیدائش 29 اپریل 1829
درد دل یار رہا درد سے یاری نہ گئی
زندگی ہم سے تو بے لطف گزاری نہ گئی
دن کے نالے نہ گئے رات کی زاری نہ گئی
نہ گئی دل سے کبھی یاد تمہاری نہ گئی
ہم تو خوں گشتہ تمناؤں کے ماتم میں رہے
سینہ کوبی نہ گئی سینہ فگاری نہ گئی
انتظار آپ کا کب لطف سے خالی نکلا
رائیگاں رات کسی روز ہماری نہ گئی
بخشوایا مجھے تم نے تو خدا نے بخشا
نہ گئی روز جزا بات تمہاری نہ گئی
لوگ کہتے ہیں بدلتا ہے زمانہ لیکن
دن ہمارا نہ گیا رات ہماری نہ گئی
مبارک عظیم آبادی
یوم پیدائش 29 اپریل 1969
جب بھی ملتے ہیں تو جینے کی دعا دیتے ہیں
جانے کس بات کی وہ ہم کو سزا دیتے ہیں
حادثے جان تو لیتے ہیں مگر سچ یہ ہے
حادثے ہی ہمیں جینا بھی سکھا دیتے ہیں
رات آئی تو تڑپتے ہیں چراغوں کے لیے
صبح ہوتے ہی جنہیں لوگ بجھا دیتے ہیں
ہوش میں ہو کے بھی ساقی کا بھرم رکھنے کو
لڑکھڑانے کی ہم افواہ اڑا دیتے ہیں
کیوں نہ لوٹے وہ اداسی کا مسافر یارو
زخم سینہ کے اسے روز سدا دیتے ہیں
اجے سحاب
سرفروشی چاہنا ہے لازمی
وقت آیا جاگنا ہے لازمی
ہندو مسلم سکھ عسائی ایک ہوں
بند آنکھیں کھولنا ہے لازمی
قصر باطل کے ہلانے کے لیے
قلبِ مومن کی صدا ہے لازمی
صحبت صالح کرو تم اختیار
نیک بننا اب ذرا ہے لازمی
زندگی رنگیں بنانے کے لیے
الفتوں سے رابطہ ہے لازمی
ہے اگر رہنا محبت سے سدا
نفرتوں کا خاتمہ ہے لازمی
مختصر ہے زندگی اے دوستو
چار دن میں لوٹنا ہے لازمی
پوچھتے ہو کیا ہمیں تم ظالمو
دل میں خود کے جھانکنا ہے لازمی
آنچ ایماں پر اگر آئے کبھی
سر کٹانا کاٹنا ہے لازمی
قل ھواللہ احد کی اے وقار
رزمِ باطل میں نوا ہے لازمی
محمد وقار احمد نوری
گہری ہوئی ہے دل کی کتابوں پہ دھول سب
اور سوکھنے لگے تری یادوں کے پھول سب
دنیا و آخرت کو اگر ہے سنوارنا
احکامِ کبریا کرو دل سے قبول سب
قائم ہے اب بھی حوصلہ، حالانکہ ہوگئے
رستے کی سختیوں سے مسافر ملول سب
بچوں کے کاندھے میرے برابر جو آ گئے
چلنے لگے ہیں ان کے ہی گھر میں اصول سب
چھوڑا ہے ہم نے جب سے بزرگوں کا راستہ
اڑنے لگی ہمارے ہی چہرے پہ دھول سب
دورِ جدید کی یہ چکا چوند دیکھ کر
ہم نے ہی توڑڈالے ہیں اپنے اصول سب
اوروں کے کام آنا ہی قاسم ہے زندگی
ورنہ ہے جینا مرنا تمھارا فضول سب
محمد قاسم
یوم پیدائش 27 اپریل 1941
حیات ڈھونڈ رہا ہوں قضا کی راہوں میں
پناہ مانگنے آیا ہوں بے پناہوں میں
بدن ممی تھا نظر برف سانس کافوری
تمام رات گزاری ہے سرد بانہوں میں
اب ان میں شعلے جہنم کے رقص کرتے ہیں
بسے تھے کتنے ہی فردوس جن نگاہوں میں
بجھی جو رات تو اپنی گلی کی یاد آئی
الجھ گیا تھا میں رنگین شاہراہوں میں
نہ جانے کیا ہوا اپنا بھی اب نہیں ہے وہ
جو ایک عمر تھا دنیا کے خیر خواہوں میں
مری تلاش کو جس علم سے قرار آئے
نہ خانقاہوں میں پائی نہ درس گاہوں میں
بدنام نظر
ہر شخص ہو گیا ہے جُدا کون ساتھ ہے
یا رب جہاں میں تیرے سوا کون ساتھ ہے
"تنہائیوں میں کہتا ہے قرآن یہ "میں ہوں"
جب جب بھی میں نے رو کے کہا کون ساتھ ہے
جھولے سے ایک بچے نے خود کو گرا لیا
میداں میں باپ نے جو کہا کون ساتھ ہے
اک ماں دعائیں دیتی تھی وہ بھی نہیں رہی
اب زیست میں سوائے بلا کون ساتھ ہے
دولت کے پیچھے بھاگ رہا تھا غرور سے
اک روز آ کے بولی قضا کون ساتھ ہے
آئے ہیں میری صف میں مجھے تیر مار کر
جب دوستوں نے مجھ سے سنا کون ساتھ ہے
لے کر حسین چل پڑے پھر خاندان کو
جب دین کی بقا نے کہا کون ساتھ ہے
ہر ایک بے وفا سے وفا جب نبھا چُکا
کہنے لگی یہ مجھ سے وفا کون ساتھ ہے
دنیا میں جتنے اچھے تھے تم ان سے پوچھ لو
آخر میں سب کو کہنا پڑا کون ساتھ ہے
حیدر ہر ایک دوست کی ہجرت کی یاد میں
دیوار و در سے کہتا رہا کون ساتھ ہے
یوم پیدائش 27 اپریل 1978
بڑھتا چلا گیا ہے یہ لاشوں کا سلسلہ
ماتم بپا کہیں، کہیں آہوں کا سلسلہ
ایسی وبا ہے پھیلی کہ جسکی دوا نہیں
رکتا نہیں ہے پھر بھی چناؤں کا سلسلہ
بےشک جہاں میں قید ہے، شیطان ان دنوں
ہرگز نہیں رکا ہے، گناہوں کا سلسلہ
پہنچا سفر نہ اپنا کبھی، اختتام تک
حد نظر ہے اب بھی سرابوں کا سلسلہ
کس کو خدا نواز دے، ماہِ صیام میں
جاری رہے اگر یہ، دعاؤں کا سلسلہ
شامل رہے گا شمس، خرافات میں اگر
نازل رہے گا تجھ پہ عذابوں کا سلسلہ
شمس پورولیاوی
یوم پیدائش 27 اپریل 1946
فاصلہ دیر و حرم کے درمیاں رہ جائے گا
چاک سل جائیں گے یہ زخم نہاں رہ جائے گا
ہاتھ سے اپنے تو دھو لے گا لہو کے داغ تو
دیوتا کا پاک دامن خوں فشاں رہ جائے گا
چاند تھوڑی دیر میں چل دے گا اپنے راستے
پھر ستاروں کے سہارے آسماں رہ جائے گا
جانے والے کو میسر ہو گئی غم سے نجات
غم تو اس کے ہو رہیں گے جو یہاں رہ جائے گا
راکھ سے میری چتا کی اس کی آنکھوں میں خیالؔ
اور یہ دو چار دن شور فغاں رہ جائے گا
پریہ درشی ٹھا کرخیال
آبشاروں سے دوستی کرلی
سب کناروں سے دوستی کرلی
دوستا تجھ سے دوستی کرکے
سب خساروں سے دوستی کرلی
ہم خلا میں کسی جگہ پر تھے
پھر سیاروں سے دوستی کرلی
چاند کو چھوڑ کر سبھی نے ہی
کیوں ستاروں سے دوستی کرلی
آپ اپنی تلاش میں ہم نے
غم کہ ماروں سے دوستی کرلی
محمد عمران بشیر
یوم پیدائش 26 اپریل 1952
کج عمارت کی تو بنیاد ہی رکھی گئی ہے
منہدم ہونے کی میعاد ہی رکھی گئی ہے
آنکھ سے دل میں اترنے کا ہنر جانتا ہے
اہلیت اسمیں خداداد ہی رکھی گئی ہے
روز اجڑنے کے عمل سے بڑی ہلچل سی ہے
دل کی بستی مری آباد ہی رکھی گئی ہے
اس جگہ تزکرۂ نان جویں ہوگا ہی
جس جگہ خلقت ناشاد ہی رکھی گئی ہے
ظلم اور صبر کی تحدید نہیں ہو سکتی
جب معلق مری فریاد ہی رکھی گئی ہے
یہ کسی سمت کی محتاج نہیں ہے رونق
من کی چڑیا ہے جو آزاد ہی رکھی گئی ہے
رونق شہری
کس سے رونا روئے کوئی اپنے ٹوٹے خوابوں کا
کب تک زندہ رہ لے کوئی بوجھ اٹھائے وعدوں کا
کل کی فکر مسلط سب پر کل جانے کیا ہو جائے
سر پر بوجھ لیے پھرتے ہو کیوں کل کے اندازوں کا
سہنے والے لوگ بہت ہیں کہنے والا کوئی نہیں
دیکھو کیسے کال پڑا ہے بستی میں آوازوں کا
فیاضی کیا خوب دکھائی ہے صیاد نے کیا کہنے
کاٹے بال و پر پنچھی کے حکم دیا پروازوں کا
مست نظر ساقی کی ہم پر بادل برکھا سب کچھ ہے
پھر ٹوٹے گا آج بھرم لو اپنے سبھی ارادوں کا
شامیں سرد ہوئیں ہیں پھر سے درد پرانے جاگیں گے
لوٹ آیا ہے پھر سے موسم بھولی بسری یادوں کا
دنیا داری کیسے گزری یہ بھی تو پوچھے گا وہ ندیم
حشر میں خالی کب پوچھے گا روزے اور نمازوں کا
ندیم اعجاز
نہیں زور اتنا بلاؤں میں ہے
اثر جتنا ماں کی دعاؤں میں ہے
کیا کرتے ہیں جملہ بازی بہت
یہی وصف تو رہنماؤں میں ہے
وہ گرویدہ سب کو بنانے لگا
بڑی دلکشی ان اداؤں میں ہے
بناتی ہیں شاداب کھیتوں کو وہ
یہ طاقت فلک کی گھٹاؤں میں ہے
ثمرؔ جاں سے پیارا لگے ہے مجھے
فضا امن کی میرے گاؤں میں ہے
سمیع احمد ثمر
یوم پیدائش 25 اپریل
ہوائے تیز کبھی دھوپ سخت جھیلتا ہوں
مصیبتوں کو مثالِ درخت جھیلتا ہوں
خدا نے کڑوی دواؤں میں ہے شفا رکھی
بڑوں کا اس لئے لہجہ کرخت جھیلتا ہوں
شَجَر کے سائے میں ہوتا تھا وصل دونوں کا
سو آج ہجر بھی زیرِ درخت جھیلتا ہوں
سکونِ قلب نہ آسائشوں میں ڈھونڈ کبھی
فقیر مست زمیں پر٬ میں تخت جھیلتا ہوں
تو جانتا ہے میں کیوں خون تھوکتا ہوں یہاں؟
وہ صدمۂ جگرِ لخت لخت جھیلتا ہوں
سکوت٬ ہجر٬ اداسی٬ سیاہ رات کا دکھ
یہ درد وہ ہیں جو میں تیرہ بخت جھیلتا ہوں
بھٹک رہا ہوں لیئے جسمِ نا تواں صادقؔ
تھکن سے چور بدن پر میں رخت جھیلتا ہوں
محمد ولی صادقؔ
کہ ہم سے بے سہاروں کو اذیت ڈھانپ لیتی ہے
وہاں سے بچ نکل آئیں تو وحشت ڈھانپ لیتی ہے
کسی کی یاد ایسی ہے ہمیں ہنسنے نہیں دیتی
ہماری ساری خوشیاں تو محبت ڈھانپ لیتی ہے
کسی سے بھی گلہ کرتا نہیں تیرے رونے کا
اُداسی کو یہ دنیاوی تھکاوٹ ڈھانپ لیتی ہے
کوئی مرتا نہیں ہے دور جانے پر کسی کے اب
یہاں سب کو کوئی نہ کوئی چاہت ڈھانپ لیتی ہے
ہماری تو وفاداری بھی جھوٹی لگتی دنیا کو
تمہاری بیوفائی کو نزاکت ڈھانپ لیتی ہے
یہاں پر لوگ بکتے ہیں جسے چاہو خریدو تم
یہاں پر سب گناہوں کو یہ دولت ڈھانپ لیتی ہے
ہماری زندگی ہے اس قدر سچی اداکاری
فسانے سے نکلتے ہیں حقیقت ڈھانپ لیتی ہے
اُسامہ طاہر
بڑے لاچار ہیں کیا مانگتے ہیں
سکوں کے ساتھ جینا مانگتے ہیں
نہ کچھ تیرا نہ میرا مانگتے ہیں
یہ خود پر اپنا قبضہ مانگتے ہیں
نہ کرسی نا خزینہ مانگتے ہیں
یہ محنت کش پسینہ مانگتے ہیں
بڑ ی مدت سے دھر نا چل رہا ہے
کرشی قانون ٹلنا مانگتے ہیں
کسانوں سے زمینیں چھین لو اب
یہ اپنا اپنا حصّہ مانگتے ہیں
یہ غیرت اور عزت سے ہمیشہ
بڑی خوشحال دُنیا مانگتے ہیں
کرے پرواہ کوئی بھی نہ واحد
یہ بچے ہیں کھلونا مانگتے ہیں
واحد کشمیری
چھوڑئیے قصۂ ماضی کو نہ اب یاد کر یں
آئیے پھر دلِ ویراں کو ہم آباد کر میں
قدر آزادئ گلشن کی نہ جانی ہم نے
ہم کو کب حق ہے کہ ہم شکوۂ صیاد کریں
پوچھتے ہیں سبھی تاراجیء گلشن کا سبب
ہم تو خاموش ہیں کچھ آپ ہی ارشاد کریں
غم کے ماروں کو ہے اک موجِ تبسم کافی
آپ چاہیں تو علاجِ دل ناشاد کریں
زندگی اپنی کچھ اس طرح گزار اے زاہد
بھولنے والے بھی تاعمر تجھے یاد کریں
زاہد فتح پوری
نظم:- انّا للٰہ و انّا الیہ راجعون
ایک مردہ تھا جسے میں خود اکیلا
اپنے کندھوں پر اٹھائے
آج آخر دفن کر کے آ گیا ہوں
بوجھ بھاری تھا مگر اپنی رہائی کے لیے
بے حد ضروری تھا کہ اپنے آپ ہی اس کو اٹھاؤں
اور گھر سے دور جا کر دفن کر دوں
یہ حقیقت تھی کہ کوئی واہمہ تھا
پر یہ بدبو دار لاشہ
صرف مجھ کو ہی نظر آتا تھا، جیسے
ایک نادیدہ چھلاوا ہو مرے پیچھے لگا ہو
میرے کنبے کے سبھی افراد اس کی
ہر جگہ موجودگی سے بے خبر تھے
صرف میں ہی تھا جسے یہ
ٹکٹکی باندھے ہوئے بے نور آنکھوں سے ہمیشہ گھورتا تھا
آج جب میں
اپنے ماضی کا یہ مردہ دفن کر کے آ گیا ہوں
کیوں یہ لگتا ہے کہ میرا
حال بھی جیسے تڑپتا لمحہ لمحہ مر رہا ہو
اور مستقبل میں جب یہ حال بھی ماضی بنے گا
مجھ کو پھر اک بار اس مردے کو کندھوں پر اٹھائے
دفن کرنے کے لیے جانا پڑے گا
ستیہ پال آنند
یوم پیدائش 24 اپریل
ہم سفر تھا ہی نہیں رخت سفر تھا ہی نہیں
کچھ گنوانے کا مجھے خوف و خطر تھا ہی نہیں
مجھ کو ہر شام جہاں لے کے توقع آئی
در و دیوار تو موجود تھے گھر تھا ہی نہیں
انگلیاں زخمی ہوئیں تب مجھے احساس ہوا
دستکیں دی تھیں جہاں پر وہاں در تھا ہی نہیں
مجھ سے ہی پوچھا کیے میرے بکھرنے کا سبب
اہل دانش میں کوئی اہل نظر تھا ہی نہیں
دھول اڑائی جہاں خوابوں میں مسلسل میں نے
کسی نقشے میں کہیں پر وہ نگر تھا ہی نہیں
کس پہ الزام رکھیں کس پہ لگائیں تہمت
میری مٹی میں سمٹنے کا ہنر تھا ہی نہیں
یاد اک شخص تھا اک نام ہی ازبر تاراؔ
سوا اس کے کوئی تا حد نظر تھا ہی نہیں
تارا اقبال
یوم پیدائش 24 اپریل 1971
تو مجھ کو سن رہا ہے تو سنائی کیوں نہیں دیتا
یہ کچھ الزام ہیں میرے صفائی کیوں نہیں دیتا
مرے ہنستے ہوئے لہجے سے دھوکا کھا رہے ہو تم
مرا اترا ہوا چہرہ دکھائی کیوں نہیں دیتا
نظر انداز کر رکھا ہے دنیا نے تجھے کب سے
کسی دن اپنے ہونے کی دہائی کیوں نہیں دیتا
میں تجھ کو دیکھنے سے کس لیے محروم رہتا ہوں
عطا کرتا ہے جب نظریں رسائی کیوں نہیں دیتا
کئی لمحے چرا کر رکھ لیے تو نے الگ مجھ سے
تو مجھ کو زندگی بھر کی کمائی کیوں نہیں دیتا
خود اپنے آپ کو ہی گھیر کر بیٹھا ہے تو کب سے
اب اپنے آپ سے خود کو رہائی کیوں نہیں دیتا
میں تجھ کو جیت جانے کی مبارک باد دیتا ہوں
تو مجھ کو ہار جانے کی بدھائی کیوں نہیں دیتا
منیش شکلا
نظم........ محبت
محبت عزم ہوتی ہے سراپا بزم ہوتی ہے
محبت ہی دلوں میں چاہتوں کی بزم ہوتی ہے
محبت دل کی دھڑکن ہے محبت ایک آہٹ ہے
محبت خوف کے لمحوں میں کوئی سنسناہٹ ہے
محبت کے شناسا پر محبت قرض ہوتی ہے
اگر ایمان ہو جائے محبت فرض ہوتی ہے
محبت تیز ہوتی ہے بڑی بے لاگ ہوتی ہے
محبت سرد ہوتی ہے مگر یہ آگ ہوتی ہے
محبت غم,محبت نم یہ بن کے پیاس آتی ہے
کسی کو توڑ دیتی ہے کسی کو راس آتی ہے
محبت آب ہے ایسا کسی کے زخم دھوتا ہے
کوئی ہنستا ہے الفت میں کوئی غمگین روتا ہے
محبت بند کمرے میں بھی اکثر سانس لیتی ہے
یہی انجان لوگوں کو بھی خود میں پھانس لیتی ہے
محبت استعارا ہے وفاوں کا جفاوں کا
سمندر میں اترتی کشتیوں کے ناخداوں کا
محبت روح کا مندر محبت من کے اندر بھی
محبت قطرہ بھی ہے اور اک گہرا سمندر بھی
محبت, قیس کو صحراوں میں لیلی دکھائی دے
یہی فرہاد کو کہسار میں رستہ دکھائی دے
محبت آئینہ ہے ہیر کو رانجھا دکھائی دے
محبت ہے تو سوہنی کو کہاں دریا دکھائی دے
محبت گنگناتی ہے محبت جھومتی بھی ہے
محبت زندگی کے دائرے میں گھومتی بھی ہے
محبت ایسی ناگن ہے جو تنہائی میں ڈستی ہے
یہ شہرِ عشق کے افراد کے ہر گھر میں بستی ہے
محبت امن کے لشکر کے ہر دل کی کہانی ہے
محبت عقلِ کامل بھی محبت اک دیوانی ہے
یہی ایمان سازی ہے یہی کردار سازی ہے
ہمیشہ جیت ہو جسکی محبت ایسی بازی ہے
خلیل مرزا
یوم پیدائش 23 اپریل
جس کی تحویل میں ٹوٹا تھا ستارہ دل کا
حال تک اس نے نہیں پوچھا دوبارہ دل کا
میں محبت کے سمندر میں اُتر آیا ہوں
ڈوب جانے کو ہے اب مجھ میں کنارہ دل کا
کاش کچھ وقت تُو رُک جائے مری محفل میں
کاش اے دوست سمجھ لے تُو اشارہ دل کا
میں نہ کہتا تھا محبت میں نہیں حاصل کچھ
میں نہ کہتا تھا کہ ہے عشق خسارہ دل کا
تجھ پہ مرتا ہے تو اس دل کو پشیمان نہ کر
کچھ بھرم رکھ لے محبت میں خدارا دل کا
یہ جو دنیا ہے! صحیفہ ہے کوئی دھیان سے پڑھ
یہ زمیں اصل میں ہے ایک سپارہ دل کا
ہم نے جتنا بھی کہا دل سے کہا ہے راشد
شعر میں لفظ نہیں خون اُتارا دل کا
راشد علی مرکھیانی
یوم پیدائش 23 اپریل 1940
اس کی آنکھوں میں اتر جانے کو جی چاہتا ہے
شام ہوتی ہے تو گھر جانے کو جی چاہتا ہے
کسی کم ظرف کو با ظرف اگر کہنا پڑے
ایسے جینے سے تو مر جانے کو جی چاہتا ہے
ایک اک بات میں سچائی ہے اس کی لیکن
اپنے وعدوں سے مکر جانے کو جی چاہتا ہے
قرض ٹوٹے ہوئے خوابوں کا ادا ہو جائے
ذات میں اپنی بکھر جانے کو جی چاہتا ہے
اپنی پلکوں پہ سجائے ہوئے یادوں کے دیے
اس کی نیندوں سے گزر جانے کو جی چاہتا ہے
ایک اجڑے ہوئے ویران کھنڈر میں آذرؔ
نا مناسب ہے مگر جانے کو جی چاہتا ہے
کفیل آزر امروہوی
یوم پیدائش 23 اپریل 1933
جس نے بنایا ہر آئینہ میں ہی تھا
اور پھر اس میں اپنا تماشہ میں ہی تھا
میرے قتل کا جشن منایا دنیا نے
پھر دنیا نے دیکھا زندہ میں ہی تھا
محل سرا کے سب چہروں کو جانتا ہوں
جس سے گئے تھے دل تک راستہ میں ہی تھا
دیکھ لیا زندانوں کی دیواروں نے
ان سے قد میں بلند و بالا میں ہی تھا
میں ہی نہیں تو کون سے لوگ اور کیسے لوگ
کون سی دنیا صاحب دنیا میں ہی تھا
ملکوں ملکوں پھر کر خالی ہاتھ میاں
لوٹنے والا وہ شہزادہ میں ہی تھا
دنیا تو نے خالی ہاتھ مجھے جانا
ظالم تیرا سب سرمایہ میں ہی تھا
میرا سراغ لگانے والے جانتے ہیں
جب تک تھا میں اپنا حوالہ میں ہی تھا
رضی اختر شوق
جتنے میٹھے ہو اُتنے کھارے ہو
کون سے شہر کے دلارے ہو
کون دیکھے گا اب محبت سے
کون بولے گا تم ہمارے ہو
کس لیے ہم یقیں دلائیں تمہیں
تم ہمارے تھے تم ہمارے ہو
ساری جھیلیں تمہارے واسطے ہیں
اور سمندر کے تم کنارے ہو
معصومانہ تیری ادائیں ہیں
اور سچ مچ میں کتنے پیارے ہو
تم زمانے کی بھوک ہو مری جاں
اور غریبوں کے تم سہارے ہو
احمد عاری
یوم پیدائش 22 اپریل 1952
تو میرا ہی ہوا نہیں
میں اتنا بھی برا نہیں
بہار ہے صبا بھی ہے
تو اک نہیں مزا نہیں
تو کائنات ہے فقط
خدا کی ہے، خدا نہیں
زمین میرے دل میں تھا
وہ آسماں دکھا نہیں
بلا کا رد ہے چپ مری
خموش ہوں برا نہیں
مرے نصیب کا دے تو
تو سیٹھ ہے خدا نہیں
یہ عشق کا تقاضا ہے
ترا نہیں مرا نہیں
بھرا ہے دفترِ گناہ
یہ دل مگر بھرا نہیں
وہ چاک پر خیال ہے
جو شعر میں ڈھلا نہیں
حنیف مانوس
یوم پیدائش 21 اپریل 1933
منکر کہتے ہیں اتفاقی ہے خدا
مذہب والوں کی خوش مذاقی ہے خدا
موت آئے گی سامنے تو ہوگا معلوم
فانی ہر ایک چیز باقی ہے خدا
ناوک حمزہ پوری
بس ایک خدا سب کا خدا ہے بخدا
بس ایک وہی ہے لائق حمد و ثنا
دامن پھیلائیے اسی کے آگے
دینے والا نہیں کوئی اس کے سوا
ناوک حمزہ پوری
سورج کی شعاعوں میں ہے تیرا جلوہ
مہتاب میں عکس تجلی تیرا
کوئی نہیں ہاں کوئی نہیں تیرا شریک
اے خالق جن و بشر و ارض و سما
ناوک حمزہ پوری
بے صوت و صدا ہوئی نوائے مسلم
اللہ سے کٹ گئی ادائے مسلم
یورپ ہو کہ ایشیاء عرب ہو کہ عجم
بے وجہ نہیں اکھڑی ہوائے مسلم
ناوک حمزہ پوری
یوم پیدائش 21 اپریل 1912
کچھ مرے شوق نے در پردہ کہا ہو جیسے
آج تم اور ہی تصویر حیا ہو جیسے
یوں گزرتا ہے تری یاد کی وادی میں خیال
خارزاروں میں کوئی برہنہ پا ہو جیسے
ساز نفرت کے ترانوں سے بہلتے نہیں کیوں
یہ بھی کچھ اہل محبت کی خطا ہو جیسے
وقت کے شور میں یوں چیخ رہے ہیں لمحے
بہتے پانی میں کوئی ڈوب رہا ہو جیسے
کیسی گل رنگ ہے مشرق کا افق دیکھ ندیم
ندی کا خوں رات کی چوکھٹ پہ بہا ہو جیسے
یا مجھے وہم ہے سنتا نہیں کوئی میری
یا یہ دنیا ہی کوئی کوہ ندا ہو جیسے
بحر ظلمات جنوں میں بھی نکل آئی ہے راہ
عشق کے ہاتھ میں موسیٰ کا عصا ہو جیسے
دل نے چپکے سے کہا کوشش ناکام کے بعد
زہر ہی درد محبت کی دوا ہو جیسے
دیکھیں بچ جاتی ہے یا ڈوبتی ہے کشتئ شوق
ساحل فکر پہ اک حشر بپا ہو جیسے
سیداحتشام حسین
یوم پیدائش 21 اپریل 1956
کیا کیجیے سخن یہاں سجدہ کیے بغیر
مانا گیا ہمیں کوئی دعویٰ کیے بغیر
یکتائی اُس سے پوچھ کہ اک عمر تک جسے
تنہا رکھا گیا ہو اکیلا کیے بغیر
پل بھر کو بھی نظر نہ ہٹی چارہ ساز سے
اُس نے بھی آنکھ پھیری نہ اچّھا کیے بغیر
رقصِ نشاطِ دید میں جاں سے گزر گیے
برسوں پڑے رہے تھے تماشا کیے بغیر
اُس نے بھی کب نگاہ میں تولا تھا کوئی اور
ہم بھی غلام ہوگیے سودا کیے بغیر
وحشت میں بھی لحاظ ہے تہذیبِ عشق کا
مَیلے ہوئے ہیں داغ کو دھبّا کیے بغیر
بہتا رہے لہو تو اُکھڑتا نہیں ہے دم
جیتے نہیں ہیں زخم کو گہرا کیے بغیر
اونچا ہوئے بغیر بریدہ نہیں ہے سر
بجھتا نہیں چراغ اجالا کیے بغیر
کس خارِ نوک دار سے پھوڑا نہ آبلہ؟
چھوڑا کوئی ببول نہ غنچہ کیے بغیر
مردِ نبرد ہے وہ علم دارِ موزُوں قد
لڑتا نہیں کفن کو پھریرا کیے بغیر
دربار میں خطاب یہ کس بے ردا کا تھا؟
سنتے تھے سب نگاہ کو اونچا کیے بغیر
سینچی نہ وہ زمیں جو ہماری نہ ہوسکی
باندھا کوئی خیال نہ اپنا کیے بغیر
پلٹی ہے جانماز نہ پھیرا کبھی سلام
شکرِ خدا بغیر نہ گریہ کیے بغیر
عارف امام
وہ لوگ میرے بہت پیار کرنے والے تھے
گزر گئے ہیں جو موسم گزرنے والے تھے
نئی رتوں میں دکھوں کے بھی سلسلے ہیں نئے
وہ زخم تازہ ہوئے ہیں جو بھرنے والے تھے
یہ کس مقام پہ سوجھی تجھے بچھڑنے کی
کہ اب تو جا کے کہیں دن سنورنے والے تھے
ہزار مجھ سے وہ پیمان وصل کرتا رہا
پر اس کے طور طریقے مکرنے والے تھے
تمہیں تو فخر تھا شیرازہ بندیٔ جاں پر
ہمارا کیا ہے کہ ہم تو بکھرنے والے تھے
تمام رات نہایا تھا شہر بارش میں
وہ رنگ اتر ہی گئے جو اترنے والے تھے
اس ایک چھوٹے سے قصبے پہ ریل ٹھہری نہیں
وہاں بھی چند مسافر اترنے والے تھے
جمال احسانی
صبحِ مغرور کو ہے شام بھی ہوتے دیکھا
نامور شخص کو گمنام بھی ہوتے دیکھا
حُسن سے آنکھ ملانے کی حماقت کر کے
ہم نے انسان کو نیلام بھی ہوتے دیکھا
جس کی امید کبھی تھی ہی نہیں ہونے کی
اپنی آنکھوں سے وہی کام بھی ہوتے دیکھا
جو زمانے میں کبھی خاص ہوئے پھرتے تھے
پھر زمانے نے اُنہیں عام بھی ہوتے دیکھا
جو سمجھتے تھے کہ ناکام نہیں ہو سکتے
شہر بھر نے انہیں ناکام بھی ہوتے دیکھا
کتنا دلکش تھا یہ آغازِ محبت لیکن
اے محبت ترا انجام بھی ہوتے دیکھا
اک زمانے میں جو انمول تھے عابدؔ میں نے
ایسے اشخاص کو بے دام بھی ہوتے دیکھا
ایس،ڈی،عابدؔ
یوم پیدائش 20 اپریل 1982
کہانی کار کہتا ہے سبھی کردار بکتے ہیں
سبھی کردار بکتے ہیں کہانی کار بکتے ہیں
فقط اتنا بتا دیجے کہ صاحب کیا خریدیں گے
یہاں مضمون بکتے ہیں یہاں اشعار بکتے ہیں
میں اپنے اشک پیتا ہوں بہت مشکل سے جیتا ہوں
محبت ظلم ڈھاتی ہے مرے اعزار بکتے ہیں
اگر فن روگ بن جائے بدن کا سوگ بن جائے
تو پھر حالات کے ہاتھوں سبھی فنکار بکتے ہیں
ہمارے عکس حیرت کی نئی تعبیر ہیں صاحب
ہمارے آئنہ خانے پسِ زنگار بکتے ہیں
میں کس جنگل کا باسی ہوں اسد ہوں یا میں آسی ہوں
کہ میرے سامنے اکثر میرے اشجار بکتے ہیں
پیر اسد کمال
یوم پیدائش 20 اپریل 1977
کہ جیسے ایک چنگاری جلائے راکھ ہونے تک
نہیں جھکتی یوں ہی گردن ہماری خاک ہونے تک
ابھی ہوں اس قدر سادہ محبت کر نہیں سکتا
تو میری سادگی پہ مر مرے چالاک ہونے تک
نہ جانے رو پڑا وہ کیوں لہو میرا جو ٹپکا تو
ستم جس نے کیے مجھ پر جگر کے چاک ہونے تک
بہا کر لے گئے آنسو تجھے تیرے ٹھکانے سے
بسا تھا تو ان آنکھوں میں مگر نمناک ہونے تک
جو مجھ کو کاٹنے میں ہر گھڑی مصروف تھے ان کو
دیا ہے سائباں میں نے خس و خاشاک ہونے تک
ابھی روشن تو ہیں لیکن اُجالے ہم نہ لے پائے
یہ شمعیں بجھ چکی ہوں گی ہمیں ادراک ہونے تک
دعاٶں میں اثر ہو تو پہنچتی ہیں وہاں فوراً
نہیں لگتا انہیں اک پل پسِ افلاک ہونے تک
تجھے پہنائی ہے بیٹی تو اِس کی لاج بھی رکھنا
یہ میرے سر کی پگڑی تھی تری پوشاک ہونے تک
جاویدجدون
منزلوں کے فاصلے دیوار و در میں رہ گئے
کیا سفر تھا میرے سارے خواب گھر میں رہ گئے
اب کوئی تصویر بھی اپنی جگہ قائم نہیں
اب ہوا کے رنگ ہی میری نظر میں رہ گئے
جتنے منظر تھے مرے ہمراہ گھر تک آئے ہیں
اور پس منظر سواد رہ گزر میں رہ گئے
اپنے قدموں کے نشاں بھی بند کمروں میں رہے
طاقچوں پر بھی دیئے خالی نگر میں رہ گئے
کر گئی ہے نام سے غافل ہمیں اپنی شناخت
صرف آوازوں کے سائے ہی خبر میں رہ گئے
ناخداؤں نے پلٹ کر جانے کیوں دیکھا نہیں
کشتیوں کے تو کئی تختے بھنور میں رہ گئے
کیسی کیسی آہٹیں الفاظ کا پیکر بنیں
کیسے کیسے عکس میری چشم تر میں رہ گئے
ہاتھ کی ساری لکیریں پاؤں کے تلووں میں تھیں
اور میرے ہم سفر گرد سفر میں رہ گئے
کیا ہجوم رنگ اخترؔ کیا فروغ بوئے گل
موسموں کے ذائقے بوڑھے شجر میں رہ گئے
اختر ہوشیارپوری
منزلوں کی اور جاتے سب اشارے مر گئے
آنکھ کی دہلیز پر جب خواب سارے مر گئے
لمحہ بھر کو چاند مٹھی میں چھپا کے رکھ لیا
لمحہ بھر میں دیکھ تو کتنے ستارے مر گئے
اُس نے جب اک پھول کے رخسار پر بوسہ دیا
تم نے دیکھا ہی نہیں کتنے نظارے مرگئے
پانیوں کی چاہ میں اُس کے قدم اُٹھے تو پھر
ہو گیا دریا سمندر اور کنارے مر گئے
اُس نے جب سر کو مرے کاندھے پہ آ کے رکھ دیا
پھر شجر دیوار و در اور سب سہارے مر گئے
وقتِ رخصت حوصلہ جانے کہاں گم ہو گیا
سوچ پاگل ہو گئی ، الفاظ سارے مر گئے
اِس طرح صدقے اتارے اس نے اپنی ذات کے
اُس نے اپنے سر سے جتنے لوگ وارے مر گئے
اشفاق احمد صائم
دل شجر ہو جاۓگا جب بے اثر
وہ رہےگا بے محبت بے ثمر
زخم ان کو میں دکھانے آ گیا
جو لئے نشتر کھڑے تھے منتظر
آنکھ سے ٹپکا تھا میرے ہی لہو
جان کر بنتے رہے وہ بے خبر
میں رہا بت سادگی کا بن کے ہی
وہ اداکاری میں ٹھہرے خوب تر
ایک لغزش کیا ہوئ تھی راہ میں
ہو گیا ہر راستہ ہی پر خطر
بھول کر مجھ کو گئ جو زندگی
میں رہوں ذاؔکر اسی کا عمر بھر
ذاکر حسین ذاکر ہلسنگی
زخم پر زخم کھانے کی عادت نہیں
اب مجھے دل لگانے کی عادت نہیں
میں تمہارا یقیں اب کروں کِس طرح
خود کو پاگل بنانے کی عادت نہیں
جو بُھلا دے اُسے بُھول جاتا ہوں میں
اپنے دل کو جلانے کی عادت نہیں
گر کِسی سے بھلائی نہ کر پاٶں تو
مجھ کو دل بھی دُکھانے کی عادت نہیں
رات دن سوچتا ہوں فقط میں تمہیں
مجھ کو سارے زمانے کی عادت نہیں
میں تو لِکھتا ہوں غزلیں تمہارے لئے
ہر کِسی کو سنانے کی عادت نہیں
ساتھ میرا مصیبت میں جو چھوڑ دے
اُس کو پھر آزمانے کی عادت نہیں
ہے وفا کی توقع اُسی سے مجھے
جِس کو وعدہ نِبھانے کی عادت نہیں
تھی طبیعت گلابوں سی پر اب مجھے
بِن ترے مسکرانے کی عادت نہیں
بُھول جاتا ہوں ذُلفی زمانے کو میں
ایک تجھ کو بُھلانے کی عادت نہیں
ذوالفقار علی ذُلفی
جیتے رہنا ہی جینے کا ہرجانہ ہے
مر ہی جاتے مگر جرم مر جانا ہے
بےرخی اپنی کب تک چھپاے ہوا
ٹوٹا شیشہ تو اک دن بکھر جانا ہے
جیسا بھی ہو سفر کاٹنا ہے ہمیں
اور پھر لوٹ کے اپنے گھر جانا ہے
کہنے کو ہے سفر یہ تمہارا مگر
جاں وہ دیگا اشارہ ادھر جانا ہے
چھوٹا سا مرحلہ زندگی ہے مگر
تا قیامت رہے نام کر جانا ہے
کون کب تک بسا کس کے دل میں مبین
ایک دن تجھ کو دل سے اتر جانا ہے
مبین ناظر
مسجد ہو یا مندر ہو کیا؟
تم میرا حتمی گھر ہو کیا؟
یہ حوریں تم سے جلتی ہیں؟
اچھا اتنی سندر ہو کیا؟
ہائے اتنا میٹھا لہجہ
تم اردو کی ٹیچر ہو کیا؟
یہ تیری پوجا کرتی ہیں
تم پریوں کی رہبر ہو کیا؟
اتنی میٹھی چائے جاناں
شوگر مل میں ورکر ہو کیا؟
اف دوزخ سے دھمکاتی ہو
تم عالم کی دختر ہو کیا؟
تم سے پوچھیں تو کھلتے ہیں
تم پھولوں کی افسر ہو کیا؟
تم سے پوچھیں گے سب حانی
تم شاعر کی ہمسر ہو کیا؟
ریحانءمحمد
ترا خیال نہ کردے کہیں فنا ہم کو
اے یار اتنا مسلسل نہ یاد آ ہم کو
نئے مزاج نئی سوچ کے ہوے حامل
بدلتے وقت نے کتنا بدل دیا ہم کو
نشاطِ روح ودل کی تھی آروزو لیکن
سوائے درد کے کچھ بھی نہیں ملا ہم
کبھی تھے موم کی صورت پگھلنے والے ہم
فریبِ زیست نے پتھر بنا دیا ہم کو
قصور اتنا تھا حق کے لئے زباں کھولی
ملی نا کردہ گناہوں کی پھر سزا ہم کو
بکھرنا طئے تھا ہمارا کہ قرب سے تیرے
ملا ہے جینے کا اے یار حوصلہ ہم کو
ہوئیں خطائیں بہت ہم سے روز وشب ماجد
کہ جبکہ اچھے برے کا شعور تھا ہم کو
محمد ہارون علی ماجد
ظلمت شب سے کہیں دور اجالا مچلے
چاند مچلے تو کہیں چاند کا ہالہ مچلے
روح کی بالکنی میں کوئی خوشبو پھیلے
دل کے صحرا و بیابان میں لالہ مچلے
فکر روشن ہو کسی پیار کے افسانے کی
نوک خامہ میں کوئی مست مقالہ مچلے
کوئی دلدار ملے "کے ٹو" کی چوٹی جیسا
دل کے آنگن میں کوئی عشق ہمالہ مچلے
مرے دل میں مرے بابا کی محبت دھڑکے
میرے ماتھے پہ میری ماں کا حوالہ مچلے
وجد میں جام دھمالی ہو صبوحی ناچے
مے کدہ رقص کرے مے کا پیالہ مچلے
آج خاموشی میں طوفان چھپا ہے عالی
برف کے بوجھ تلے جیسے جوالا مچلے
شائستہ کنول عالی
یوم پیدائش 18 اپریل 1768
گل کے ہونے کی توقع پہ جئے بیٹھی ہے
ہر کلی جان کو مٹھی میں لیے بیٹھی ہے
کبھی صیاد کا کھٹکا ہے کبھی خوف خزاں
بلبل اب جان ہتھیلی پہ لیے بیٹھی ہے
تیر و شمشیر سے بڑھ کر ہے تری ترچھی نگاہ
سیکڑوں عاشقوں کا خون کیے بیٹھی ہے
تیرے رخسار سے تشبیہ اسے دوں کیوں کر
شمع تو چربی کو آنکھوں میں دیئے بیٹھی ہے
تشنہ لب کیوں رہے اے ساقیٔ کوثر چنداؔ
یہ ترے جام محبت کو پیے بیٹھی ہے
ماہ لقا چندا
یوم پیدائش 18 اپریل 1927
یہ کہاں سے موج طرب اٹھی کہ ملال دل سے نکل گئے
وہی صبح و شام جو تھے گراں نفس بہار میں ڈھل گئے
یہ دیار شوق ہے ہم نشیں یہاں لغزشوں میں بھی حسن ہے
جو مٹے وہ اور ابھر گئے جو گرے وہ اور سنبھل گئے
حسیں زندگی کی تلاش تھی ہمیں سر خوشی کی تلاش تھی
ہوئے زندگی سے جو آشنا تو جراحتوں سے بہل گئے
ترے سوگواروں کی زندگی کبھی مطمئن نہ گزر سکی
جو بجھی کبھی کوئی تشنگی کئی اور درد مچل گئے
مری آرزوؤں کے خواب تھے کہ فضائے حسن و شباب تھے
کہیں نکہتوں میں بکھر گئے کہیں رنگ و نور میں ڈھل گئے
انہیں راحتوں کا خیال ہے نہ صعوبتوں کا ملال ہے
جو تری تلاش میں چل پڑے جو تری طلب میں نکل گئے
ہے بھری بہار تو کیا کروں نہ ملے قرار تو کیا کروں
مرے سامنے ہیں وہ آشیاں جو بھری بہار میں جل گئے
فرید جاوید
چھن گیا سائباں دربدر ہو گیا
مرگئی جب سے ماں دربدر ہو گیا
شہر بھی ہے وہی لوگ بھی ہیں وہی
ڈھونڈتے آشیاں دربدر ہو گیا
ہر گلی ہر سڑک دیکھی بھالی مری
ہاۓ قسمت کہاں دربدر ہو گیا
کوئلوں بلبلوں کا جو تھا ہم نوا
دیکھ لے باغباں دربدر ہو گیا
جھڑکیوں ہچکیوں کے سفر میں رہا
بخت کے درمیاں دربدر ہو گیا
اوڑھ کر وحشتیں پھرتا ہوں کوبہ کو
ٹھہروں میں اب کہاں در بدر ہو گیا
دکھ بھری زندگی لٹ گئی ہر خوشی
بول کر داستاں دربدر ہو گیا
اپنے حالات کا ستایا ہوا
آج مالک مکاں دربدر ہو گیا
نیاز احمد عاطر
یوم پیدائش 28 فروری 1902 غیر کے خط میں مجھے ان کے پیام آتے ہیں کوئی مانے کہ نہ مانے مرے نام آتے ہیں عافیت کوش مسافر جنھیں منزل سمجھیں عشق...
